ಪಾಕಿಸ್ಥಾನದಿಂದ ಭಾರೀ ಪ್ರಮಾಣದ ಶಸ್ತ್ರಾಸ್ತ್ರ ಖರೀದಿ

ನವದೆಹಲಿ: ಇತ್ತೀಚೆಗಷ್ಟೇ ಅಮೆರಿಕಾದ ಬಳಿಯಿಂದ 145 ಎಂ177 ಹೌವಿಟ್ಜರ್ ಗನ್ ಗಳ ಖರೀದಿಗೆ ಭಾರತ ನಿರ್ಧರಿಸಿರುವ ಬೆನ್ನಲ್ಲೇ ನೆರೆ ರಾಷ್ಟ್ರ ಪಾಕಿಸ್ಥಾನವೂ ಸಹ ಭಾರೀ ಪ್ರಮಾಣದ ಮದ್ದುಗುಂಡುಗಳ ಖರೀದಿಗೆ ನಿರ್ಧರಿಸುವ ಅಂಶ ಗುಪ್ತಚರ ಇಲಾಖೆಗಳ ಮಾಹಿತಿಯಿಂದ ಹೊರಬಿದ್ದಿದೆ.

ತನ್ನ ಬಳಿಯಲ್ಲಿರುವ ಹೌವಿಟ್ಜರ್ ಗನ್ ಗಳಿಗೆ ಸುಮಾರು ಒಂದು ಲಕ್ಷ ಶೆಲ್ ಗಳನ್ನು ಖರೀದಿಸಲು ಪಾಕಿಸ್ಥಾನ ಇಟಲಿ ದೇಶದೊಂದಿಗೆ ಇತ್ತೀಚೆಗಷ್ಟೇ ಒಪ್ಪಂದ ಮಾಡಿಕೊಂಡಿದೆ ಎಂಬ ಮಾಹಿತಿ ಹೊರಬಿದ್ದಿದೆ. ಮತ್ತು ಈ ಶೆಲ್ ಗಳನ್ನು ಇಟಲಿ ಸಧ್ಯದಲ್ಲಿಯೇ ಪಾಕಿಸ್ಥಾನಕ್ಕೆ ಪೂರೈಸುವ ಸಾದ್ಯತೆಗಳಿವೆ. ಇನ್ನು ಭಾರತದ ಬಳಿಯಲ್ಲಿರುವ ಎಂ777 ಹೌವಿಟ್ಜರ್ ಗೆ ಬದಲಾಗಿ ಪಾಕ್ 121 ಹೊಸ ಹೌವಿಟ್ಜರ್ ಗನ್ ಗಳನ್ನೂ ಸಹ ಇಟಲಿಯಿಂದ ಖರೀದಿಸಿರುವ ಕುರಿತಾಗಿ ಗುಪ್ತಚರ ಇಲಾಖೆಗೆ ಮಾಹಿತಿ ಲಭ್ಯವಾಗಿದೆ. ಭಾರತ ಇತ್ತೀಚೆಗಷ್ಟೇ ಅಮೆರಿಕಾದಿಂದ 145 ಎಂ177 ಹೌವಿಟ್ಜರ್ ಗನ್ ಗಳ ಖರೀದಿಗೆ ನಿರ್ಧರಿಸಿತ್ತು.

ಭಾರತ – ಪಾಕ್ ಗಡಿಬಾಗದುದ್ದಕ್ಕೂ ಉಗ್ರರ ನುಸುಳುವಿಕೆಗೆಗೆ ಭಾರತೀಯ ಸೇನೆ ಭಾರೀ ಪ್ರತಿರೋಧ ನೀಡುತ್ತಿರುವ ಕಾರಣದಿಂದ ತನ್ನ ಸೇನಾ ಕಾರ್ಯತಂತ್ರವನ್ನು ಬದಲಿಸಿರುವಂತೆ ಕಂಡುಬಂದಿರುವ ಪಾಕಿಸ್ಥಾನ ಇದೀಗ ಈ ಪ್ರಮಾಣದಲ್ಲಿ ಶಸ್ತ್ರಾಸ್ತ್ರ ಖರೀದಿಗೆ ಮುಂದಾಗಿದೆ ಎಂದು ತಿಳಿದುಬಂದಿದೆ. ತನ್ನ ಪರಮಾಪ್ತ ಮಿತ್ರರಾಷ್ಟ್ರ ಚೀನಾದಿಂದ ಈ ಶಸ್ತ್ರಾಸ್ತ್ರಗಳನ್ನು ಖರೀದಿಸದೇ ಇಟಲಿಯಿಂದ ಇವುಗಳನ್ನು ಖರೀದಿಸುತ್ತಿರುವುದೂ ಸಹ ಸಾಕಷ್ಟು ಕುತೂಹಲಕ್ಕೆ ಕಾರಣವಾಗಿದೆ.