TCS ಸೂಚನೆ: ವೇತನ ಹೆಚ್ಚಳಕ್ಕೆ ಕಚೇರಿ ಕೆಲಸ ಮಾತ್ರ ಪರಿಗಣನೆ

ಮುಂಬಯಿ: ವೇತನ ಹೆಚ್ಚಳ, ವೇರಿಯೇಬಲ್‌ ಪೇ ಸಿಗಬೇಕಾದರೆ ಕಡ್ಡಾಯವಾಗಿ ಕಚೇರಿಗೆ ಬರಲೇಬೇಕು. ಹೀಗೆಂದು ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್‌ (ಟಿಸಿಎಸ್‌) ಟೆಕಿಗಳಿಗೆ ಕಟ್ಟುನಿಟ್ಟಿನ ಆದೇಶ ನೀಡಿದೆ. ಈ ಬಗ್ಗೆ ತನ್ನ ವಿಭಾಗಗಳ ಮ್ಯಾನೇಜರ್‌ಗಳಿಗೆ ಕಂಪನಿಯ ಆಡಳಿಕ ಮಂಡಳಿ ಸೂಚಿಸಿದೆ. ಕಳೆದ ವರ್ಷದ ಅ.1ರಿಂದಲೇ ಬಹುತೇಕ ಉದ್ಯೋಗಿಗಳಿಗೆ ಟಿಸಿಎಸ್‌ ಮನೆಯಿಂದ ಕೆಲಸ ಸೌಲಭ್ಯವನ್ನು ಕೊನೆಗೊಳಿಸಿದೆ. ವೇತನ ಹೆಚ್ಚಳ, ಭಡ್ತಿ ಮತ್ತು ಉಳಿದ ಭತ್ಯೆಗಳ ಹೆಚ್ಚಳಕ್ಕೂ ಉದ್ಯೋಗಿಗಳು ಕಚೇರಿ ಯಿಂದಲೇ ಕೆಲಸ ಮಾಡಿರುವುದನ್ನು ಪರಿಗಣಿಸಬೇಕೆಂದು ಕಂಪನಿ ಸೂಚಿಸಿದೆ. ಕಳೆದ ವರ್ಷದಿಂದಲೇ ವಾರಕ್ಕೆ 5 ದಿನ ಕಡ್ಡಾಯವಾಗಿ ಕಚೇರಿಗೆ ಬರಬೇಕೆಂದು ತಿಳಿಸಿತ್ತು.