ಪವರ್‌ಸ್ಟಾರ್‌ಗೆ ಪವರ್‌ ಕೊಟ್ಟಿದ್ದು ಈ ಟವರ್‌: ಶಿವಣ್ಣ

ಕನ್ನಡ ಚಿತ್ರರಂಗದ ಪವರ್‌ಸ್ಟಾರ್‌ ಯಾರೆಂದರೆ ಇಡೀ ಚಿತ್ರರಂಗದಿಂದ ಹಿಡಿದು ಅಭಿಮಾನಿ ವರ್ಗ ಪುನೀತ್‌ ರಾಜಕುಮಾರ್‌ರತ್ತ ಬೆರಳು ತೋರಿಸುತ್ತದೆ. ಏಕೆಂದರೆ ಅವರು “ಪವರ್‌ಸ್ಟಾರ್‌ ಪುನೀತ್‌ರಾಜಕುಮಾರ್‌’. ಹಾಗಾಗಿಯೇ ಪುನೀತ್‌ ಎಲ್ಲೇ ಹೋದರೂ ಅವರ ಅಭಿಮಾನಿಗಳು “ಪವರ್‌ಸ್ಟಾರ್‌ ಪವರ್‌ಸ್ಟಾರ್‌’ ಎಂದು ಜೋರಾಗಿ ಕೂಗುತ್ತಾರೆ.

ಇತ್ತೀಚೆಗೆ ನಡೆದ “ಅಂಜನಿಪುತ್ರ’ ಆಡಿಯೋ ಬಿಡುಗಡೆ ಕಾರ್ಯಕ್ರಮದಲ್ಲೂ ಪುನೀತ್‌ ಅಭಿಮಾನಿಗಳು “ಪವರ್‌ಸ್ಟಾರ್‌’ ಎನ್ನುತ್ತಾ ತಮ್ಮ ಹರ್ಷ ವ್ಯಕ್ತಪಡಿಸುತ್ತಿದ್ದಾರೆ. ವೇದಿಕೆಯಲ್ಲಿ ಪುನೀತ್‌ ಪಕ್ಕ ನಿಂತಿದ್ದ ಶಿವರಾಜಕುಮಾರ್‌, “ನೀವಿವತ್ತು ಪವರ್‌ಸ್ಟಾರ್‌ ಎಂದು ಕೂಗುತ್ತಿದ್ದೀರಿ. ಈ ಪವರ್‌ಸ್ಟಾರ್‌ಗೆ ಪವರ್‌ ಕೊಟ್ಟಿದ್ದು ಈ ಟವರ್‌’ ಎಂದಾಗ ವೇದಿಕೆಯಲ್ಲಿದ್ದ ಅಭಿಮಾನಿಗಳ ಹರ್ಷ ಮುಗಿಲುಮುಟ್ಟಿತು.

ಹೌದು, ಪುನೀತ್‌ರಾಜಕುಮಾರ್‌ ಅವರನ್ನು ಪವರ್‌ಸ್ಟಾರ್‌ ಎಂದು ಕರೆದರೆ ಚೆನ್ನಾಗಿರುತ್ತದೆ ಎಂದಿದ್ದ ಶಿವರಾಜಕುಮಾರ್‌ ಅಂತೆ. ಈ ವಿಷಯವನ್ನು “ಅಂಜನಿಪುತ್ರ’ ವೇದಿಕೆಯಲ್ಲಿ ಸ್ವತಃ ಶಿವರಾಜಕುಮಾರ್‌ ಹಂಚಿಕೊಂಡರು. “ಚಿಕ್ಕಂದಿನಿಂದಲೇ ಅಪ್ಪು ತುಂಬಾ ಆ್ಯಕ್ಟೀವ್‌.

ಎಲ್ಲರಿಗಿಂತ ಆತ ಡಿಫ‌ರೆಂಟ್‌ ಆಗಿದ್ದ. ತನ್ನ 6ನೇ ವಯಸ್ಸಿಗೆ ರಾಷ್ಟ್ರಪ್ರಶಸ್ತಿ ಪಡೆದ ಖ್ಯಾತಿ ಅವನಿಗಿದೆ. ಅಪ್ಪು ಪವರ್‌ ಇದ್ದಂತೆ. ಆತನ ಟ್ಯಾಲೆಂಟ್‌, ಎನರ್ಜಿ ನೋಡಿ “ಪವರ್‌ಸ್ಟಾರ್‌’ ಟೈಟಲ್‌ ಇಟ್ಟರೆ ಚೆನ್ನಾಗಿರುತ್ತದೆ ಎಂದಿದ್ದೆ. ಅದರಂತೆ ಆತ ಬೆಳೆಯುತ್ತಿದ್ದೇನೆ’ ಎನ್ನುತ್ತಾ ತಮ್ಮನ ಜೊತೆ ಎರಡು ಸ್ಟೆಪ್‌ ಹಾಕಿದರು ಶಿವಣ್ಣ.