Paris Olympics: ಟೆನಿಸ್‌ ಬಂಗಾರ ಜಯಿಸಿದ ಎಬ್ಡೆನ್-ಪೀಯರ್ ಜೋಡಿ

ಪ್ಯಾರಿಸ್‌: ಆಸ್ಟ್ರೇಲಿಯದ ಮ್ಯಾಟ್‌ ಎಬ್ಡೆನ್ -ಜಾನ್‌ ಪೀಯರ್ ಪ್ಯಾರಿಸ್‌ ಒಲಿಂಪಿಕ್ಸ್‌ ಟೆನಿಸ್‌ ಸ್ಪರ್ಧೆಯ ಪುರುಷರ ಡಬಲ್ಸ್‌ನಲ್ಲಿ ಚಿನ್ನದ ಪದಕ ಜಯಿಸಿದರು. ರೋಚಕ ಹೋರಾಟ ಕಂಡ ಫೈನಲ್‌ನಲ್ಲಿ ಅಮೆರಿಕದ ರಾಜೀವ್‌ ರಾಮ್‌-ಆಸ್ಟಿನ್‌ ಕ್ರಾಜಿಸೆಕ್‌ ವಿರುದ್ಧ 6-7 (6), 7-6 (1), 10-8 ಅಂತರದಿಂದ ಗೆದ್ದು ಬಂದರು.

ಇದು ಒಲಿಂಪಿಕ್ಸ್‌ ಟೆನಿಸ್‌ ಡಬಲ್ಸ್‌ನಲ್ಲಿ ಆಸ್ಟ್ರೇಲಿಯಕ್ಕೆ ಒಲಿದ 2ನೇ ಚಿನ್ನದ ಪದಕ. 1996ರ ಅಟ್ಲಾಂಟ ಗೇಮ್ಸ್‌ ನಲ್ಲಿ ಟಾಡ್‌ ವುಡ್‌ಬ್ರಿಜ್‌-ಮಾರ್ಕ್‌ ವುಡ್‌ಫೋರ್ಡ್‌ ಚಾಂಪಿಯನ್‌ ಆಗಿದ್ದರು.

ಮಿಶ್ರ ಡಬಲ್ಸ್‌:

ಜೆಕ್‌ ಗಣರಾಜ್ಯದ ಕ್ಯಾಥರಿನಾ ಸಿನಿಯಕೋವಾ- ಥಾಮಸ್‌ ಮಶಾಕ್‌ ಮಿಶ್ರ ಡಬಲ್ಸ್‌ ಚಾಂಪಿಯನ್‌ ಆಗಿ ಹೊರಹೊಮ್ಮಿದ್ದಾರೆ. ಫೈನಲ್‌ನಲ್ಲಿ ಇವರು ಚೀನದ ವಾಂಗ್‌ ಕ್ಸಿನ್ಯು-ಜಾಂಗ್‌ ಜಿಜೆನ್‌ ವಿರುದ್ಧ 6-2, 5-7, 10-8 ಅಂತರದ ಜಯ ಸಾಧಿಸಿದರು.