ಪ್ರತಿ ಕಾಮಗಾರಿಯಲ್ಲೂ ಕಳಪೆ, ಅವ್ಯವಸ್ಥೆ ದರ್ಶನ

ಕೋಲಾರ: ನಗರ ಸಂಚಾರ ನಡೆಸುವ ಮೂಲಕ ನಾಗರಿಕರ ಸಮಸ್ಯೆಗಳನ್ನು ಖುದ್ದು ವೀಕ್ಷಿಸಿದ ಸಚಿವ ಕೃಷ್ಣಬೈರೇಗೌಡ ನಗರಸಭೆ ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು.

ನಗರಸಭೆ ವ್ಯಾಪ್ತಿಯಲ್ಲಿ ಸಾರ್ವಜನಿಕರಿಂದ ಹಲವು ದೂರುಗಳು ಕೇಳಿ ಬಂದಿರುವ ಹಿನ್ನೆಲೆಯಲ್ಲಿ ಸಚಿವರು ಸೋಮವಾರ ಖುದ್ದು ವೀಕ್ಷಣೆಗೆ ಆಗಮಿಸಿ ನಗರದಲ್ಲಿ ಸಂಚಾರ ನಡೆಸಿದಾಗ ಸಮಸ್ಯೆಗಳ ದರ್ಶನವಾಯಿತು.

ಮೊದಲಿಗೆ ಶಾಸಕ ಕೆ.ಶ್ರೀನಿವಾಸಗೌಡರ ನಿವಾಸಕ್ಕೆ ಭೇಟಿ ನೀಡಿದ ಉಸ್ತುವಾರಿ ಸಚಿವರು, ನಗರದಲ್ಲಿನ ಸಮಸ್ಯೆಗಳ ಕುರಿತು ಚರ್ಚಿಸಿದ ಬಳಿಕ ಚಿಕ್ಕಚನ್ನಂಜಪ್ಪಶೆಟ್ಟಿ ಉದ್ಯಾನಕ್ಕೆ ತೆರಳಿದರು. ಆ ಬಳಿಕ ನಗರದ ಆರ್‌ಜಿ ಬಡಾವಣೆಯಲ್ಲಿ ನಡೆಯುತ್ತಿರುವ ರಾಜಕಾಲುವೆ ಕಾಮಗಾರಿ, ಕೋಡಿ ಕಣ್ಣೂರು ಕೆರೆ, ಅರಹಳ್ಳಿ ರಸ್ತೆಯ ಬಳಿ ನಿರ್ಮಿಸುತ್ತಿರುವ ಕಾಲುವೆಗಳನ್ನು ವೀಕ್ಷಿಸಿದರು.

ತೀವ್ರ ಅಸಮಾಧಾನ: ಪ್ರತಿಯೊಂದು ಕಡೆಯಲ್ಲಿಯೂ ಅವ್ಯವಸ್ಥೆ ಕಂಡುಬಂದ ಹಿನ್ನೆಲೆಯಲ್ಲಿ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು. ಅಧಿಕಾರಿಗಳು ಬದಲಾಗದಿದ್ದರೆ ಸಹಿಸಿಕೊಂಡು ಸುಮ್ಮನಿರಲು ಸಾಧ್ಯವಿಲ್ಲ, ಕಠಿಣ ಕ್ರಮ ಅನಿವಾರ್ಯವಾಗುತ್ತದೆ ಎಂದು ಎಚ್ಚರಿಸಿದರು.

ಮಂಗನಂತೆ ಮಾತನಾಡಬೇಡಿ: ಇತ್ತೀಚೆಗಷ್ಟೇ ಉದ್ಘಾಟನೆಗೊಂಡಿರುವ ಮಹಾಲಕ್ಷ್ಮಿ ಬಡಾವಣೆಯಲ್ಲಿನ ಚಿಕ್ಕಚನ್ನಂಜಪ್ಪಶೆಟ್ಟಿ ಉದ್ಯಾನಕ್ಕೆ ತೆರಳಿದ ಕೃಷ್ಣಬೈರೇಗೌಡ, ಮಕ್ಕಳ ಆಟದ ಸಾಮಗ್ರಿಗಳು, ಶೌಚಾಲಯಗಳು ಸಾರ್ವಜನಿಕ ಬಳಕೆಗೆ ನೀಡದಿರುವುದು ಬೆಳಕಿಗೆ ಬಂದಿತು. ಇದರ ಜತೆಗೆ ಕಾಂಪೌಂಡ್‌ ಗೋಡೆಯಲ್ಲಿ 2 ಕಡೆ ಕಲ್ಲುಗಳನ್ನು ಕಿತ್ತು ಹಾಕಲಾಗಿತ್ತು. ಶೌಚಾಲಯದಲ್ಲಿ ಅರ್ಧ ಕೆಲಸ ಬಾಕಿ ಇದ್ದುದು, ಬೀಗ ಹಾಕಿದ್ದನ್ನು ಕಂಡು ಗುತ್ತಿಗೆದಾರನ ವಿರುದ್ಧ ಕಿಡಿಕಾರಿದರು. ಉದ್ಘಾಟನೆಯಾಗಿದೆ ಎಂದು ಹೇಳುತ್ತಿದ್ದೀರಿ ಯಾವ ಕೆಲಸವೂ ಇಲ್ಲಿ ಸರಿಯಾಗಿ ಆಗಿಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ನಗರದಲ್ಲಿ ನಡೆಯುತ್ತಿರುವ ಉಳಿದ ಕಾಮಗಾರಿಗಳು ಗುಣಮಟ್ಟದಿಂದ ಕೂಡಿರಬೇಕು ಎಂದು ಸೂಚಿಸಿದ ಅವರು, ಕಳಪೆ ಕೆಲಸ ಮಾಡಿ ನಾಗರಿಕರ ಆಕ್ರೋಶಕ್ಕೆ ತುತ್ತಾಗದಿರಿ, ನಿಮಗೆ ಅದಕ್ಕಿಂತ ಕೆಲಸವೇನಿದೆ ಎಂದು ಪ್ರಶ್ನಿಸಿದರು.

ಈ ಸಂದರ್ಭದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಕೃಷ್ಣಬೈರೇಗೌಡ, ಕೋಲಾರವು ಇಷ್ಟು ಬೆಳೆದಿದ್ದರೂ ಬೇರೆ ಪಟ್ಟಣಗಳಿಗೆ ಹೋಲಿಸಿದರೆ ಅಭಿವೃದ್ಧಿಯಾಗಿಲ್ಲ. ಜಿಲ್ಲಾ ಕೇಂದ್ರದಂತೆ ಇಲ್ಲದಿರುವುದು ದುರದೃಷ್ಠಕರ. ಇದರಲ್ಲಿ, ಅಧಿಕಾರಿಗಳು, ಜನಪ್ರತಿನಿಧಿಗಳ ತಪ್ಪು ಇದೆ ಎಲ್ಲವನ್ನು ಬಗೆಹರಿಸಿ ಸುಧಾರಣೆ ಮಾಡಲಾಗುವುದು ಎಂದು ಹೇಳಿದರು.

ಯರಗೋಳ್‌ ಯೋಜನೆಯಡಿ ಕುಡಿಯುವ ನೀರನ್ನು ಒಂದು ವರ್ಷದ ಒಳಗಾಗಿ ನೀಡಲು ಆರಂಭ ಮಾಡಲು ತೀರ್ಮಾನಿಸಲಾಗಿದೆ ಎಂದು ಕೃಷ್ಣಬೈರೇಗೌಡ ತಿಳಿಸಿದರು.

ಕೋಲಾರ ನಗರದಲ್ಲಿ 4 ಓವರ್‌ಹೆಡ್‌ ಟ್ಯಾಂಕ್‌ ಮತ್ತು 6 ಕಿಮೀ ಪೈಪ್‌ಲೈನ್‌ ಕೆಲಸ ಬಾಕಿ ಇದ್ದು, 6 ತಿಂಗಳ ಒಳಗೆ ಪೂರ್ಣಗೊಳಿಸಲು ಅಗತ್ಯ ಕ್ರಮಕೈಗೊಳ್ಳಲಾಗುವುದು. ಅಲ್ಲದೆ ಕೋಲಾರಮ್ಮ ಕೆರೆಗೆ ವರ್ಷದೊಳಗೆ ಕೆ.ಸಿ.ವ್ಯಾಲಿ ನೀರು ಹರಿಯಲಿದ್ದು, ಪುನಶ್ಚೇತನಗೊಳಿಸಿ ಸುತ್ತಲೂ ವಾಕಿಂಗ್‌ ಟ್ರಾಕ್‌ ನಿರ್ಮಿಸಲು ಅಗತ್ಯ ಕ್ರಮಕೈಗೊಳ್ಳಲಾಗುವುದು ಎಂದರು.