ಪಾಕಿಸ್ತಾನದಲ್ಲಿ ಗಗನಕ್ಕೇರಿದ ಪೆಟ್ರೋಲ್, ಡೀಸೆಲ್ ಬೆಲೆ

ಇಸ್ಲಾಮಾಬಾದ್‌: ಭಾರತದ ನೆರೆಯ ರಾಷ್ಟ್ರ ಶ್ರೀಲಂಕಾ ಈಗಾಗಲೇ ಆರ್ಥಿಕವಾಗಿ ದಿವಾಳಿಯಾಗಿದೆ. ಪಾಕಿಸ್ತಾನವೂ ನಿಧಾನಕ್ಕೆ ದಿವಾಳಿಯಂಚಿಗೆ ಹೋಗುತ್ತಿದೆ. ಅದನ್ನು ತಡೆಯಲು ಅದು ತನ್ನಿಂದ ಸಾಧ್ಯವಿರುವ ಎಲ್ಲವನ್ನೂ ಮಾಡಲು ಮುಂದಾಗಿದೆ.

ಈ ಹಿನ್ನೆಲೆಯಲ್ಲಿ ಪೆಟ್ರೋಲಿಯಂನ ಎಲ್ಲ ಉತ್ಪನ್ನಗಳ ಮೇಲೆ ಪ್ರತಿ ಲೀ.ಗೆ 14ರಿಂದ 19 ರೂ.ವರೆಗೆ ಬೆಲೆಯೇರಿಸಿದೆ. ಇದರಿಂದ ಸಹಜವಾಗಿ ಪೆಟ್ರೋಲ್‌, ಡೀಸೆಲ್‌ಗ‌ಳ ಬೆಲೆ ಗಗನಕ್ಕೇರಿದೆ. ಇದರಿಂದ ಜನರಲ್ಲಿ ಉಂಟಾಗುವ ಆಕ್ರೋಶವನ್ನು ಆ ದೇಶ ಹೇಗೆ ನಿಭಾಯಿಸುತ್ತದೆ ಎಂದು ಕಾದು ನೋಡಬೇಕು.

ಪೆಟ್ರೋಲ್‌ ಮೇಲೆ 10 ರೂ., ಅತಿವೇಗದ ಡೀಸೆಲ್‌, ಸೀಮೆ ಎಣ್ಣೆ, ಲಘು ಡೀಸೆಲ್‌ ಮೇಲೆ ತಲಾ 5 ರೂ. ಬೆಲೆಯೇರಿಕೆ ಮಾಡಿದೆ. ಇದರಿಂದ ಪೆಟ್ರೋಲ್‌ ಬೆಲೆ ಲೀ.ಗೆ 248.74 ರೂ., ಡೀಸೆಲ್‌ ಬೆಲೆ 276.54 ರೂ., ಸೀಮೆ ಎಣ್ಣೆ ಬೆಲೆ 230.26, ಡೀಸೆಲ್‌ ಬೆಲೆ 226.15 ರೂ.ಗಳಿಗೆ ಮುಟ್ಟಿದೆ.

ಇದನ್ನು ಪಾಕಿಸ್ತಾನ ಸರ್ಕಾರ ಐಎಂಎಫ್ ನ(ಅಂತಾರಾಷ್ಟ್ರೀಯ ಹಣಕಾಸು ನಿಧಿ) ಸೂಚನೆಯ ಮೇರೆಗೆ ಜಾರಿಗೊಳಿಸಿದೆ. ಆರ್ಥಿಕ ಕುಸಿತ ತಡೆಯಲು ಐಎಂಎಫ್ ನಿಂದ 6 ಬಿಲಿಯನ್‌ ಡಾಲರ್‌ ನೆರವು ನೀಡಬೇಕಾದರೆ, ಪಾಕಿಸ್ತಾನ ಹಲವು ಷರತ್ತುಗಳನ್ನು ಮುಂಚಿತವಾಗಿಯೇ ಜಾರಿ ಮಾಡಬೇಕಾಗುತ್ತದೆ!