ರಫೇಲ್‌ ಹೆಸರಿಂದ ಬೇಸತ್ತ ಜನ!

ಹೊಸದಿಲ್ಲಿ: ರಫೇಲ್‌ ಯುದ್ಧ ವಿಮಾನ ಖರೀದಿ ವಿವಾದದ ತೀವ್ರಗೊಂಡ ಬಳಿಕ ಛತ್ತೀಸ್‌ಗಡ‌ದ ಹಳ್ಳಿಯ ಜನರಿಗೆ ತಮ್ಮೂರಿನ ಹೆಸರನ್ನೂ ಹೇಳಲು ಮುಜುಗರವಾಗುವಂಥ ಸ್ಥಿತಿ ನಿರ್ಮಾಣವಾಗಿದೆ. ಇದಕ್ಕೆ ಕಾರಣ, ಆ ಹಳ್ಳಿಯ ಹೆಸರೂ “ರಫೇಲ್‌’!

ಛತ್ತೀಸ್‌ಗಡ‌ದ ಮಹಾಸಮುಂದ್‌ ಲೋಕಸಭಾ ಕ್ಷೇತ್ರದ ಈ ಪುಟ್ಟ ಹಳ್ಳಿಯಲ್ಲಿ 200 ಮನೆಗಳಿವೆಯಷ್ಟೆ. ಆದರೆ, ಇತ್ತೀಚೆಗೆ ತಮ್ಮ ಹಳ್ಳಿಯ ಹೆಸರಿನಿಂದಾಗಿ ಸಾರ್ವಜನಿಕ ಜೀವನದಲ್ಲಿ ತಲೆ ತಗ್ಗಿಸುವಂತಾಗುತ್ತದೆ ಎಂಬುದು ಈ ಹಳ್ಳಿ ಜನರ ಕೂಗು. “ನಮ್ಮ ಹಳ್ಳಿಯಲ್ಲಿ ಈವೆರೆಗೆ ಒಂದೇ ಒಂದು ಪೊಲೀಸ್‌ ಕೇಸು ದಾಖಲಾಗಿಲ್ಲ. ಆದರೆ, ರಫೇಲ್‌ ಕೆಸರೆರಚಾಟದ ನಡುವೆ ಈ ಹಳ್ಳಿಯ ಮರ್ಯಾದೆಗೆ ಕುಂದುಂಟಾಗುತ್ತಿದೆ’ ಎನ್ನುತ್ತಾರೆ ಈ ಹಳ್ಳಿಗರು.

ಧರಮ್‌ ಸಿಂಗ್‌ (83) ಎಂಬ ವಯೋವೃದ್ಧರು ಹೇಳುವ ಪ್ರಕಾರ, “ಈ ಹಳ್ಳಿಯ ಜನರನ್ನು ಅಕ್ಕಪಕ್ಕದ ಹಳ್ಳಿಗರು ಯಾವತ್ತೂ ಕಿಚಾಯಿಸುತ್ತಾರೆ. ಇತ್ತೀಚೆಗೆ ಮುಖ್ಯಮಂತ್ರಿ ಕಚೇರಿಗೂ ನಾವು ಹೋಗಿ ಹಳ್ಳಿಯ ಹೆಸರನ್ನು ಕೂಡಲೇ ಬದಲಾಯಿಸಬೇಕೆಂದು ಅವರ ಬಳಿ ಮನವಿಯನ್ನೂ ಮಾಡಿದ್ದೇವೆ ಮಾಡಿದ್ದೇವೆ” ಎನ್ನುತ್ತಾರೆ.