ವನಿತಾ ಟಿ20 ಸರಣಿ: ಬಾಂಗ್ಲಾವನ್ನು ಮಣಿಸಿದ ಪಾಕ್‌

ಲಾಹೋರ್‌: ಪ್ರವಾಸಿ ಬಾಂಗ್ಲಾದೇಶ ವಿರುದ್ಧ ಶನಿವಾರ ಇಲ್ಲಿನ “ಗದ್ದಾಫಿ ಸ್ಟೇಡಿಯಂ’ನಲ್ಲಿ ನಡೆದ ಮೊದಲ ವನಿತಾ ಟಿ20 ಪಂದ್ಯವನ್ನು ಪಾಕಿಸ್ಥಾನ 14 ರನ್ನುಗಳಿಂದ ಜಯಿಸಿದೆ.

ಮೊದಲು ಬ್ಯಾಟಿಂಗ್‌ ನಡೆಸಿದ ಪಾಕಿಸ್ಥಾನ 7 ವಿಕೆಟಿಗೆ 126 ರನ್‌ ಗಳಿಸಿದರೆ, ಬಾಂಗ್ಲಾದೇಶ 7 ವಿಕೆಟಿಗೆ 112 ರನ್‌ ಗಳಿಸಲಷ್ಟೇ ಶಕ್ತವಾಯಿತು.

ಪಾಕಿಸ್ಥಾನ ಸಂಘಟಿತ ದಾಳಿಯ ಮೂಲಕ ಯಶಸ್ಸು ಕಂಡಿತು. ದಾಳಿಗಿಳಿದ ಎಲ್ಲ 6 ಮಂದಿ ಬೌಲರ್‌ಗಳೂ ವಿಕೆಟ್‌ ಕಿತ್ತರು. ಅನಾಮ್‌ ಅಮಿನ್‌ 13ಕ್ಕೆ 2 ವಿಕೆಟ್‌ ಉರುಳಿಸಿ ಹೆಚ್ಚಿನ ಯಶಸ್ಸು ಸಾಧಿಸಿದರು. ಬಾಂಗ್ಲಾದ ಮಧ್ಯಮ ಸರದಿಯ ಆಟಗಾರ್ತಿ ರುಮಾನಾ ಅಹ್ಮದ್‌ 50 ರನ್‌ ಬಾರಿಸಿ (30 ಎಸೆತ, 6 ಬೌಂಡರಿ, 2 ಸಿಕ್ಸರ್‌) ದಿಟ್ಟ ಹೋರಾಟ ನಡೆಸಿದರೂ ಉಳಿದವರಿಂದ ಬೆಂಬಲ ಲಭಿಸಲಿಲ್ಲ.

ಪಾಕಿಸ್ಥಾನದ ಬ್ಯಾಟಿಂಗ್‌ ಸರದಿಯಲ್ಲಿ ಮಿಂಚಿದವರು ನಾಯಕಿ ಬಿಸ್ಮಾ ಮರೂಫ್ (34) ಮತ್ತು ಒಮೈಮಾ ಸೊಹೈಲ್‌ (33). ಇವರಿಂದ 3ನೇ ವಿಕೆಟಿಗೆ 60 ರನ್‌ ಒಟ್ಟುಗೂಡಿತು.