ಅಸೀಮಾನಂದ ಖುಲಾಸೆ: ಭಾರತದ ಉಪ ಹೈಕಮಿಶನರ್‌ಗೆ ಪಾಕ್‌ ಸಮನ್ಸ್‌

ಇಸ್ಲಾಮಾಬಾದ್‌ : ಸಂಝೋತಾ ಟ್ರೈನ್‌ ಬ್ಲಾಸ್ಟ್‌ ಕೇಸಿನ ಆರೋಪಿಯಾಗಿರುವ ಬಲ ಪಂಥೀಯ ಕಾರ್ಯಕರ್ತ,  ಸ್ವಾಮಿ ಅಸೀಮಾನಂದ ಅವರನ್ನು ಖುಲಾಸೆಗೊಳಿಸಲಾಗಿರುವುದಕ್ಕೆ ತನ್ನ ಅತೃಪ್ತಿಯನ್ನು ತಿಳಿಸಲು ಪಾಕಿಸ್ಥಾನ ಭಾರತದ ಉಪ ಹೈಕಮಿಶನರ್‌ ಜೆ ಪಿ ಸಿಂಗ್‌ ಅವರನ್ನು ಕರೆಸಿಕೊಂಡಿದೆ. 

ನಿನ್ನೆ ತಡರಾತ್ರಿ ಹೊರಡಿಸಲಾದ ಹೇಳಿಕೆಯಲ್ಲಿ ವಿದೇಶ ಕಾರ್ಯಾಲಯವು, ಭಾರತೀಯ ಡೆಪ್ಯುಟಿ ಹೈಕಮಿಶನರ್‌ ಜೆ ಪಿ ಸಿಂಗ್‌ ಅವರನ್ನು ದಕ್ಷಿಣ ಏಶ್ಯ ಮತ್ತು ಸಾರ್ಕ್‌ ಮಹಾ ನಿರ್ದೇಶಕರು ತಮ್ಮ ಕಾರ್ಯಾಲಯಕ್ಕೆ ಕರೆಸಿಕೊಂಡು ಅಜ್‌ಮೇರ್‌ ಷರೀಫ್ ಬ್ಲಾಸ್ಟ್‌ ಕೇಸಿನಲ್ಲಿ ಸ್ವಾಮಿ ಅಸೀಮಾನಂದ ಅವರನ್ನು ಖುಲಾಸೆಗೊಳಿಸಲಾಗಿರುವುದಕ್ಕೆ  ಪಾಕ್‌ ಸರಕಾರದ ತೀವ್ರ ಅತೃಪ್ತಿಯನ್ನು ವ್ಯಕ್ತಪಡಿಸಿರುವುದು ತಿಳಿಸಿದೆ. 

“2007ರ ಫೆಬ್ರವರಿಯಲ್ಲಿ ನಡೆದಿದ್ದ ಸಂಝೋತಾ ಎಕ್ಸ್‌ಪ್ರೆಸ್‌ ಭಯೋತ್ಪಾದಕ ದಾಳಿಯ ಮಾಸ್ಟರ್‌ ಮೈಂಡ್‌ ತಾನೇ ಆಗಿದ್ದುದಾಗಿ ಸ್ವಾಮಿ ಅಸೀಮಾನಾಂದ ಅವರು ಬಹಿರಂಗವಾಗಿ ತಪ್ಪೊಪ್ಪಿಕೊಂಡಿದ್ದರು; ಭಯೋತ್ಪಾದ ಸಂಘಟನೆಯಾಗಿರುವ ಅಭಿನವ್‌ ಭಾರತ್‌ನ ಮುಖ್ಯಸ್ಥರಾಗಿರುವ ಅಂದಿನ ಹಾಲಿ ಭಾರತೀಯ ಸೇನಾಧಿಕಾರಿ ಕರ್ನಲ್‌ ಪುರೋಹಿತ್‌ ಅವರು ಸಂಝೋತಾ ಎಕ್ಸ್‌ಪ್ರೆಸ್‌ ಭಯೋತ್ಪಾದಕ ದಾಳಿಯಲ್ಲಿ ತನ್ನ ಸಹಚರನಾಗಿದ್ದರು ಎಂದು ಅಸೀಮಾನಂದ ಹೇಳಿದ್ದರು’ ಎಂಬುದಾಗಿ ಪಾಕ್‌ ಹೇಳಿದೆ. 

2007ರ ಫೆ.18ರಂದು ಪಾಣಿಪತ್‌ನಲ್ಲಿ ನಡೆದಿದ್ದ ಸಂಝೋತಾ ಎಕ್ಸ್‌ಪ್ರೆಸ್‌ ಟ್ರೈನಿನ ಎರಡು ಬೋಗಿಗಳಲ್ಲಿ ನಡೆದಿದ್ದ ಸ್ಫೋಟದಿಂದಾಗಿ 68 ಮಂದಿ ಅಸುನೀಗಿದ್ದರು. ಪಾಕ್‌ ಹೇಳಿಕೆ ಪ್ರಕಾರ ಅಂದಿನ ಆ ಬ್ಲಾಸ್ಟ್‌ನಲ್ಲಿ 42 ಪಾಕ್‌ ಪ್ರಜೆಗಳು ಅಸುನೀಗಿದ್ದಾರೆ.