ಬೆಂಗಳೂರು: ಅಂಗ ದಾನವು ಸಾಟಿಯಿಲ್ಲದ ನಿಸ್ವಾರ್ಥತೆತೆಯ ಪ್ರತೀಕವಾಗಿದ್ದು, ಜೀವದ ನಷ್ಟವನ್ನು ಇತರರ ಜೀವನಕ್ಕೆ ಉಡುಗೊರೆಯಾಗಿ ನೀಡುತ್ತದೆ. ಹಠಾತ್ ಹೃದಯ ಸ್ತಂಭನಕ್ಕೆ ಒಳಗಾದ 37 ವರ್ಷ ವಯಸ್ಸಿನ ದೇಬದತ್ತ ಪಾತ್ರಾ ಮೆದುಳಿಗೆ ಹಾನಿಯಾದ ಕಾರಣ ಅವರ ಕುಟುಂಬವು ಅವರ ಅಂಗಗಳನ್ನು ದಾನ ಮಾಡುವ ಮೂಲಕ ಮಾದರಿಯಾಗಿದೆ.
ಮೂಲತಃ ಒರಿಸ್ಸಾದವರಾದ ದೇಬದತ್ತ ಪಾತ್ರಾ ಅವರು ಕೆಆರ್ ಪುರಂನಲ್ಲಿ ವಾಸಿಸುತ್ತಿದ್ದರು. ಅ.29 ರಂದು ಅವರಿಗೆ ಹೃದಯ ಸ್ತಂಭನವಾಗಿದ್ದು, ಬಳಿಕ ಮೆದುಳು ನಿಶ್ಕ್ರಿಯವಾಗಿತ್ತು.
ಕುಟುಂಬವು ದೇಬದತ್ತ ಪಾತ್ರಾ ಅವರ ಮೂತ್ರಪಿಂಡಗಳು, ಯಕೃತ್ತು, ಹೃದಯ ಮತ್ತು ಕಾರ್ನಿಯಾಗಳನ್ನು ದಾನ ಮಾಡುವ ಮೂಲಕ ಇತರರಿಗೆ ಹೊಸ ಜೀವನ ನೀಡಲು ನಿರ್ಧರಿಸಿತು.
ಮಣಿಪಾಲ್ ಆಸ್ಪತ್ರೆಯ ಎಚ್ಒಡಿ ಮತ್ತು ಕನ್ಸಲ್ಟೆಂಟ್ – ಕ್ರಿಟಿಕಲ್ ಕೇರ್ ಮೆಡಿಸಿನ್ ನ ಅಧ್ಯಕ್ಷ ಡಾ. ಸುನಿಲ್ ಕಾರಂತ್, ಅವರು ಮಾತನಾಡಿ, “ಭಾರತದಲ್ಲಿ, ಸಾವಿನ ನಂತರ ಅಂಗಾಂಗ ದಾನದ ಪ್ರಮಾಣವು ಅಮೆರಿಕದಂತಹ ದೇಶಗಳಿಗಿಂತ ತುಂಬಾ ಕಡಿಮೆಯಾಗಿದೆ. ಅವರ ವೈಯಕ್ತಿಕ ದುರಂತದ ನಡುವೆ ಕೂಡ, ದೇಬದತ್ತ ಅವರ ಕುಟುಂಬವು ಅವರ ಅಂಗಗಳನ್ನು ದಾನ ಮಾಡುವ ನಿರ್ಧಾರವು ಕಸಿ ಅಗತ್ಯವಿರುವ ಜನರ ಜೀವಗಳನ್ನು ಉಳಿಸಿತು ಮತ್ತು ಇತರರಿಗೆ ಈ ಉದಾರ ಕಾರ್ಯವನ್ನು ಪರಿಗಣಿಸಲು ಭರವಸೆ ಮತ್ತು ಪ್ರೋತ್ಸಾಹವನ್ನು ನೀಡಿತು” ಎಂದರು.
ದೇಬದತ್ತ ಪಾತ್ರಾ ಅವರು ಪತ್ನಿ, ಮಗು, ಪೋಷಕರು ಮತ್ತು ಇಬ್ಬರು ಸಹೋದರರನ್ನು ಅಗಲಿದ್ದಾರೆ. ಅಂಗದಾನದ ಈ ನಿಸ್ವಾರ್ಥ ಕ್ರಿಯೆಯ ಮೂಲಕ, ಜೀವ ಉಳಿಸುವ ಕಸಿಗಾಗಿ ಕಾಯುತ್ತಿರುವ ರೋಗಿಗಳಿಗೆ ಸಹಾಯ ಮಾಡಲು ಅವರು ಇತರರಿಗೆ ಮಾದರಿಯಾಗಿದ್ದಾರೆ.
