ಪಾಕ್‌ ಮಾಜಿ ಅಧ್ಯಕ್ಷ ಜರ್ದಾರಿ ಬಂಧನ

ಇಸ್ಲಾಮಾಬಾದ್‌: ನಕಲಿ ಬ್ಯಾಂಕ್‌ ಖಾತೆ ಪ್ರಕರಣದಲ್ಲಿ ಪಾಕಿಸ್ಥಾನದ ಮಾಜಿ ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿಯನ್ನು ಸೋಮವಾರ ಬಂಧಿಸಲಾಗಿದೆ.

ಇಸ್ಲಾಮಾಬಾದ್‌ನಲ್ಲಿರುವ ಅವರ ಮನೆಯಿಂದ ದೇಶದ ಉನ್ನತ ತನಿಖಾ ಸಂಸ್ಥೆ ಎನ್‌ಎಬಿ ಬಂಧಿಸಿದೆ. ಬಂಧನದ ಸುದ್ದಿ ತಿಳಿಯುತ್ತಿದ್ದಂತೆಯೇ ಪಾಕಿಸ್ಥಾನ್‌ ಪೀಪಲ್ಸ್‌ ಪಾರ್ಟಿ ಮುಖಂಡ ಜರ್ದಾರಿ ಮನೆಯೆದುರು ಸಾವಿರಾರು ಜನರು ಸೇರಿ ಪ್ರತಿಭಟನೆ ನಡೆಸಿದ್ದರು. ಆದರೆ ಪೊಲೀಸರು ಹಾಗೂ ತನಿಖಾ ದಳಗಳ ವಿನಂತಿಯ ಮೇರೆಗೆ ಬಂಧನಕ್ಕೆ ಅವಕಾಶ ಮಾಡಿಕೊಡಲಾಗಿದೆ. ಜರ್ದಾರಿ ಸೋದರಿ ಫ‌ರ್ಯಾಲ್‌ ತಲ್ಪುರ್‌ ವಿರುದ್ಧವೂ ನಕಲಿ ಬ್ಯಾಂಕ್‌ ಖಾತೆ ಪ್ರಕರಣ ದಾಖಲಾಗಿದೆಯಾದರೂ, ಅವರನ್ನು ಬಂಧಿಸಿಲ್ಲ.

ಮನೆಯಿಂದ ಹೊರಬಂದು ಜನರತ್ತ ಕೈಬೀಸಿ ಜರ್ದಾರಿ ಪೊಲೀಸ್‌ ವಾಹನವನ್ನೇರಿದ ದೃಶ್ಯ ಪಾಕಿಸ್ಥಾನದಲ್ಲಿ ಈಗ ವೈರಲ್‌ ಆಗಿದೆ.

ಸುಪ್ರೀಂಕೋರ್ಟ್‌ ಜಾಮೀನು ತಿರಸ್ಕರಿಸಿದ ಹಿನ್ನೆಲೆಯಲ್ಲಿ ಬಂಧಿಸಲಾಗಿದ್ದು, ಕೋರ್ಟ್‌ ತೀರ್ಪಿನ ವಿರುದ್ಧ ಮೇಲ್ಮನವಿ ಸಲ್ಲಿಸಲು ಜರ್ದಾರಿಗೆ ಅವಕಾಶವಿದೆ.