ಕರಾಚಿ: ಪಾಕಿಸ್ತಾನ್ ಸೂಪರ್ ಲೀಗ್ (PSL) ಯಶಸ್ವಿಯಾಗಿ ನಡೆದಿದೆ. ಇಸ್ಲಾಮಾಬಾದ್ ಯುನೈಟೆಡ್ ತಂಡ ಮುಲ್ತಾನ್ ಸುಲ್ತಾನ್‌ ತಂಡವನ್ನು ಸೋಲಿಸುವ ಮೂಲಕ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿದೆ.
ಟ್ರೋಫಿ ಗೆದ್ದ ಇಸ್ಲಾಮಾಬಾದ್ ಯುನೈಟೆಡ್; ಮುಲ್ತಾನ್ ಗೆ ಮತ್ತೆ ಸೋಲು:
ಮೊದಲು ಬ್ಯಾಟಿಂಗ್‌ ಗಿಳಿದ ರಿಜ್ವಾನ್‌ ನಾಯಕತ್ವದ ಮುಲ್ತಾನ್ ಸುಲ್ತಾನ್‌ 9 ವಿಕೆಟ್‌ ಕಳೆದುಕೊಂಡು 159 ರನ್‌ ಗಳಿಸಿತು. ಇದರಲ್ಲಿ ಉಸ್ಮಾನ್ ಖಾನ್ 57 ರನ್‌ ಪೇರಿಸಿದರು. ಇಮಾದ್ ವಾಸಿಂ ಅವರ ಪ್ರಮುಖ 5 ವಿಕೆಟ್‌ ಪಡೆಯುವ ಮೂಲಕ ಮುಲ್ತಾನ್ ಗಳ ರನ್‌ ಗಳಿಕೆಗೆ ಕಡಿವಾಣ ಹಾಕಿದರು.
ಗುರಿ ಬೆನ್ನಟ್ಟಲು ಕ್ರಿಸ್‌ ಗಿಳಿದ ಇಸ್ಲಾಮಾಬಾದ್ ಯುನೈಟೆಡ್ ಮಾರ್ಟಿನ್ ಗಪ್ಟಿಲ್ ಅವರ ಅರ್ಧಶತಕ, ಆಜಂ ಖಾನ್ ಅವರ ಸ್ಪೋಟಕ ಬ್ಯಾಟಿಂಗ್‌ ನೆರವಿನಿಂದ 8 ವಿಕೆಟ್‌ ಕಳೆದುಕೊಂಡು ಗುರಿಯನ್ನು ಬೆನ್ನಟ್ಟಿತು.
ರಿಜ್ವಾನ್‌ ನಾಯಕತ್ವ ಮುಲ್ತಾನ್ ಸುಲ್ತಾನ್‌ ಇದು ಸತತ ಎರಡನೇ ಫೈನಲ್ ಸೋಲು. ಕಳೆದ ವರ್ಷವೂ ಫೈನಲ್ ಗೆ ಎಂಟ್ರಿ ಆಗಿದ್ದ ಮುಲ್ತಾನ್ ತಂಡ ಲಾಹೋರ್ ಖಲಂದರ್ಸ್ ವಿರುದ್ಧ ಸೋತಿತ್ತು.
ಫೈನಲ್ ಪಂದ್ಯ ನಡೆಯುತ್ತಿದ್ದ ಸಂದರ್ಭದಲ್ಲಿ ಡ್ರೆಸ್ಸಿಂಗ್‌ ರೂಮ್‌ ನಲ್ಲಿ ಇಮಾದ್ ವಾಸಿಂ ಅವರು ವರ್ತಿಸಿದ ರೀತಿಗೆ ನೆಟ್ಟಿಗರು ಗರಂ ಆಗಿದ್ದಾರೆ. ಡ್ರೆಸ್ಸಿಂಗ್‌ ರೂಮ್‌ ನಲ್ಲಿ ಇಮಾದ್ ವಾಸಿಂ ಅವರು ಸಿಗರೇಟ್‌ ಸೇದುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ʼಪಾಕಿಸ್ತಾನ್ ಸ್ಮೋಕಿಂಗ್‌ ಲೀಗ್ʼ ಎಂದು ಕೆಲವರು ಕಮೆಂಟ್‌ ಮಾಡಿದ್ದಾರೆ.
