Paris Olympics ;ಅಲ್ಕರಾಜ್ ಮಣಿಸಿ ಚಿನ್ನದ ಪದಕ ಗೆದ್ದು ಕಣ್ಣೀರಿಟ್ಟ ಜೊಕೊವಿಕ್!

ಪ್ಯಾರಿಸ್ : ಒಲಿಂಪಿಕ್ಸ್ ಟೆನಿಸ್ ಪುರುಷರ ಸಿಂಗಲ್ಸ್ ನ ಭಾನುವಾರ (ಆ. 4) ನಡೆದ ಜಿದ್ದಾಜಿದ್ದಿನ ಫೈನಲ್ ಪಂದ್ಯದಲ್ಲಿ ಸೆರ್ಬಿಯಾದ ನೊವಾಕ್ ಜೊಕೊವಿಕ್ ಅವರು ಸ್ಪೇನ್‌ನ ಕಾರ್ಲೋಸ್ ಅಲ್ಕರಾಜ್ ಅವರನ್ನು ಸೋಲಿಸಿ ಚಿನ್ನದ ಪದಕ ಗೆದ್ದುಕೊಂಡರು. ಜೊಕೊವಿಕ್ ಅವರು ಒಂದು ತಿಂಗಳ ಹಿಂದೆ ವಿಂಬಲ್ಡನ್ ಸೋಲಿಗೆ ಸೇಡು ತೀರಿಸಿಕೊಂಡರು.

37 ರ ಹರೆಯದ ಜೊಕೊವಿಕ್ ಅವರು 7-6(3), 7-6(2) ಸೆಟ್‌ಗಳಿಂದ ಅಲ್ಕರಾಜ್‌ರನ್ನು ಸೋಲಿಸಿದರು. ಜೊಕೊವಿಕ್ ಅವರು ತಮ್ಮ ವೃತ್ತಿಜೀವನದಲ್ಲಿ ಮೊದಲ ಬಾರಿಗೆ ಒಲಿಂಪಿಕ್ ಚಿನ್ನವನ್ನು ಗೆದ್ದ ದಾಖಲೆ ಬರೆದು 24 ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿಗಳ ಪಟ್ಟಿಗೆ ಇದನ್ನೂ ಸೇರಿಸಿ 25 ರ ಸಂಭ್ರಮ ಆಚರಿಸಿಕೊಂಡರು. ಅಲ್ಕರಾಜ್ ತನ್ನ ಚೊಚ್ಚಲ ಒಲಿಂಪಿಕ್ಸ್‌ನಲ್ಲಿ ಚಿನ್ನದ ಪದಕವನ್ನು ತಪ್ಪಿಸಿಕೊಂಡು ಬೆಳ್ಳಿಗೆ ತೃಪ್ತಿ ಪಟ್ಟರು.

ಸೋತ ಬಳಿಕ ಅಲ್ಕರಾಜ್ ಭಾವುಕರಾಗಿ ಮೌನಕ್ಕೆ ಶರಣಾದರು. ಗೆದ್ದ ಸಂಭ್ರಮದಲ್ಲಿ ಜೊಕೊವಿಕ್ ಗಳಗಳನೆ ಕಣ್ಣೀರಿಟ್ಟರು.