ಭಾನುವಾರ ಬೆಳಗಾವಿ ಭಣ ಭಣ: ಸಂಪೂರ್ಣ ಸ್ತಬ್ಧವಾದ ಕುಂದಾನಗರಿ

ಬೆಳಗಾವಿ: ಕೋವಿಡ್-19 ಭಾನುವಾರದ ಲಾಕ್ ಡೌನ್ ಹಿನ್ನೆಲೆಯಲ್ಲಿ ಕುಂದಾನಗರಿ ಬೆಳಗಾವಿ ಸಂಪೂರ್ಣ ಸ್ತಬ್ಧವಾಗಿದ್ದು, ನಗರದ ಪ್ರಮುಖ ರಸ್ತೆಗಳಲ್ಲಿ ಜನ ಸಂಚಾರ ಇಲ್ಲದೇ ಬಿಕೋ ಎನ್ನುತ್ತಿವೆ.

ನಗರ ಸೇರಿದಂತೆ ಜಿಲ್ಲೆಯಾದ್ಯಂತ ಸಂಪೂರ್ಣ ಕರ್ಪ್ಯೂ ಆಗಿದ್ದು, ಬಸ್ ಸಂಚಾರ, ಖಾಸಗಿ ವಾಹನಗಳು, ಆಟೋ ರಿಕ್ಷಾ ಓಡಾಟ ಇಲ್ಲ.‌ ಜೊತೆಗೆ ಜನ ಸಂಚಾರ ಇಲ್ಲದೇ ರಸ್ತೆಗಳು ಭಣ ಭಣಗುಟ್ಟುತ್ತಿವೆ. ಇಡೀ ನಗರದಲ್ಲಿ ವ್ಯಾಪಾರ ವಹಿವಾಟು ಸಂಪೂರ್ಣ ಬಂದ್ ಆಗಿದೆ.

ಬೆಳಗ್ಗೆ ಅಗತ್ಯ ವಸ್ತುಗಳಾದ ಹಾಲು ಮಾರಾಟ ಬಿಟ್ಟರೆ ಇನ್ನುಳಿದಂತೆ ಯಾವುದೇ ಅಂಗಡಿಗಳು ತೆರೆದಿಲ್ಲ. ಅಗತ್ಯ ವಸ್ತುಗಳಾದ ದಿನಸಿ, ಔಷಧಿ, ಮಟನ್, ಚಿಕನ್, ಮೀನು ಮಾರಾಟಕ್ಕೆ ಅವಕಾಶ ಇದ್ದರೂ ಇನ್ನೂ ಅಂಗಡಿಗಳು ತೆರೆದಿಲ್ಲ. ಬೆಳಗಾವಿ ನಗರದ ಅಂಗಡಿ ಮುಂಗಟ್ಟುಗಳು ಸಂಪೂರ್ಣವಾಗಿ ಮುಚ್ಚಿವೆ.‌ ಜಿಲ್ಲೆಯಾದ್ಯಂತ ಲಾಕ್ ಡೌನ್ ಗೆ ಬೆಳಗ್ಗೆಯಿಂದಲೇ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ.