33 ದಿನಗಳಲ್ಲಿ 500 ಕೋಟಿ: ಬಾಹುಬಲಿ-2 ಹಿಂದಿ ಆವೃತ್ತಿ ಹೊಸ ದಾಖಲೆ

ಮುಂಬಯಿ : ನಿರ್ದೇಶಕ ಎಸ್‌ ಎಸ್‌ ರಾಜಮೌಳಿ ಅವರ ರೋಮಾಂಚಕ ಐತಿಹಾಸಿಕ ಕಥಾಚಿತ್ರ “ಬಾಹುಬಲಿ -2′ ಹಿಂದಿ ಆವೃತ್ತಿ, ಕಳೆದ ಎಪ್ರಿಲ್‌ 28ರಂದು ದೇಶಾದ್ಯಂತ ಚಿತ್ರಮಂದಿರಗಳಲ್ಲಿ ತೆರೆಕಂಡ ಕೇವಲ 33 ದಿನಗಳಲ್ಲಿ 500 ಕೋಟಿ ರೂ. ಸಂಪಾದಿಸುವ ಮೂಲಕ ಹೊಸ ದಾಖಲೆಯನ್ನು ರೂಪಿಸಿದೆ. 

ಈ ತನಕ ಯಾವುದೇ ಹಿಂದಿ ಚಿತ್ರ ಈ ಸಾಧನೆಯನ್ನು ಮಾಡಿಲ್ಲ. ಆದರೆ ಬಾಹುಬಲಿ-2 ಐತಿಹಾಸಿಕ ಕಥಾ ಚಿತ್ರ ಕೇವಲ 33 ದಿನಗಳಲ್ಲಿ 500 ಕೋಟಿ ರೂ. ಬಾಕ್ಸ್‌ ಆಫೀಸ್‌ ಗಳಿಕೆಯ ದಾಖಲೆಯನ್ನು ಸಲೀಸಲಾಗಿ ಮಾಡಿದೆ. 

ಕರಣ್‌ ಜೋಹರ್‌ ಅವರ ಧರ್ಮಾ ಪ್ರೊಡಕ್ಷನ್ಸ್‌ ಮೂಲಕ ವಿತರಣೆಗೊಂಡಿರುವ ಬಾಹುಬಲಿ-2 ಹಿಂದಿ ಆವೃತ್ತಿಯ ದಾಖಲೆಯ ಬಾಕ್ಸ್‌ ಆಫೀಸ್‌ ಗಳಿಕೆಯ ವಿವರಗಳನ್ನು ಭಾರತೀಯ ಚಿತ್ರೋದ್ಯಮ ವಿಶ್ಲೇಷಕ ರಮೇಶ್‌ ಬಾಲಾ ಟ್ವಿಟರ್‌ ಮೂಲಕ ಹಂಚಿಕೊಂಡಿದ್ದಾರೆ. 

ಬಾಹುಬಲಿ 2 ಚಿತ್ರದಲ್ಲಿ ಪ್ರಭಾಸ್‌, ರಮ್ಯ ಕೃಷ್ಣನ್‌, ರಾಣಾ ದಗ್ಗುಬತಿ, ಅನುಷ್ಕಾ ಶೆಟ್ಟಿ, ತಮನ್ನಾ ಭಾಟಿಯಾ, ಸತ್ಯರಾಜ್‌,ನಾಸಿರ್‌ ನಟಿಸಿದ್ದು ಈ ಚಿತ್ರದ ಜಾಗತಿಕ ಬಾಕ್ಸ್‌ ಆಫೀಸ್‌ ಗಳಿಕೆಯು ಈಗಾಗಲೇ 1,600 ಕೋಟಿ ರೂ. ದಾಟಿದೆ.

ಚೀನದಲ್ಲಿ ಬಾಹುಬಲಿ 2 ಚಿತ್ರ ಈಗಿನ್ನು ತೆರೆ ಕಾಣಬೇಕಿದ್ದು ಅಲ್ಲಿಯೂ ಇದು ಭಾರೀ ಬಾಕ್ಸ್‌ ಆಫೀಸ್‌ ಗಳಿಕೆಯನ್ನು ದಾಖಲಿಸುವ ಸಾಧ್ಯತೆ ಇದೆ ಎನ್ನಲಾಗಿದೆ.