ಪುತ್ತೂರು: ಇವರು ವೃತ್ತಿಯಲ್ಲಿ ಫೋಟೋಗ್ರಾಫರ್: ಪ್ರವೃತ್ತಿಯಲ್ಲಿ ಮೂರ್ತಿ ತಯಾರಕ..!

ಪುತ್ತೂರು: ಕಳೆದ 33 ವರ್ಷಗಳಿಂದ 200 ಕ್ಕೂ ಅಧಿಕ ಮಣ್ಣಿನ ಗಣೇಶ ಮೂರ್ತಿ ತಯಾರಿಸಿರುವ ಪುತ್ತೂರಿನ ಫೋಟೋಗ್ರಾಫರ್ ಶ್ರೀನಿವಾಸ ಪ್ರಭು ಅವರದ್ದು ತೆರೆಮರೆಯ ಪ್ರತಿಭೆ. ಯಾವುದೇ ಪ್ರಚಾರ ಬಯಸದೆ ತನ್ನ ಪಾಡಿಗೆ ತಾನು ಮೂರ್ತಿ ರಚಿಸುವುದು ಪ್ರಭು ಅವರ ವಿಶೇಷತೆ.

ತಾನೇ ಕಲಿತರು..! :

ಮೂಲತಃ ಅಡ್ಯನಡ್ಕದವರಾಗಿರುವ ಪ್ರಭು ಗಣಪತಿ ಮೂರ್ತಿ ತಯಾರಿಕೆಯನ್ನು ಯಾರಿಂದಲೂ ಕಲಿತಿಲ್ಲ. ತಾನೇ ಸ್ವಂತ ಅಭ್ಯಸಿಸಿದರು. ಉಪ್ಪಿನಂಗಡಿಯಲ್ಲಿ ಮೂರ್ತಿ ತಯಾರಿಕೆ ಪ್ರಾರಂಭಿಸಿದರು. ಅದಾದ ಬಳಿಕ ಪುತ್ತೂರಿನಲ್ಲಿ ಈ ಕಾಯಕ ಮುಂದುವರಿಯಿತು. ತನ್ನ ವೃತ್ತಿಯೊಂದಿಗೆ ಗಣೇಶ ಚತುರ್ಥಿ ಸಂದರ್ಭದಲ್ಲಿ ಮೂರ್ತಿ ತಯಾರಿಸುತ್ತಾರೆ. ಬೇಡಿಕೆಗೆ ತಕ್ಕಂತೆ ಪ್ರತಿ ವರ್ಷ 7 ರಿಂದ 9 ಮೂರ್ತಿ ತಯಾರಿಸುತ್ತಾರೆ. ಕಳೆದ ಹಲವು ವರ್ಷಗಳಿಂದ ಬೊಳುವಾರಿನ ಬಾಬುರಾಯರ ಹೊಟೇಲ್‌ ಹಿಂಭಾಗದ ಕೊಠಡಿಯಲ್ಲಿ ಮೂರ್ತಿ ನಿರ್ಮಿಸಿ ನೀಡುತ್ತಿದ್ದು ಅದಕ್ಕೆ ಬೇಕಾದ ಮಣ್ಣನ್ನು ಬೇರೆ ಕಡೆಗಳಿಂದ ಸಂಗ್ರಹಿಸುತ್ತಾರೆ.