ಪ್ರಾಣಿಗಳ ಮಾನವೀಯತೆ : ನಾಯಿ ಮರಿಗಳಿಗೆ ಹಾಲುಣಿಸಿ ಮಾತೃಪ್ರೇಮ ಮೆರೆದ ತಾಯಿ ಹಂದಿ

ಮುದ್ದೇಬಿಹಾಳ: ಹಂದಿಗಳು ಸಾಮಾನ್ಯವಾಗಿ ನಾಯಿ ಮರಿಗಳನ್ನು ಕಂಡರೆ ಎಳೆದಾಡಿ ಸಾಯಿಸಿ ಅವುಗಳ ಎಳೇಯ ಮಾಂಸ ತಿನ್ನುವುದನ್ನು ಹಲವೆಡೆ ಕಂಡಿದ್ದೇವೆ, ಕೇಳಿದ್ದೇವೆ. ಆದರೆ ಇದಕ್ಕೆ ಅಪವಾದ ಎನ್ನುವಂತೆ ಇಲ್ಲೊಂದು ತಾಯಿ ಹಂದಿ ನಾಯಿ ಮರಿಗಳಿಗೆ ತನ್ನ ಮೊಲೆ ಹಾಲು ಕುಡಿಸಿ ಮಾತೃಪ್ರೇಮ ಮೆರೆದು ಮಾನವೀಯತೆಗೆ ಮನುಷ್ಯರನ್ನೇ ಅಣಕಿಸುವ ಘಟನೆ ಬೆಳಕಿಗೆ ಬಂದಿದೆ.

ವಿಜಯಪುರ ಜಿಲ್ಲೆ ಮುದ್ದೇಬಿಹಾಳ ಪಟ್ಟಣದ ಮಹಾಂತೇಶ ನಗರದಲ್ಲಿ ಈ ಮಾನವೀಯತೆಗೆ ವರಾಹದ ಮಾತೃಪ್ರೇಮ ಸಾಕ್ಷಿಯಾಗಿದೆ. ಇಲ್ಲಿ ಹಂದಿಯೊಂದು ಮೂರು ನಾಯಿ ಮರಿಗಳಿಗೆ ಆಗಾಗ ತನ್ನ ಮೊಲೆ ಹಾಲು ಕುಡಿಸುತ್ತಿದೆ. ಮರಿಗಳಿಗೆ ಜನ್ಮ ನೀಡಿದ ತಾಯಿ ನಾಯಿ ಎಲ್ಲೋ ಮರೆಯಾಗಿದೆ. ಅಲ್ಲೆ ಸುತ್ತಾಡುತ್ತಿದ್ದ ಹಂದಿಯೊಂದು ಮಾತ್ರ ಈ ಮರಿಗಳಿಗೆ ಹಾಲುಣಿಸುತ್ತದೆ.

ಈ ತಾಯಿ ಹಂದಿಯ ನವಜಾತ ಮರಿಗಳನ್ನು ಬೀದಿ ನಾಯಿಗಳು ಎಳೆದಾಡಿ ಸಾಯಿಸಿವೆ ಎಂದು ಅಲ್ಲಿನ ನಿವಾಸಿಗಳು ಹೇಳುತ್ತಿದ್ದಾರೆ.

ಈ ದೃಶ್ಯವನ್ನು ಅಲ್ಲಿನ ನಿವಾಸಿ, ಎಂಜಿನಿಯರ್ ಅನಿಲ್ ಕುಲಕರ್ಣಿ ಅವರು ತಮ್ಮ ಮೊಬೈಲದಲ್ಲಿ ಸೆರೆ ಹಿಡಿದಿದ್ದಾರೆ. ಸಹಜವಾಗಿ ಮನುಷ್ಯನನ್ನು ಕಂಡರೆ ಮನುಷ್ಯನಿಗೇ ಆಗಿ ಬಾರದ ಪರಿಸ್ಥಿತಿ ಇರುವಾಗ ಮಾತು ಬಾರದ ಈ ಮೂಕ ಪ್ರಾಣಿಗಳ ಬಾಂಧವ್ಯ ಬಡಾವಣೆಯ ನಿವಾಸಿಗಳಿಗೆ ಮಾತನಾಡಿಕೊಳ್ಳುವ ವಿಷಯ ವಸ್ತುವಾಗಿದೆ ಎನ್ನುತ್ತಾರೆ ಇಂಜಿನೀಯರ್ ಅನೀಲ ಕುಲಕರ್ಣಿ.