ಸ್ನಾನಕ್ಕೆ 41 ಸೆಕೆಂಡ್‌ ಮಾತ್ರ ಅವಕಾಶ

ಲಕ್ನೋ: ಈ ಬಾರಿ ಕುಂಭ ಮೇಳದಲ್ಲಿ ಕಾಲ್ತುಳಿತ ತಪ್ಪಿಸಲು ಉತ್ತರ ಪ್ರದೇಶ ಪೊಲೀಸರು ಹೊಸ ಉಪಾಯ ಕಂಡುಕೊಂಡಿ ದ್ದಾರೆ. 41 ಸೆಕೆಂಡ್‌ಗಳಿಗಿಂತ ಹೆಚ್ಚು ಕಾಲ ಪುಣ್ಯಸ್ನಾನ ಮಾಡಲು ಅವಕಾಶ ನೀಡದೇ ಇರಲು ನಿರ್ಧರಿಸಲಾಗಿದೆ ಎಂದು ಉತ್ತರ ಪ್ರದೇಶ ಪೊಲೀಸ್‌ ಮಹಾ ನಿರ್ದೇಶಕ ಒ.ಪಿ. ಸಿಂಗ್‌ ಅವರು ತಿಳಿಸಿದ್ದಾರೆ.

ಸುರಕ್ಷಿತವಾಗಿ ಧಾರ್ಮಿಕ ಉತ್ಸವ ನಡೆಸಲೆಂದು, 11-13 ವಿಭಾಗಗಳನ್ನು ರಚಿಸಿ ಅದರ ಮೂಲಕ ಸಂಚಾರ ನಿಯಂತ್ರಣ ವ್ಯವಸ್ಥೆ ರೂಪಿಸಲಾಗುತ್ತದೆ. 80 ಬೆಟಾಲಿಯನ್‌ ಅರೆಸೇನಾ ಪಡೆಗಳ ಹೊರತಾಗಿ 20 ರಿಂದ 22 ಸಾವಿರ ಪೊಲೀಸ್‌ ಸಿಬಂದಿಯನ್ನು ನಿಯೋಜಿಸಲಾಗುತ್ತದೆ ಎಂದಿದ್ದಾರೆ ಸಿಂಗ್‌.

ಇದೇ ವೇಳೆ, ಪ್ರವಾಸಿ ಭಾರತೀಯ ದಿವಸಕ್ಕೆ ಆಗಮಿಸುವ ಅನಿವಾಸಿ ಭಾರತೀಯ ಅತಿಥಿಗಳು ಕುಂಭಮೇಳ ಮುಗಿಸಿ ವಿಶೇಷ ರೈಲುಗಳಲ್ಲಿ ದಿಲ್ಲಿಗೆ ಆಗಮಿಸುವ ವೇಳೆ ಅವರಿಗೆ ಉತ್ತರ ಭಾರತದ ಸಸ್ಯಾಹಾರಿ ಆಹಾರ ಒದಗಿಸಲಾಗುವುದು ಎಂದು ರೈಲ್ವೇ ಇಲಾಖೆ ತಿಳಿಸಿದೆ.