ನಾಯಿ-ಮಂಗಗಳ ಹಾವಳಿಯಿಂದ ಕಂಗಾಲಾದ ಗ್ರಾಮಸ್ಥರು  

ಬೆಟಗೇರಿ: ಗ್ರಾಮದ ಬಸ್‌ ನಿಲ್ದಾಣ, ವಿವಿಧ ವೃತ್ತದ ಅಕ್ಕ-ಪಕ್ಕ ಹಾಗೂ ಮನೆಗಳ ಚಾವಣಿ ಮೇಲೆ ಮಂಗಗಳು ಮತ್ತು ಬಿಡಾಡಿ ನಾಯಿಗಳ ಹಾವಳಿ ಹೆಚ್ಚಾಗಿದ್ದು, ಸ್ಥಳೀಯರು ಆತಂಕಕ್ಕೀಡಾಗಿದ್ದಾರೆ.

ಬೆಟಗೇರಿ ಗ್ರಾಮ ಸುತ್ತಲಿನ ಹತ್ತೂರಿನ ಹಳ್ಳಿಗಳ ವ್ಯಾಪಾರ ವಹಿವಾಟು ಕೇಂದ್ರ ಸ್ಥಾನವಾಗಿದೆ. ಗ್ರಾಮಕ್ಕೆ ನಿತ್ಯ ಆಗಮಿಸುವ ವಾಹನ ಸವಾರರು ಮಂಗಗಳು ಮತ್ತು ಬಿಡಾಡಿ ನಾಯಿಗಳ ಅಡ್ಡಾದಿಡ್ಡಿ ಓಡಾಟಕ್ಕೆ ಹೆದರಿ ನಿಧಾನ ಇಲ್ಲವೇ ಪ್ರಾಣ ಭಯದಲ್ಲಿ ಸಂಚರಿಸುವಂತಾಗಿದೆ.

ಮನೆಗಳ ಚಾವಣಿ ಮೇಲೆ ಹಾರುವ ಮಂಗಗಳು, ಅಲ್ಲಿರುವ ಟಿವಿ ಡಿಟಿಎಚ್‌ ಸೆಟ್‌ಗಳನ್ನು ಹಾಳುಗೆಡಹುತ್ತಿವೆ. ಮನೆ ಹೆಂಚು, ಪತ್ರಾಸ್‌ ಒಡೆದು ಹಾನಿ ಮಾಡುತ್ತಿರುವ ಈ ಮಂಗಗಳ ಉಪಟಳದಿಂದ ಸ್ಥಳೀಯರು ಬೇಸತ್ತು ಹೋಗಿದ್ದಾರೆ. ಬಿಡಾಡಿ ನಾಯಿಗಳು ಮನೆ ಪಕ್ಕದ ಕೊಟ್ಟಿಗೆಯಲ್ಲಿನ ಎಳೆಕರು, ಕುರಿ ಮರಿಗಳನ್ನು ಕಚ್ಚಿ ಗಾಯಗೊಳಿಸಿದ, ತೀವ್ರ ಗಾಯದಿಂದ ಮರಿಗಳು ಮೃತಪಟ್ಟ ಸಾಕಷ್ಟು ಉದಾಹರಣೆಗಳಿವೆ.

ಸಂಬಂಧಪಟ್ಟ ಇಲಾಖೆ ಅಧಿಕಾರಿಗಳು ಮಂಗ ಮತ್ತು ನಾಯಿಗಳ ಉಪಟಳಕ್ಕೆ ಕಡಿವಾಣ ಹಾಕಲು ಶೀಘ್ರ ಕ್ರಮ ಕೈಗೊಳ್ಳಬೇಕೆಂದು ಸ್ಥಳೀಯರು ಆಗ್ರಹಿಸಿದ್ದಾರೆ.