ಕೋವಿಡ್ ಲಸಿಕೆ ಹಾಕಿಸಿದ ಕೆಲವೇ ತಾಸುಗಳಲ್ಲಿ ಗರ್ಭಿಣಿ ರಕ್ತಸ್ರಾವದಿಂದ ಸಾವು

ಕುಷ್ಟಗಿ: ಕೊರೊನಾ ಲಸಿಕೆ ಹಾಕಿಸಿದ ಕೆಲವೇ ತಾಸುಗಳಲ್ಲಿ ತೀವ್ರ ರಕ್ತಸ್ರಾವಕ್ಕೆ ಗರ್ಭಿಣಿ ಬಲಿಯಾಗಿರುವ ಘಟನೆ ಕುಷ್ಟಗಿ ತಾಲೂಕಿನಲ್ಲಿ ನಡೆದಿದೆ.

ತಾಲೂಕಿನ ಸೇಬಿನಕಟ್ಟಿ ಗ್ರಾಮದ ಮಂಜುಳಾ ಯಮನೂರಪ್ಪ ಮೇಟಿ (23) ಮೃತ ಪಟ್ಟ ದುರ್ದೈವಿ. ಕಳೆದ ಶುಕ್ರವಾರ, ತಾಲೂಕಿನ ಹೂಲಗೇರಾ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ 65 ಜನ ಗರ್ಭಿಣಿ ಯರ ಪೈಕಿ 5 ತಿಂಗಳ ಗರ್ಭಿಣಿ ಮಂಜುಳಾ ಮೇಟಿ ಗೂ ಲಸಿಕಾ ಶಿಬಿರದಲ್ಲಿ ಕೋವಿಡ್ ಲಸಿಕೆ ಹಾಕಲಾಗಿತ್ತು. ಬಳಿಕ ರಾತ್ರಿ ವೇಳೆ ತೀವ್ರ ರಕ್ತಸ್ರಾವ ಕಾಣಿಸಿಕೊಂಡಿದೆ. ಕೂಡಲೇ ಕುಷ್ಟಗಿ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ರಕ್ತಸ್ರಾವ ಹೆಚ್ಚಿದ್ದರಿಂದ ವೈದ್ಯಾಧಿಕಾರಿ ಡಾ.ಕೆ.ಎಸ್.ರಡ್ಡಿ ಅವರು, ಗರ್ಭಿಣಿ ರಕ್ತಸ್ರಾವ ನಿಯಂತ್ರಿಸಲು ಒಂದು ಪಾಯಿಂಟ್ ರಕ್ತ ನೀಡಿ ಸ್ಥಿರವಾಗಿಲು ಪ್ರಯತ್ನಿಸಿದ್ದಾರೆ. ಆದರೂ ರಕ್ತಸ್ರಾವ ತೀವ್ರವಾಗಿದ್ದರಿಂದ ಹೆಚ್ಚಿನ ಚಿಕಿತ್ಸೆಗೆ ಕೊಪ್ಪಳ ಜಿಲ್ಲಾಸ್ಪತ್ರೆಗೆ ಕರೆದೊಯ್ಯುವಾಗ ಮಾರ್ಗ‌ ಮದ್ಯೆ ಮೃತರಾಗಿದ್ದಾಳೆ.

ಇದನ್ನೂ ಓದಿ :ಸಚಿವರಿಗೆ ಖಾತೆ ಹಂಚಿಕೆ ಮಾಡಿದ ಸಿಎಂ ಬೊಮ್ಮಾಯಿ: ಹಲವರಿಗೆ ಅಚ್ಚರಿ,ಹೊಸಬರಿಗೆ ಬಂಪರ್ ಖಾತೆಗಳು

ಗರ್ಭಿಣಿ ಮಂಜುಳಾ ಅಕಾಲಿಲ ಸಾವು ಕುಟುಂಬ ವರ್ಗಕ್ಕೆ‌ ಬರ‌ ಸಿಡಿಲು ಬಡಿದಂತಾಗಿದೆ. ಈ ಕುರಿತು ತಾಲೂಕಾ ವೈದ್ಯಾಧಿಕಾರಿ ಡಾ. ಆನಂದ ಗೋಟೂರು ಪ್ರತಿಕ್ರಿಯಿಸಿ ಲಸಿಕೆಯಿಂದ ಗರ್ಭಣಿಗೆ ರಕ್ತಸ್ರಾವ ಆಗಿಲ್ಲ.

ಕುಷ್ಟಗಿ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿದಾಗ ಆರೋಗ್ಯ ಸ್ಥಿತಿ ಗಂಭೀರವಾಗಿತ್ತು. ವೈದ್ಯರಿಗೂ ಕೈ ಮೀರಿದ್ದರಿಂದ ಹೆಚ್ಚಿನ ಚಿಕಿತ್ಸೆಗೆ ಕೊಪ್ಪಳ ಜಿಲ್ಲಾಸ್ಪತ್ರೆಗೆ ಕಳುಹಿಸಲಾಗಿತ್ತು. ಮರಣೋತ್ತರ ಪರೀಕ್ಷೆಯಿಂದ ನಿಜಸ್ಥಿತಿ ಗೊತ್ತಾಗಲಿದೆ ಎಂದರು.