ಕಿರುತೆರೆ ನಟ ಜಗ್ಗಪ್ಪ ಹಾಗೂ ಸುಶ್ಮಿತಾ ಜೋಡಿಯಾಗಿ ಅಭಿನಯಿಸಿರುವ “ಆನ್‌ಲೈನ್‌ ಮದುವೆ ಆಫ್ಲೈನ್‌ ಶೋಭನ’ ಸಿನಿಮಾದ ಟ್ರೇಲರ್‌ ಮತ್ತು ಹಾಡುಗಳು ಇತ್ತೀಚೆಗೆ ಬಿಡುಗಡೆಯಾಯಿತು.
ಲವ್‌ ಕಂ ಕಾಮಿಡಿ ಶೈಲಿಯಲ್ಲಿ ತೆರೆಮೇಲೆ ಬರುತ್ತಿರುವ “ಆನ್‌ ಲೈನ್‌ ಮದುವೆ ಆಫ್ಲೈನ್‌ ಶೋಭನ’ ಸಿನಿಮಾಕ್ಕೆ ವೇಂಪಲ್ಲಿ ಬಾವಾಜಿ ಕಥೆ, ಚಿತ್ರಕಥೆ, ಸಾಹಿತ್ಯ, ಸಂಭಾಷಣೆ ಬರೆದು ನಿರ್ದೇಶನ ಮಾಡಿದ್ದಾರೆ.
ಸಿನಿಮಾದ ಟ್ರೇಲರ್‌ ಮತ್ತು ಹಾಡುಗಳ ಬಿಡುಗಡೆ ವೇಳೆ ಮಾತನಾಡಿದ ನಿರ್ದೇಶಕ ವೇಂಪಲ್ಲಿ ಬಾವಾಜಿ, “ಇದೊಂದು ಪೂರ್ಣ ಪ್ರಮಾಣದ ಮನರಂಜನಾತ್ಮಕ ಕಥಾಹಂದರವಿರುವ ಸಿನಿಮಾ. ಆರಂಭದಲ್ಲಿ ಈ ಕಥೆಗೆ ಯಾರು ಸೂಕ್ತ ಎಂದು ಹುಡುಕಿದಾಗ ಸೋಶಿಯಲ್‌ ಮೀಡಿಯಾದಲ್ಲಿ ಒಂದಷ್ಟು ಫೇಮಸ್‌ ಆಗಿದ್ದ ಜಗಪ್ಪ, ಸುಶ್ಮಿತಾ ಸಿಕ್ಕರು. ಇಡೀ ಸಿನಿಮಾದಲ್ಲಿ ನಗದೇ ಇರೋದಕ್ಕೆ ಎಲ್ಲೂ ಗ್ಯಾಪ್‌ ಕೊಟ್ಟಿಲ್ಲ, ನಗದೇ ಇರುವವರಿಗೆ ಲಕ್ಷ ರೂಪಾಯಿ ಬಹುಮಾನ ಕೊಡುತ್ತೇವೆ. ಅಷ್ಟರ ಮಟ್ಟಿಗೆ ನಗುವಿನ ಕಚಗುಳಿ ಸಿನಿಮಾದಲ್ಲಿದೆ’ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಇನ್ನು ಸಿನಿಮಾದ ಹೆಸರೇ ಹೇಳುವಂತೆ, ಆನ್‌ ಲೈನ್‌ ಆ್ಯಪ್‌ ಮೂಲಕ ಪರಿಚಯ ವಾದ ಹುಡುಗ-ಹುಡುಗಿಯ ಪ್ರೇಮ ಪುರಾಣ ಹೇಗಿರುತ್ತದೆ ಎಂಬುದನ್ನು ಹಾಸ್ಯಭರಿತವಾಗಿ ಈ ಸಿನಿಮಾದಲ್ಲಿ ಹೇಳಲಾಗಿದೆ. ಸೋಶಿಯಲ್‌ ಮೀಇಯಾದಲ್ಲಿ ಸಕ್ರಿಯವಾಗಿರುವ ಇಂದಿನ ಯೂಥ್ಸ್ ಮನಸ್ಥಿತಿ, ಮದುವೆ ಬಗ್ಗೆ ಅವರಿಗಿರುವ ಕಲ್ಪನೆಯ ಬಗ್ಗೆ ಸಿನಿಮಾದಲ್ಲಿ ಹೇಳಲಾಗಿದೆ. ಆನ್‌ಲೈನ್‌ನಲ್ಲಿ ಪರಿಚಯವಾದ ನಾಯಕ, ನಾಯಕಿ ಹೇಗೆ ಮದುವೆಯಾಗುತ್ತಾರೆ ಎಂಬುದನ್ನು ಸಿನಿಮಾದಲ್ಲಿ ಹೇಳಿದ್ದೇವೆ’ ಎಂಬುದು ಚಿತ್ರತಂಡದ ಮಾತು.
ಜಗಪ್ಪ, ಸುಶ್ಮಿತಾ ಅವರೊಂದಿಗೆ ಸೀರುಂಡೆ ರಘು, ಗಜೇಂದ್ರ, ಯಶಸ್ವಿನಿ, ಚಂದನ, ಶರಣ್ಯ ರೆಡ್ಡಿ, ದಯಾನಂದ್‌, ರಾಘವಿ ಸೇರಿದಂತೆ “ಗಿಚ್ಚಿ ಗಿಲಿಗಿಲಿ’, “ಮಜಾಭಾರತ’, “ಕಾಮಿಡಿ ಕಿಲಾಡಿಗಳು’ ಮೊದಲಾದ ರಿಯಾಲಿಟಿ ಶೋ ಕಾರ್ಯಕ್ರಮದ ಅನೇಕ ಕಲಾವಿದರು ಸಿನಿಮಾದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.
“ಅಪ್ಸರ ಮೂವೀಸ್‌’ ಬ್ಯಾನರ್‌ನಲ್ಲಿ ನಿರ್ದೇಶಕ ವೇಂಪಲ್ಲಿ ಬಾವಾಜಿ ಅವರೇ ಈ ಸಿನಿಮಾಕ್ಕೆ ಬಂಡವಾಳ ಹೂಡಿ ನಿರ್ಮಾಣ ಮಾಡಿದ್ದಾರೆ. ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರದ ಅತ್ತಿಬೆಲೆ ಸುತ್ತಮುತ್ತ ಸಿನಿಮಾದ ಬಹುತೇಕ ಚಿತ್ರೀಕರಣ ನಡೆಸಲಾಗಿದೆ.
ಅರುಣ್‌ ಪ್ರಸಾದ್‌ ಸಂಗೀತ ನಿರ್ದೇಶನವಿದ್ದು, ಬಾಲು ಛಾಯಾಗ್ರಹಣ, ರೋಹಿತ್‌ ಸಂಕಲನವಿದೆ. ಈಗಾಗಲೇ ಸೆನ್ಸಾರ್‌ ಮಂಡಳಿಯಿಂದ “ಯು/ಎ’ ಸರ್ಟಿಫಿಕೇಟ್‌ ಪಡೆದುಕೊಂಡಿರುವ “ಆನ್‌ಲೈನ್‌ ಮದುವೆ ಆಫ್ಲೈನ್‌ ಶೋಭನ’ ಸಿನಿಮಾವನ್ನು ಜನವರಿ ಅಂತ್ಯದೊಳಗೆ ತೆರೆಗೆ ತರುವ ಯೋಜನೆ ಹಾಕಿಕೊಂಡಿದೆ ಚಿತ್ರತಂಡ.
