ಪಾಕ್ ನ 36 ರಸ್ತೆ, 5 ಉದ್ಯಾನಗಳ ಹೆಸರು “ಕಾಶ್ಮೀರ’

ಹೊಸದಿಲ್ಲಿ: ಕಾಶ್ಮೀರಕ್ಕೆ ನೀಡಿದ್ದ ವಿಶೇಷ ಸ್ಥಾನಮಾನದ 370ನೇ ವಿಧಿಯನ್ನು ಭಾರತ ರದ್ದುಗೊಳಿಸಿದ ಬಳಿಕ ಪಾಕಿಸ್ಥಾನ ಒಂದಲ್ಲ ರೀತಿಯಲ್ಲಿ ಪ್ರತಿರೋಧ ತೋರಿಸುತ್ತಾ ಬಂದಿದೆ. ಇದರ ಮುಂದುವರಿದ ಭಾಗವಾಗಿ ಭಾರತದ ಗಡಿಗೆ ಹೊಂದಿಕೊಂಡಿರುವ ಪಾಕ್ ನ ಪಂಜಾಬ್ ಪ್ರಾಂತ್ಯದ 36 ರಸ್ತೆಗಳು ಹಾಗೂ 5 ಪ್ರಮುಖ ಉದ್ಯಾನಗಳಿಗೆ ‘ಕಾಶ್ಮೀರ್’ ಎಂದು ನಾಮಕರಣ ಮಾಡಿದೆ.

ತನ್ನ ಈ ಕ್ರಮವನ್ನು ಸಮರ್ಥಿಸಿಕೊಂಡಿರುವ ಪಾಕಿಸ್ಥಾನ ಸರಕಾರ ನಾವು ಕಾಶ್ಮೀರದ ಜನರೊಂದಿಗೆ ಇದ್ದೇವೆ ಎಂಬ ಸಂದೇಶವನ್ನು ನೀಡಲು ಈ ಕ್ರಮ ಕಯಗೊಂಡಿದ್ದಾಗಿ ಹೇಳಿದ್ದಾರೆ. ಭಾರತ ಅಗಸ್ಟ್ 5ರಂದು ಕಾಶ್ಮೀರಕ್ಕೆ ನೀಡಿದ್ದ ವಿಶೇಷ ಸ್ಥಾನಮಾನ ರದ್ದುಗೊಳಿಸಿದ್ದಕ್ಕೆ ಪ್ರತಿಯಾಗಿ ನಮ್ಮ ನಿರ್ಧಾರ ಎಂದು ಹೇಳಿದೆ. ಪಂಜಾಬ್ ಪ್ರಾಂತ್ಸದ ಪ್ರತಿ ಜಿಲ್ಲೆಗಳಲ್ಲಿ ಕಾಶ್ಮೀರ ರಸ್ತೆ ಹಾಗೂ ಕಾಶ್ಮೀರ ಪಾರ್ಕ್ ಇರಲಿದೆ.

ಭಾರತ ಸ್ವಾತಂತ್ರ್ಯ ದಿನಾಚರಿಸಿದ ಒಂದು ದಿನ ಹಿಂದೆ ಆಗಸ್ಟ್ 14ರಂದು ಪಾಕಿಸ್ಥಾನ ಸ್ವಾತಂತ್ರ್ಯ ದಿನಾಚರಣೆ ಮಾಡಿತ್ತು. ಆದರೆ ಭಾರತದ ಸ್ವಾತಂತ್ರ್ಯ ದಿನವಾದ ಆಗಸ್ಟ್ 15ರಂದು ಪಾಕಿಸ್ಥಾನ ಕರಾಳ ದಿನವಾಗಿ ಆಚರಣೆ ಮಾಡಿತ್ತು. ಭಾರತ ಕಾಶ್ಮೀರ ವಿಷಯದಲ್ಲಿ ಕೈಗೊಂಡ ದೃಢ ನಿರ್ಧಾರವನ್ನು ಒಂದಲ್ಲ ಒಂದು ರೀತಿಯಲ್ಲಿ ಪಾಕ್ ಪ್ರತಿಭಟಿಸುತ್ತಾ ಬಂದಿದೆ. ಸದ್ಯ ಪಾಕಿಸ್ಥಾನದ ಪಾಲಿಗೆ ಹೆಚ್ಚು ಆಪ್ತವಾಗಿರುವ ಚೀನದ ಜತೆ ಸೇರಿ ಕಾಶ್ಮೀರ ವಿಷಯದ ಕುರಿತು ವಿಶ್ವಸಂಸ್ಥೆಯ ಬಾಗಿಲು ಬಡಿದಿದೆ.