‘ನನ್ನ ಪ್ರಕಾರ’ ಚಿತ್ರದ ಟ್ರೇಲರ್‌ಗೆ ಮೆಚ್ಚುಗೆ ವ್ಯಕ್ತವಾಗುವ ಮೂಲಕ ಪ್ರಿಯಾಮಣಿಗೆ ‘ನನ್ನ ಪ್ರಕಾರ’ ಚಿತ್ರದ ಮೇಲಿನ ವಿಶ್ವಾಸ ಹೆಚ್ಚಿದೆ. ‘ಇದು ಔಟ್ ಅಂಟ್ ಔಟ್ ಕ್ರೈಮ್‌ ಥ್ರಿಲ್ಲರ್‌ ಸಿನಿಮಾ. ತುಂಬಾ ಕುತೂಹಲದೊಂದಿಗೆ ಸಾಗುತ್ತದೆ. ನಿರ್ದೇಶಕ ವಿನಯ್‌ ಬಾಲಾಜಿ ಮಾಡಿಕೊಂಡಿರುವ ಸ್ಕ್ರೀನ್‌ಪ್ಲೇ ತುಂಬಾ ಹೊಸದಾಗಿದೆ. ಮೊದಲ ಬಾರಿಗೆ ನಿರ್ದೇಶನ ಮಾಡಿದ್ದಾರೆಂದು ಅನಿಸೋದಿಲ್ಲ. ಡಾ.ಅಮೃತಾ ಪಾತ್ರಕ್ಕೆ ನಾನೇ ಬೇಕೆಂದುಕೊಂಡು ನನ್ನಿಂದಲೇ ಮಾಡಿಸಿದ್ದಾರೆ. ಪಾತ್ರಕ್ಕೆ ನ್ಯಾಯ ಒದಗಿಸಿದ್ದೇನೆಂಬ ವಿಶ್ವಾಸ, ಖುಷಿ ಇದೆ’ ಎನ್ನುತ್ತಾರೆ ಪ್ರಿಯಾಮಣಿ.
ಚಿತ್ರ ರಂಗದಲ್ಲಿ ಸ್ಟಾರ್‌ನಟಿಯಾಗಿ ಮೆರೆದು ಆ ನಂತರ ಮದುವೆಯಾಗಿ, ಒಂದು ಗ್ಯಾಪ್‌ನ ಬಳಿಕ ಮತ್ತೆ ಬಣ್ಣ ಹಚ್ಚುವ ನಟಿಯರಿಗೊಂದು ಕುತೂಹಲವಿರುತ್ತದೆ. ಮದುವೆಗೆ ಮುಂಚೆ ತಮ್ಮನ್ನು, ತಮ್ಮ ಪಾತ್ರವನ್ನು ಇಷ್ಟಪಟ್ಟು, ಪ್ರೋತ್ಸಾಹಿಸಿದ ಅಭಿಮಾನಿಗಳು ಮದುವೆ ನಂತರ ಹೇಗೆ ಸ್ವೀಕರಿಸುತ್ತಾರೆಂದು. ಈಗ ಅದೇ ಕುತೂಹಲ ಪ್ರಿಯಾಮಣಿಯವರಲ್ಲೂ ಇದೆ. ಕನ್ನಡ ಸೇರಿದಂತೆ ಪರಭಾಷೆಯಲ್ಲೂ ಬೇಡಿಕೆಯ ನಟಿಯಾಗಿ ಮಿಂಚಿದ ಪ್ರಿಯಾಮಣಿ, ಮದುವೆ ಬಳಿಕ ಸ್ವಲ್ಪ ದಿನ ನಟನೆಗೆ ಬ್ರೇಕ್‌ ತಗೊಂಡಿದ್ದರು. ಆದರೆ, ಅವರಿಗೆ ಬರುತ್ತಿರುವ ಅವಕಾಶಗಳೇನೂ ಕಡಿಮೆಯಾಗಿರಲಿಲ್ಲ. ಬ್ರೇಕ್‌ನ ಬ್ರೇಕ್‌ ಮಾಡಿದ ನಂತರ ಪ್ರಿಯಾಮಣಿ ಒಪ್ಪಿದ ಮೊದಲ ಸಿನಿಮಾ ‘ನನ್ನ ಪ್ರಕಾರ’. ಈಗ ಈ ಚಿತ್ರದ ಮೇಲೆ ಪ್ರಿಯಾಮಣಿ ನಿರೀಕ್ಷೆ ಇಟ್ಟಿದ್ದಾರೆ. ‘ನನ್ನ ಪ್ರಕಾರ’ ಇಂದು ತೆರೆಕಾಣುತ್ತಿದೆ. ಈ ಚಿತ್ರದ ವಿಶೇಷವೆಂದರೆ ಮದುವೆಯಾದ ಬಳಿಕ ಪ್ರಿಯಾಮಣಿ ಒಪ್ಪಿದ ಹಾಗೂ ಬಿಡುಗಡೆಯಾಗುತ್ತಿರುವ ಮೊದಲ ಸಿನಿಮಾ. ಇಂದು ಪ್ರಿಯಾಮಣಿ ಅವರ ವೆಡ್ಡಿಂಗ್‌ ಆ್ಯನಿವರ್ಸರಿ. ಈ ದಿನವೇ ‘ನನ್ನ ಪ್ರಕಾರ’ ಚಿತ್ರ ಬಿಡುಗಡೆಯಾಗುತ್ತಿರುವುದರಿಂದ ಪ್ರಿಯಾಮಣಿ ಖುಷಿಯಾಗಿದ್ದಾರೆ.
‘ನನ್ನ ಪ್ರಕಾರ’ ಚಿತ್ರದಲ್ಲಿ ಪ್ರಿಯಾಮಣಿ ಅಮೃತಾ ಎಂಬ ಡಾಕ್ಟರ್‌ ಪಾತ್ರ ಮಾಡಿದ್ದಾರೆ. ಪ್ರಿಯಾಮಣಿಯವರ ಸಿನಿ ಕೆರಿಯರ್‌ನಲ್ಲೇ ಡಾಕ್ಟರ್‌ ಪಾತ್ರ ಇದೇ ಮೊದಲು. ಹೊಸ ಪಾತ್ರ ಮಾಡಿರುವ ಪ್ರಿಯಾಮಣಿ ತಮ್ಮ ಚಿತ್ರದ ಬಗ್ಗೆ ಹೇಳುವುದಿಷ್ಟು, ‘ಮದುವೆ ಬಳಿಕ ನಾನು ಒಪ್ಪಿಕೊಂಡ ಹಾಗೂ ರಿಲೀಸ್‌ ಆಗುತ್ತಿರುವ ಮೊದಲ ಸಿನಿಮಾ ‘ನನ್ನ ಪ್ರಕಾರ’. ನಾನಿಲ್ಲಿ ಅಮೃತಾ ಎಂಬ ಪಾತ್ರ ಮಾಡಿದ್ದೇನೆ. ನನಗೆ ಈ ಪಾತ್ರ ತುಂಬಾ ಹೊಸದು. ಅನೇಕರಿಗೆ ಚಿಕ್ಕಂದಿನಲ್ಲಿ ಡಾಕ್ಟರ್‌ ಆಗಬೇಕೆಂಬ ಆಸೆ ಇರುತ್ತದೆ. ಆದರೆ, ನನಗೆ ಆ ತರಹದ ಯಾವ ಆಸೆಯೂ ಇರಲಿಲ್ಲ. ಈಗ ತೆರೆಮೇಲೆ ವೈದ್ಯೆಯಾಗಿದ್ದೇನೆ. ಹಾಗಂತ ರೆಗ್ಯುಲರ್‌ ಆದ ಪಾತ್ರವಲ್ಲ. ಈ ಪಾತ್ರಕ್ಕಾಗಿ ಒಂದಷ್ಟು ಪೂರ್ವತಯಾರಿ ಮಾಡಿದ್ದೇನೆ. ಪ್ರೊಫೆಶನಲ್ ಡಾಕ್ಟರ್‌ಗಳು ಹೇಗಿರುತ್ತಾರೋ, ಅದೇ ರೀತಿ ಈ ಪಾತ್ರ ಮೂಡಿಬಂದಿದೆ. ಸಾಮಾನ್ಯವಾಗಿ ಯಾವುದೇ ಒಂದು ಪಾತ್ರವಾದರೂ, ಅದಕ್ಕೇ ಆದ ಒಂದು ಸಿನಿಮಾ ಲಿಬರ್ಟಿ ಇರುತ್ತದೆ. ಆದರೆ, ನಾನಿಲ್ಲಿ ಆ ಲಿಬರ್ಟಿಯನ್ನು ಬಳಸಿಕೊಂಡಿಲ್ಲ. ತುಂಬಾ ಸೀರಿಯಸ್‌ ಆದ ಪಾತ್ರ. ನಮ್ಮ ಅಂಕಲ್-ಆಂಟಿ ಡಾಕ್ಟರ್‌. ಹಾಗಾಗಿ, ಚಿಕ್ಕವಯಸ್ಸಿನಿಂದಲೇ ಅವರನ್ನು ಗಮನಿಸುತ್ತಿದ್ದೆ. ಈ ಪಾತ್ರಕ್ಕಾಗಿ ಹೊಸ ಮ್ಯಾನರಿಸಂ ಅನ್ನು ಮೈಗೂಢಿಸಿಕೊಳ್ಳಬೇಕಾಯಿತು’ ಎಂದು ತಮ್ಮ ಪಾತ್ರದ ಬಗ್ಗೆ ಮಾತನಾಡುತ್ತಾರೆ.
ಈಗಾಗಲೇ ಬಿಡುಗಡೆಯಾಗಿರುವ ಚಿತ್ರದ ಟ್ರೇಲರ್‌ಗೆ ಮೆಚ್ಚುಗೆ ವ್ಯಕ್ತವಾಗುವ ಮೂಲಕ ಪ್ರಿಯಾಮಣಿಗೆ ‘ನನ್ನ ಪ್ರಕಾರ’ ಚಿತ್ರದ ಮೇಲಿನ ವಿಶ್ವಾಸ ಹೆಚ್ಚಿದೆ. ‘ಇದು ಔಟ್ ಅಂಡ್‌ ಔಟ್ ಕ್ರೈಮ್‌ ಥ್ರಿಲ್ಲರ್‌ ಸಿನಿಮಾ. ತುಂಬಾ ಕುತೂಹಲದೊಂದಿಗೆ ಸಾಗುತ್ತದೆ. ನಿರ್ದೇಶಕ ವಿನಯ್‌ ಬಾಲಾಜಿ ಮಾಡಿಕೊಂಡಿರುವ ಸ್ಕ್ರೀನ್‌ಪ್ಲೇ ತುಂಬಾ ಹೊಸದಾಗಿದೆ. ಮೊದಲ ಬಾರಿಗೆ ನಿರ್ದೇಶನ ಮಾಡಿದ್ದಾರೆಂದು ಅನಿಸೋದಿಲ್ಲ. ಡಾ.ಅಮೃತಾ ಪಾತ್ರಕ್ಕೆ ನಾನೇ ಬೇಕೆಂದುಕೊಂಡು ನನ್ನಿಂದಲೇ ಮಾಡಿಸಿದ್ದಾರೆ. ಪಾತ್ರಕ್ಕೆ ನ್ಯಾಯ ಒದಗಿಸಿದ್ದೇನೆಂಬ ವಿಶ್ವಾಸ, ಖುಷಿ ಇದೆ’ ಎನ್ನುತ್ತಾರೆ ಪ್ರಿಯಾಮಣಿ.
ಮದುವೆಯಾದ ಬಳಿಕ ಬಹುತೇಕ ನಟಿಯರ ಸಿನಿಮಾ ಆಯ್ಕೆ ಬದಲಾಗುತ್ತದೆ. ಹಾಗಾದರೆ ಪ್ರಿಯಾಮಣಿ ಯಾವ ವಿಚಾರದಲ್ಲಿ ಬದಲಾಗಿದ್ದಾರೆಂದರೆ, ಸ್ಟೇಟಸ್‌ ಅಷ್ಟೇ ಬದಲಾಗಿದೆ ಎನ್ನುತ್ತಾರೆ. ‘ನಾನು ಕಲಾವಿದೆಯಾಗಿ ಅದೇ ಪ್ರಿಯಾಮಣಿಯಾಗಿದ್ದೇನೆ. ಯಾವುದೇ ಒಂದು ಭಾಷೆಗೆ ಬೌಂಡರಿ ಹಾಕಿಕೊಂಡಿಲ್ಲ. ಎಲ್ಲಿ ಒಳ್ಳೆಯ ಪಾತ್ರ ಸಿಗುತ್ತೋ, ಅಲ್ಲಿ ನಟಿಸುತ್ತೇನೆ’ ಎನ್ನುವುದು ಪ್ರಿಯಾಮಣಿ ಮಾತು.
ಸದ್ಯ ಪ್ರಿಯಾಮಣಿ ಹಿಂದಿ-ಇಂಗ್ಲೀಷ್‌ನಲ್ಲಿ ಪ್ರಸಾರವಾಗುವ ‘ದಿ ಫ್ಯಾಮಿಲಿ ಮ್ಯಾನ್‌’ ವೆಬ್ ಸೀರಿಸ್‌ನಲ್ಲಿ ನಟಿಸುತ್ತಿದ್ದಾರೆ.
•ರವಿಪ್ರಕಾಶ್‌ ರೈ
