Plantation ಮರುವಶಕ್ಕೆ ಆದ್ಯತೆ : ಅರಣ್ಯ ಸಚಿವ ಈಶ್ವರ್‌ಖಂಡ್ರೆ

ಬೆಳಗಾವಿ: ಕೊಡಗು, ಚಾಮರಾಜನಗರ ಸೇರಿ ಮತ್ತಿತರ ಜಿಲ್ಲೆಗಳಲ್ಲಿ ಅರಣ್ಯ ಭೂಮಿಯನ್ನು ಸ್ವಾತಂತ್ರ್ಯ ಪೂರ್ವದಿಂದಲೂ ಕಾಫಿ, ಟೀ, ರಬ್ಬರ್‌ ಬೆಳೆಯಲು ಕಂಪೆನಿಗಳಿಗೆ ನೀಡಲಾಗಿದೆ. ಅದರ ಗುತ್ತಿಗೆ ಅವಧಿ ಮುಗಿದಿದ್ದು ಭೂಮಿಯನ್ನು ಮರು ವಶ ಪಡೆಯುವ ಕಾರ್ಯದಲ್ಲಿ ಸರಕಾರ ನಿರತ ವಾಗಿದೆ ಎಂದು ಅರಣ್ಯ ಸಚಿವ ಈಶ್ವರ್‌ಖಂಡ್ರೆ ಹೇಳಿದರು.

ಪರಿಷತ್ತಿನಲ್ಲಿ ಬಿಜೆಪಿಯ ಕುಶಾಲಪ್ಪ ಎಂ.ಪಿ. (ಸುಜಾ) ಪ್ರಶ್ನೆಗೆ ಉತ್ತರಿಸಿದ ಅವರು, 9 ಕಂಪೆನಿಗಳು ಭೂಮಿಯನ್ನು ಗುತ್ತಿಗೆ ಪಡೆದುಕೊಂಡಿವೆ. ಈ ಕಂಪೆನಿಗಳು ಸುಮಾರು 1492.18 ಕೋಟಿ ರೂ. ಬಾಕಿ ಉಳಿಸಿಕೊಂಡಿವೆ. ಗುತ್ತಿಗೆ ಹಣ ಮತ್ತು ಬಾಕಿ ವಸೂಲಾತಿಗಳನ್ನು ಪಾವತಿಸಲು ಗುತ್ತಿಗೆದಾರರಿಗೆ ಸರಕಾರ ನೋಟಿಸ್‌ ನೀಡಿದೆ. ಗುತ್ತಿಗೆದಾರರು ನೋಟಿಸ್‌ ವಿಚಾರವಾಗಿ ನ್ಯಾಯಾಲಯದಲ್ಲಿ ದಾವೆ ಹೂಡಿದ್ದಾರೆ. ಕೋರ್ಟ್‌ ಕೂಡ ಬಾಕಿ ವಸೂಲಾತಿಗೆ ತಡೆಯಾಜ್ಞೆ ನೀಡಿದೆ ಎಂದರು.