ಆಸ್ಟ್ರೇಲಿಯನ್‌ ಓಪನ್‌: ಪ್ರಜ್ಞೇಶ್‌ ಪರಾಭವ

ಮೆಲ್ಬರ್ನ್: ಭಾರತದ ಯುವ ಟೆನಿಸಿಗ ಪ್ರಜ್ಞೇಶ್‌ ಗುಣೇಶ್ವರನ್‌ ಆಸ್ಟ್ರೇಲಿಯನ್‌ ಓಪನ್‌ ಟೆನಿಸ್‌ ಕೂಟದ ಪ್ರಧಾನ ಸುತ್ತಿನಲ್ಲಿ ಆಡುವ ಅವಕಾಶದಿಂದ ವಂಚಿತರಾಗಿದ್ದಾರೆ. ಶುಕ್ರವಾರ ನಡೆದ ಅರ್ಹತಾ ಸುತ್ತಿನ ಕೊನೆಯ ಸುತ್ತಿನ ಪಂದ್ಯದಲ್ಲಿ ಅವರು ಲಾತ್ವಿಯಾದ ಎರ್ನೆಸ್ಟ್‌ ಗುಲ್ಬಿಸ್‌ ವಿರುದ್ಧ 6-7 (2), 2-6 ನೇರ ಸೆಟ್‌ಗಳ ಸೋಲನುಭವಿಸಿದರು.

ವಿಶ್ವ ರ್‍ಯಾಂಕಿಂಗ್‌ನಲ್ಲಿ 122ನೇ ಸ್ಥಾನದಲ್ಲಿರುವ  ಪ್ರಜ್ಞೇಶ್‌  ಮೊದಲ ಸೆಟ್‌ನಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದರು. ಇದು ಟೈ ಬ್ರೇಕರ್‌ ತನಕ ಸಾಗಿತು. ದ್ವಿತೀಯ ಸೆಟ್‌ನಲ್ಲಿ ಗುಲ್ಬಿಸ್‌ ಅವರ ಬಲಿಷ್ಠ ಸರ್ವ್‌ಗಳ ವಿರುದ್ಧ ಹೋರಾಟ ನಡೆಸಲಾಗದೆ ಶರಣಾದರು. ಮೊದಲೆರಡು ಪಂದ್ಯಗಳಲ್ಲಿ ಆಸ್ಟ್ರೇಲಿಯದ ಹ್ಯಾರಿ ಬೌಶೀರ್‌ ಮತ್ತು ಜರ್ಮನಿಯ ಯಾನಿಕ್‌ ಹಾಫ್ಮ್ಯಾನ್‌ ವಿರುದ್ಧ  ಪ್ರಜ್ಞೇಶ್‌  ಗೆಲುವು ಸಾಧಿಸಿದ್ದರು.

ಪ್ರಜ್ಞೇಶ್‌ ಸೋಲಿನೊಂದಿಗೆ ಭಾರತದ ಪುರುಷರ ಸಿಂಗಲ್ಸ್‌ ಆಟಗಾರರಿಗೆ ಆಸ್ಟ್ರೇಲಿಯನ್‌ ಓಪನ್‌ ಪ್ರಧಾನ ಸುತ್ತಿನ ಬಾಗಿಲು ಮುಚ್ಚಿದಂತಾಯಿತು. ಇದಕ್ಕೂ ಮೊದಲು ಸುಮಿತ್‌ ನಾಗಲ್‌ ಮತ್ತು ರಾಮ್‌ಕುಮಾರ್‌ ರಾಮನಾಥನ್‌ ಬೇಗನೇ ಸೋತು ಹೊರನಡೆದಿದ್ದರು.

ವನಿತಾ ಸಿಂಗಲ್ಸ್‌ನಲ್ಲಿ ಅಂಕಿತಾ ರೈನಾ ಸ್ಪರ್ಧೆಯಲ್ಲಿದ್ದು, ಪ್ರಧಾನ ಸುತ್ತಿಗೇರುವರೇ ಎಂಬುದೊಂದು ಕುತೂಹಲ.