ಭಿವಂಡಿ: ನಾಲ್ಕಂತಸ್ತಿನ ಕಟ್ಟಡ ಕುಸಿತ; 1 ಸಾವು, ಐವರಿಗೆ ಗಾಯ

ಥಾಣೆ, ಮಹಾರಾಷ್ಟ್ರ : ಥಾಣೆ ಜಿಲ್ಲೆಯ ಭಿವಂಡಿಯಲ್ಲಿ ಇಂದು ಶುಕ್ರವಾರ ನಾಲ್ಕು ಮಹಡಿಗಳ ಕಟ್ಟಡವೊಂದು ಕುಸಿದು 18ರ ಹರೆಯದ ಯುವತಿ ಮೃತಪಟ್ಟು ಇತರ ಐವರು ಗಾಯಗೊಂಡಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ನವಿ-ವಾಸ್ತಿ ಪ್ರದೇಶದಲ್ಲಿನ ಈ ಕುಸಿದ ಕಟ್ಟಡದ ಅವಶೇಷಗಳಡಿಯಲ್ಲಿ ಕನಿಷ್ಠ 20 ಮಂದಿ ಸಿಲುಕಿರುವುದಾಗಿ ಜಿಲ್ಲಾ ಪ್ರಕೋಪ ನಿರ್ವಹಣಾ ನಿಯಂತ್ರಣ ಕೊಠಡಿ ಅಧಿಕಾರಿ ಅಸ್ಮಿತಾ ನಿಕಂ ತಿಳಿಸಿದ್ದಾರೆ.

ನಾಲ್ಕು ಅಂತಸ್ತಿನ ಈ ಕಟ್ಟಡವು ಇಂದು ಶುಕ್ರವಾರ ಬೆಳಗ್ಗೆ ಸುಮಾರು 9 ಗಂಟೆಯ ಹೊತ್ತಿಗೆ ಕುಸಿಯಿತೆಂದು ಪ್ರಾದೇಶಿಕ ಪ್ರಕೋಪ ನಿರ್ವಹಣಾ ಕೇಂದ್ರದ ಮುಖ್ಯಸ್ಥ ಸಂತೋಷ್‌ ಕದಂ ವರದಿಗಾರರಿಗೆ ತಿಳಿಸಿದರು. 

ಮೃತ ಯುವತಿಯನ್ನು ರುಕ್ಸಾನಾ ಖಾನ್‌ ಎಂದು ಗುರುತಿಸಲಾಗಿದ್ದು ಆಕೆಯ ಶವವನ್ನು ಹಾಗೂ ಇನ್ನೂ ಐವರು ಗಾಯಾಳುಗಳನ್ನು ಅವಶೇಷಗಳೆಡೆಯಿಂದ ಹೊರತೆಗೆಯಲಾಗಿದೆ. ಗಾಯಳುಗಳನ್ನು ಇಂದಿರಾ ಗಾಂಧಿ ಸರಕಾರಿ ಅಸ್ಪತ್ರೆಗೆ ಸೇರಿಸಲಾಗಿದೆ ಎಂದು ನಿಕಂ ತಿಳಿಸಿದ್ದಾರೆ.