Padubidri: ಕುಡಿದು ಕಾರು ಚಾಲನೆ: ಕಂಬಕ್ಕೆ ಢಿಕ್ಕಿ;ಇಬ್ಬರು ಪೊಲೀಸರ ವಶಕ್ಕೆ

ಪಡುಬಿದ್ರಿ: ವಿದೇಶದಿಂದ ಸ್ವರಾಜ್ಯ ಕೇರಳಕ್ಕಾಗಮಿಸಿ ಮೋಜಿಗಾಗಿ ಉಡುಪಿ, ಮಲ್ಪೆ ಸುತ್ತಾಡಿದ್ದ ಕೊಚ್ಚಿನ ನಿವಾಸಿಗಳಾದ ಧೀರಜ್‌(28) ಹಾಗೂ ಗೌತಮ್‌(30) ಮದ್ಯಪಾನ ಗೈದು ಕಾರು ಚಲಾಯಿಸಿ ಪೊಲೀಸರ ವಶವಾಗಿದ್ದಾರೆ. ಪಡುಬಿದ್ರಿ ಪೊಲೀಸರು ಕುಡಿದು ವಾಹನ ಚಲಾಯಿಸಿದ್ದಕ್ಕಾಗಿ ಪ್ರಕರಣವನ್ನೂ ದಾಖಲಿಸಿದ್ದಾರೆ.

ಈ ಇಬ್ಬರೂ ಮಲ್ಪೆಯಿಂದ ಹೊರಟು ಬರುತ್ತಾ ಕೇರಳದತ್ತ ಹೋಗುವ ಧಾವಂತದಲ್ಲಿ ಪಾಂಗಾಳ ಬಳಿ ತಮ್ಮ ಇನೋವಾ ಕಾರನ್ನು ಮಾರುತಿ ಆಲ್ಟೋ ಕಾರಿಗೆ ಢಿಕ್ಕಿ ಹೊಡೆಸಿ ನಿಲ್ಲಿಸದೇ ಪರಾರಿಯಾಗಿದ್ದರು. ಆ ಕೂಡಲೇ ಪೊಲೀಸರ ಮಾಹಿತಿಯನ್ವಯ ಹೆಜಮಾಡಿ ಟೋಲ್‌ಗೇಟ್‌ ಬಳಿ ಟೋಲ್‌ ಸಿಬಂದಿ ಈ ಕಾರನ್ನು ತಡೆದು ನಿಲ್ಲಿಸಿದ್ದಾರೆ.

ಪೊಲೀಸರು ಹಾಗೂ ಟೋಲ್‌ ಸಿಬಂದಿಗಳನ್ನು ಕಂಡು ತಕ್ಷಣ ಕಾರನ್ನು ಹಿಂತಿರುಗಿಸಿ ಪಡುಬಿದ್ರಿಯತ್ತ ಬರುತ್ತಲೇ ಹಳೆ ಎಂಬಿಸಿ ರಸ್ತೆಯ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದ್ವಾರದ ಬಳಿ ಜಾಹೀರಾತಿನ ಕಬ್ಬಿಣದ ಕಂಬಕ್ಕೆ ಕಾರು ಮತ್ತೆ ಢಿಕ್ಕಿಯಾಗಿದೆ. ಕಾರಿನ ಮುಂಭಾಗ ಸಂಪೂರ್ಣ ಜಖಂಗೊಂಡಿದ್ದು ತಕ್ಷಣವೇ ಇವರನ್ನು ಬೆನ್ನಟ್ಟಿ ಬಂದಿದ್ದ ಪಡುಬಿದ್ರಿ ಪೊಲೀಸರು ಕಾರಲ್ಲಿದ್ದ ಆರೋಪಿಗಳನ್ನು ವಶಕ್ಕೆ ಪಡೆದು ಠಾಣೆಗೆ ಕರೆತಂದು ವಿಚಾರಣೆ ನಡೆಸಿದ್ದಾರೆ. ತನಿಖೆ ಮುಂದುವರಿದಿದೆ.