Prajwal Revanna ವೀಡಿಯೋ ನಿರ್ದೇಶಕ ಅಮಿತ್‌ ಶಾ ಇರಬೇಕು: ಪ್ರಿಯಾಂಕ್‌

ಬೆಂಗಳೂರು: ಒಂದು ತಿಂಗಳ ಅನಂತರ ಸಂಸದ ಪ್ರಜ್ವಲ್‌ ರೇವಣ್ಣ ತಮ್ಮ ಮೇಲಿನ ಆರೋಪದ ಬಗ್ಗೆ ವೀಡಿಯೋ ಮಾಡಿ ಹೇಳಿಕೆ ನೀಡಿದ್ದಾರೆ. ಇದರ ನಿರ್ದೇಶಕರು ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಇರಬೇಕು ಎಂದು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ರಾಜ್‌ ಸಚಿವ ಪ್ರಿಯಾಂಕ್‌ ಖರ್ಗೆ ಟೀಕಿಸಿದರು.

ನಗರದಲ್ಲಿ ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿ, ತಮ್ಮ ವಿರುದ್ಧದ ಇಷ್ಟು ದೊಡ್ಡ ಪ್ರಕರಣಕ್ಕೆ ಸ್ಪಂದಿಸಲು ಇವರಿಗೆ 30 ದಿನ ಬೇಕಾ? ಅಷ್ಟು ಸ್ವತ್ಛವಾಗಿದ್ದರೆ, ಮೊದಲ ದಿನವೇ ಪ್ರತಿಕ್ರಿಯೆ ನೀಡಬೇಕಿತ್ತು. ಕುಂಭಕರ್ಣ ನಿದ್ರೆಯಿಂದ ಎದ್ದ ಮೇಲೆ ರಾಹುಲ್‌ ಅಂದರೆ ಹೇಗೆ? ಇಡೀ ದೇಶದ ರಾಜಕಾರಣಿಗಳು ಪ್ರಜ್ವಲ್‌ ಬಗ್ಗೆ ಮಾತನಾಡಿದರು. ಅವರನ್ನು ಬಿಟ್ಟು ಕೇವಲ ರಾಹುಲ್‌ ಬಗ್ಗೆ ಮಾತಾಡುತ್ತಿದ್ದೀರಿ ಅಂದರೆ ಇದರ ನಿರ್ದೇಶಕರು ಅಮಿತ್‌ ಶಾ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಸಲೂನ್‌ಗೆ ಹೋಗಿ ಕ್ಲೀನ್‌ ಆಗಿ ಬಂದು ವೀಡಿಯೋ ಮಾಡಿದ್ದಾರೆ. ಅದರಲ್ಲಿ ಖನ್ನತೆ ಏನಾದರೂ ಕಾಣುತ್ತಿದೆಯೇ? ಇವರಿಗೆ ಖನ್ನತೆಯಾಗಿದೆ ಎಂದಾದರೆ, ಸಂತ್ರಸ್ತೆಯರ ಪರಿಸ್ಥಿತಿ ಏನು? ಅಮಿತ್‌ ಶಾ ವೀಡಿಯೋ ಮಾಡಿ ಹೊರಗೆ ಬಾ ಅಂದಿರಬೇಕು. ಇದೆಲ್ಲವೂ ಬಿಜೆಪಿ ನಾಯಕರ ನಿರ್ದೇಶನದ ಮೇರೆಗೆ ನಡೆದಿದೆ ಎಂದು ದೂರಿದರು.