ಶಿಲಾನ್ಯಾಸ ಮಾಡಿದ್ದನ್ನು ನಾವೇ ಉದ್ಘಾಟಿಸುವುದು ಸಂಕಲ್ಪ : ಪ್ರಧಾನಿ ಮೋದಿ

ಧಾರವಾಡ: ಐಐಟಿ ಧಾರವಾಡ ಬಿಜೆಪಿಯ ‘ಸಂಕಲ್ಪ ಸೇ ಸಿದ್ಧಿಗೆ’ ಉದಾಹರಣೆ. ಸುಮಾರು 4 ವರ್ಷಗಳ ಹಿಂದೆ, ನಾನು ಈ ಸಂಸ್ಥೆಯ ಅಡಿಗಲ್ಲನ್ನು ಹಾಕಿದ್ದೆ, ಕೋವಿಡ್ ಹೊರತಾಗಿಯೂ, ಐಐಟಿಯನ್ನು ಭವಿಷ್ಯದ ಸಂಸ್ಥೆಯಾಗಿ ನಿರ್ಮಿಸಲಾಗಿದೆ. ಶಿಲಾನ್ಯಾಸದಿಂದ ಉದ್ಘಾಟನೆಯವರೆಗೂ ಡಬಲ್ ಇಂಜಿನ್ ಸರಕಾರ ಹೆಚ್ಚಿನ ವೇಗದಲ್ಲಿ ಕೆಲಸ ಮಾಡುತ್ತಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದರು.

ಧಾರವಾಡದಲ್ಲಿ ಐಐಟಿ ಲೋಕಾರ್ಪಣೆ ಗೊಳಿಸಿ, ವಿವಿಧ ಅಭಿವೃದ್ಧಿ ಯೋಜನೆಗಳ ಶಂಕುಸ್ಥಾಪನೆ ಮತ್ತು ಲೋಕಾರ್ಪಣೆ ಮಾಡಿ ಮಾತನಾಡಿದ ಪ್ರಧಾನಿ ಮೋದಿ, ”ಶಿಲಾನ್ಯಾಸ ಮಾಡಿದ್ದನ್ನು ನಾವೇ ಉದ್ಘಾಟಿಸುವುದು ಸಂಕಲ್ಪ” ಎಂದರು. ”ಬಿಜೆಪಿಯ ಡಬಲ್ ಇಂಜಿನ್ ಸರಕಾರಗಳು ಕರ್ನಾಟಕದ ಪ್ರತಿ ಜಿಲ್ಲೆ, ಪ್ರತಿ ಹಳ್ಳಿ ಮತ್ತು ಪ್ರತಿ ಪಟ್ಟಣದ ಸಂಪೂರ್ಣ ಅಭಿವೃದ್ಧಿಗೆ ಪ್ರಾಮಾಣಿಕ ಪ್ರಯತ್ನಗಳನ್ನು ಮಾಡುತ್ತಿದೆ. ಇಂದು ಧಾರವಾಡದ ಈ ನೆಲದಲ್ಲಿ ಅಭಿವೃದ್ಧಿಯ ಹೊಸ ಹೊಳೆ ಹೊರಹೊಮ್ಮುತ್ತಿದ್ದು, ಹುಬ್ಬಳ್ಳಿ-ಧಾರವಾಡ ಸೇರಿ ಇಡೀ ಕರ್ನಾಟಕದ ಭವಿಷ್ಯಕ್ಕೆ ನೀರುಣಿಸುವ ಕೆಲಸ ಮಾಡಲಿದೆ” ಎಂದರು.

ಸಂಪರ್ಕದ ವಿಷಯದಲ್ಲಿ ಕರ್ನಾಟಕ ಇಂದು ಮತ್ತೊಂದು ಮೈಲಿಗಲ್ಲನ್ನು ಮುಟ್ಟಿದೆ.ಈಗ ಸಿದ್ದಾರೂಢ ಸ್ವಾಮೀಜಿ ನಿಲ್ದಾಣವು ವಿಶ್ವದ ಅತಿದೊಡ್ಡ ವೇದಿಕೆಯನ್ನು ಹೊಂದಿದೆ.ಇದು ನಾವು ಮೂಲಸೌಕರ್ಯಕ್ಕೆ ಆದ್ಯತೆ ನೀಡುವ ಚಿಂತನೆಯ ವಿಸ್ತರಣೆಯಾಗಿದೆ ಎಂದರು.

ಶುದ್ಧ ಕುಡಿಯುವ ನೀರು ಒದಗಿಸಲು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಒಟ್ಟಾಗಿ ಕೆಲಸ ಮಾಡುತ್ತಿವೆ.ಜಲ ಜೀವನ್ ಮಿಷನ್ ಅಡಿಯಲ್ಲಿ 1000 ಕೋಟಿ ರೂ.ಗಳ ಯೋಜನೆಗೆ ಅಡಿಪಾಯ ಹಾಕಲಾಗಿದೆ ಎಂದರು.

ನಾವು ಏಮ್ಸ್ ಸಂಖ್ಯೆಗಳನ್ನು ಮೂರು ಬಾರಿ ಹೆಚ್ಚಿಸಿದ್ದೇವೆ. ಏಳು ದಶಕಗಳಲ್ಲಿ, ದೇಶವು ಕೇವಲ 380 ವೈದ್ಯಕೀಯ ಕಾಲೇಜುಗಳನ್ನು ಹೊಂದಿತ್ತು. ಕಳೆದ 9 ವರ್ಷಗಳಲ್ಲಿ 250 ಹೊಸ ವೈದ್ಯಕೀಯ ಕಾಲೇಜುಗಳನ್ನು ತೆರೆಯಲಾಗಿದೆ ಎಂದರು.

2014ರವರೆಗೂ ಬಹಳಷ್ಟು ಜನರಿಗೆ ಮನೆಗಳು ಇರಲಿಲ್ಲ. ಶೌಚಾಲಯ, ಆಸ್ಪತ್ರೆಗಳ ಕೊರತೆಯಿದ್ದು, ಚಿಕಿತ್ಸೆ ದುಬಾರಿಯಾಗಿತ್ತು.ನಾವು ಪ್ರತಿಯೊಂದು ಸಮಸ್ಯೆಗೆ ಕೆಲಸ ಮಾಡಿದ್ದೇವೆ, ಜನರ ಜೀವನವನ್ನು ಆರಾಮದಾಯಕವಾಗಿಸಿದ್ದೇವೆ ಎಂದರು.

ಉತ್ತಮ ಮತ್ತು ಆಧುನಿಕ ಮೂಲಸೌಕರ್ಯವು ಸಾಮಾನ್ಯ ಜನರ ಜೀವನವನ್ನು ಸುಲಭಗೊಳಿಸುತ್ತದೆ. ಕಳೆದ 9 ವರ್ಷಗಳಲ್ಲಿ ಪ್ರಧಾನಮಂತ್ರಿ ಸಡಕ್ ಯೋಜನೆಯಡಿ ಗ್ರಾಮಗಳಲ್ಲಿ ರಸ್ತೆಗಳ ಜಾಲ ದ್ವಿಗುಣಗೊಂಡಿದೆ.ರಸ್ತೆಗಳಷ್ಟೇ ಅಲ್ಲ, ವಿಮಾನ ನಿಲ್ದಾಣಗಳು ಮತ್ತು ರೈಲ್ವೆಗಳಿಗಾಗಿ ಅಭೂತಪೂರ್ವ ವಿಸ್ತರಣೆಯನ್ನು ಮಾಡಲಾಗುತ್ತಿದೆ ಎಂದರು.

ರಾಹುಲ್ ಗಾಂಧಿಗೆ ಟಾಂಗ್

ಭಗವಾನ್ ಬಸವೇಶ್ವರರ ಕೊಡುಗೆ ನಾಡಿಗೆ ಅಪಾರವಾದದ್ದು , ವಿಶ್ವವೇ ಅವರ ವಿಚಾರಗಳನ್ನು, ತತ್ವಗಳ ಬಗ್ಗೆ ಅಧ್ಯಯನ ನಡೆಸುತ್ತಿದೆ. ಲಂಡನ್ ನಲ್ಲಿ ಅವರ ಪ್ರತಿಮೆ ನಿರ್ಮಾಣ ಮಾಡಿ ಗೌರವಿಸಲಾಗಿದೆ. ಆದರೆ ಕೆಲವರು ಲಂಡನ್ ನಲ್ಲಿ ಭಾರತದ ಕುರಿತು ಅವಮಾನ ಮಾಡಿದರು. ಇದು ಬಸವೇಶ್ವರರಿಗೆ ಮಾಡಿದ ಅವಮಾನ. ಯಾರಿಗೂ ದೇಶದ ಅವಮಾನ ಮಾಡುವ ಹಕ್ಕು ಇಲ್ಲ ಎಂದು ಪರೋಕ್ಷವಾಗಿ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ವಿರುದ್ಧ ಕಿಡಿ ಕಾರಿದರು.