ಯುನೆಸ್ಕೊ ಸೃಜನಾತ್ಮಕ ನಗರಗಳಲ್ಲಿ ಚೆನ್ನೈಗೆ ಸ್ಥಾನ

ಚೆನ್ನೈ: ಯುನೆಸ್ಕೊ ಸೃಜನಾತ್ಮಕ ನಗರಗಳ ಪಟ್ಟಿಯಲ್ಲಿ ತಮಿಳುನಾಡು ರಾಜಧಾನಿ ಚೆನ್ನೈ ಸ್ಥಾನ ಪಡೆದಿದೆ. ಜಾಗತಿಕ ಮಟ್ಟದಲ್ಲಿ ಸಂಗೀತ ಕ್ಷೇತ್ರದಲ್ಲಿ ಮಹತ್ತರ ಕೊಡುಗೆಗಳನ್ನು ನೀಡುತ್ತಿರುವ ಕಾರಣ ಚೆನ್ನೈ ಈ ಅರ್ಹತೆ ಪಡೆದಿದೆ ಎಂದು ಯುನೆಸ್ಕೊ ಹೇಳಿದೆ.

ಈ ವಾರಾರಂಭದಲ್ಲಿ ಯುನೆಸ್ಕೊ 44 ದೇಶಗಳ 64 ನಗರಗಳನ್ನು ಸೃಜನಾತ್ಮಕ ನಗರ ಪಟ್ಟಿಗಾಗಿ ಆಯ್ಕೆ ಮಾಡಿತ್ತು. ಈ ಪಟ್ಟಿಯಲ್ಲಿ ಸ್ಥಾನ ಪಡೆದ ಭಾರತೀಯ ನಗರಗಳ ಪೈಕಿ ಚೆನ್ನೈ 3ನೇ ನಗರ. ಇದಕ್ಕೂ ಮೊದಲು ಜೈಪುರ ಮತ್ತು ವಾರಾಣಸಿ ನಗರಗಳು ಸ್ಥಾನ ಪಡೆದಿದ್ದವು.

ನಾವೀನ್ಯತೆ ಮತ್ತು ಸೃಜನಾತ್ಮಕತೆಗಳನ್ನು ಒಳಗೊಂಡ ಸುಸ್ಥಿರ ನಗರಾಭಿವೃದ್ಧಿಯನ್ನು ಉತ್ತೇಜಿಸುವ ಸಲುವಾಗಿ ಯುನೆಸ್ಕೊ ಈ ಯೋಜನೆ ಹಾಕಿಕೊಂಡಿದೆ. ಇದಕ್ಕಾಗಿ ಜಾಗತಿಕ ಮಟ್ಟದಲ್ಲಿ ಸೃಜನಾತ್ಮಕ ನಗರಗಳ ಜಾಲವನ್ನು ತಯಾರು ಮಾಡುತ್ತಿದೆ. ಈ ಯೋಜನೆಗೆ ಸ್ಥಳೀಯ ಆಡಳಿತದ ಸಹಕಾರ ದೊರಕಲಿದೆ ಎಂದು ಯುನೆಸ್ಕೊ ಹೇಳಿದೆ. ಸೃಜನಾತ್ಮಕ ನಗರ ಪಟ್ಟಿಗೆ ಚೆನ್ನೈ ಸೇರಿರುವುದಕ್ಕೆ ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್‌ ಅಭಿನಂದನೆ ಸಲ್ಲಿಸಿದ್ದಾರೆ.