ಪಾರ್ಟ್‌ ಟೈಂ ಕೆಲಸ ನೆಪದಲ್ಲಿ ಮಹಿಳೆಗೆ 7 ಲಕ್ಷ ರೂ.ವಂಚನೆ

ಬೆಂಗಳೂರು: ಪಾರ್ಟ್‌ ಟೈಂ ಕೆಲಸ ಹಾಗೂ ಹಣ ಹೂಡಿಕೆ ಮಾಡಿದರೆ ಹೆಚ್ಚಿನ ಹಣ ಬರುತ್ತದೆ ಎಂದು ನಂಬಿಸಿ ಸೈಬರ್‌ ವಂಚಕನೊಬ್ಬ ಮಹಿಳೆಗೆ 7.10 ಲಕ್ಷ ರೂ. ವಂಚಿಸಿದ್ದಾನೆ.

ಈ ಸಂಬಂಧ ಜಕ್ಕೂರು ನಿವಾಸಿ ರಜನಿ (33) ಈಶಾನ್ಯವಿಭಾಗದ ಸೆನ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಮಾ.31ರಂದು ರಜನಿ ಮೊಬೈಲ್‌ಗೆ ಅಪರಿಚಿತ ವ್ಯಕ್ತಿಯೊಬ್ಬ ಪಾರ್ಟ್‌ ಟೈಂ ಕೆಲಸ ಹಾಗೂ ಹಣ ಹೂಡಿಕೆ ಮಾಡಿದರೆ ಹೆಚ್ಚಿನ ಲಾಭ ಬರುತ್ತದೆ ಎಂದು ಸಂದೇಶ ಕಳುಹಿಸಿದ್ದಾನೆ. ಅಲ್ಲದೆ, ಜೀವಿತಾ 22 ಎಂಬ ವಾಟ್ಸ್‌ಆ್ಯಪ್‌ ಗ್ರೂಪ್‌ ಗೂ ರಜಿನಿಯನ್ನು ಸೇರಿಸಿದ್ದಾನೆ. ಬಳಿಕ ರಜನಿಗೆ ಕೆಲ ಟಾಸ್ಕ್ ಗಳನ್ನು ಕೊಟ್ಟು, ಅವುಗಳನ್ನು ಪೂರ್ಣಗೊಳಿಸಿದ ಬಳಿಕ ಹಂತ-ಹಂತವಾಗಿ 7.10 ಲಕ್ಷ ರೂ. ತನ್ನ ಖಾತೆಗೆ ಹಾಕಿಸಿಕೊಂಡು ವಂಚಿಸಿದ್ದಾನೆ. ಅನಂತರ ಕೆಲಸವಾಗಲಿ ಅಥವಾ ಹೂಡಿಕೆ ಹಣವಾಗಲಿ ವಾಪಸ್‌ ನೀಡಿಲ್ಲ. ಅದರಿಂದ ಎಚ್ಚೆತ್ತುಕೊಂಡ ರಜನಿ ಕೂಡಲೇ ಈಶಾನ್ಯ ವಿಭಾಗದ ಸೆನ್‌ ಠಾಣೆಗೆ ದೂರು ನೀಡಿದ್ದಾರೆ. ತನಿಖೆ ಮುಂದುವರಿದಿದೆ ಎಂದು ಪೊಲೀಸರು ಹೇಳಿದರು.