ಪ್ರಿಯಾಂಕಾ-ಮೋದಿ ಹೋಳಿ ರಂಗು, ಚೀನ ಪಿಸ್ತೂಲು ಮಂಕು

ಅತ್ತ ರಾಜಕಾರಣಿಗಳ ನಡುವೆ ಚುನಾವಣಾ ಯುದ್ಧ ನಡೆದಿದ್ದರೆ, ಇನ್ನೊಂದೆಡೆ ವ್ಯಾಪಾರಿಗಳ ನಡುವೆಯೂ ಚುನಾವಣಾ ರಂಗು ಜೋರಾಗಿದೆ. ಈ ಬಾರಿ ಉತ್ತರ ಪ್ರದೇಶ ದಲ್ಲಿ ಹೋಳಿ ಹಬ್ಬದಲ್ಲಿ ನರೇಂದ್ರ ಮೋದಿ, ರಾಹುಲ್‌ ಗಾಂಧಿ, ಯೋಗಿ ಆದಿತ್ಯನಾಥ್‌ ಪಿಚಕಾರಿ,  ಪ್ರಿಯಾಂಕಾ ವಾದ್ರಾ  ವಾಟರ್‌ ಬ್ಲಾಸ್ಟರ್‌ಗಳ ವ್ಯಾಪಾರ ಭರ್ಜರಿಯಾಗಿ ನಡೆದಿದೆ. 

ಲೋಕಸಭಾ ಚುನಾವಣೆಯ ಕಾವಿನ ಲಾಭ ಪಡೆಯಲು ವ್ಯಾಪಾರ ಲೋಕ ರಾಜಕಾರಣಿಗಳ ಮುಖ ಮತ್ತು ಹೆಸರುಗಳನ್ನು ತಮ್ಮ ಬ್ರಾಂಡ್‌ಗಳಿಗೆ ಬಳಸಿಕೊಂಡಿದೆ. ಸರ್ಜಿಕಲ್‌ ಸ್ಟ್ರೈಕ್‌ ವಾಟರ್‌ ಗನ್‌: ಉತ್ತರಪ್ರದೇಶದ ಪ್ರತಿಯೊಂದು ಅಂಗಡಿಯಲ್ಲೂ ಎಕೆ-47, ಸರ್ಜಿಕಲ್‌ ಸ್ಟ್ರೈಕ್‌ ಪಿಚಕಾರಿಗಳು ಕಣ್ಮನ ಸೆಳೆದವು. ಮಕ್ಕಳು ಹೆಚ್ಚಾಗಿ, ಸರ್ಜಿಕಲ್‌ ಸ್ಟ್ರೈಕ್‌, ಮೋದಿ-ರಾಹುಲ್‌ ವಾಟರ್‌ ಪಿಸ್ತೂಲ್‌ಗ‌ಳನ್ನು ಖರೀದಿಸಿದ್ದಾರಂತೆ. ಇನ್ನು ಪ್ರಿಯಾಂಕಾ ಪಿಚಕಾರಿ ಬಂದ ನಂತರದಿಂದ ರಾಹುಲ್‌ ಪಿಚಕಾರಿಗೆ ಬೇಡಿಕೆ ಈ ಬಾರಿ ಕಡಿಮೆಯಾಯಿತು ಎನ್ನಲಾಗಿದೆ. ಬಿಜೆಪಿ ಮತ್ತು ಕಾಂಗ್ರೆಸ್‌ನ ಬಲೂನುಗಳೂ ವಿಪರೀತ ಮಾರಾಟವಾಗಿದ್ದು, ಅದರಲ್ಲಿ ನೀರು ತುಂಬಿ ಜನರು ರಂಗಿನಾಟವಾಡಿದ್ದಾರೆ. ಈ ಚತುರ ವ್ಯಾಪಾರ ತಂತ್ರದಿಂದಾಗಿ ಈ ಬಾರಿ ಯುಪಿಯಲ್ಲಿ ಚೀನದ ಪ್ರಾಡಕ್ಟ್ಗಳು ಕಡಿಮೆ ಮಾರಾಟವಾಗಿವೆ!