ಪ್ರೊ ಕಬಡ್ಡಿ: ಪ್ಲೇಆಫ್ ನಿಂದ ಹೊರಬಿದ್ದ ತಮಿಳ್‌ ತಲೈವಾಸ್‌

ಬೆಂಗಳೂರು: ಬುಧವಾರ ನಡೆದ ಪ್ರೊ ಕಬಡ್ಡಿ ಮೊದಲ ಪಂದ್ಯದಲ್ಲಿ ಬೆಂಗಾಲ್‌ ವಾರಿಯರ್ಸ್‌ 52-21ರಿಂದ ತಮಿಳ್‌ ತಲೈವಾಸ್‌ ತಂಡವನ್ನು ಸೋಲಿಸಿದೆ. ಒಟ್ಟು 21 ಪಂದ್ಯವಾಡಿರುವ ತಮಿಳ್‌ ತಲೈವಾಸ್‌ 10 ಸೋಲನುಭವಿಸಿದೆ, ಗೆದ್ದಿದ್ದು 5 ಪಂದ್ಯ ಮಾತ್ರ, 6 ಟೈ ಪಂದ್ಯಗಳಲ್ಲಿ ಪಾಲ್ಗೊಂಡಿದೆ.

ಅಲ್ಲಿಗೆ ಅದರ ಪ್ಲೇಆಫ್ ಆಸೆ ಸಂಪೂರ್ಣವಾಗಿ ಕೊನೆಗೊಂಡಿದೆ. ಇನ್ನು ಬೆಂಗಾಲ್‌ ಆಡಿರುವ 21 ಪಂದ್ಯಗಳಲ್ಲಿ 10 ಸೋಲು, 8 ಗೆಲುವು ಸಾಧಿಸಿದೆ. 3 ಟೈ ಕಂಡಿದೆ. ಬೆಂಗಾಲ್‌ ಕೂಡ ಪ್ಲೇಆಫ್ ಕನಸು ಇತರ ತಂಡಗಳ ಫ‌ಲಿತಾಂಶವನ್ನೂ ಅವಲಂಬಿಸಬೇಕಾಗಿದೆ.

ದಿನದ ಮತ್ತೊಂದು ಪಂದ್ಯದಲ್ಲಿ ಜೈಪುರ ಪಿಂಕ್‌ ಪ್ಯಾಂಥರ್ 54-35 ಅಂತರದಿಂದ ತೆಲುಗು ಟೈಟಾನ್ಸ್‌ ವಿರುದ್ಧ ಗೆಲುವು ದಾಖಲಿಸಿದೆ.

ಫೆ.21ರಿಂದ ಪ್ಲೇಆಫ್ ಆರಂಭ
ಮಾಶಲ್‌ ಸ್ಪೋರ್ಟ್ಸ್ ಪ್ರೊ ಕಬಡ್ಡಿ ಪ್ಲೇಆಫ್ ಹಾಗೂ ಫೈನಲ್‌ ಪಂದ್ಯಗಳ ವೇಳಾಪಟ್ಟಿ ಪ್ರಕಟಿಸಿದೆ. ಫೆ.21 ಮತ್ತು 23ರಂದು ಪ್ಲೇಆಫ್ ಪಂದ್ಯಗಳು ನಡೆಯಲಿವೆ. ಇನ್ನು ಫೆ.25ರಂದು ಅಂತಿಮ ಪಂದ್ಯ ನಡೆಯಲಿದೆ.