ನೇಪಾಲಿ ಪೊಲೀಸರ ಗುಂಡಿಗೆ ಭಾರತೀಯ ಬಲಿ

ಪಟ್ನಾ/ಹೊಸದಿಲ್ಲಿ: ಚೀನದ ದುಷ್ಪ್ರಭಾವದಿಂದ ಭಾರತದ ಜತೆ ಗಡಿ ತಂಟೆ ಆರಂಭಿಸಿರುವ ನೇಪಾಲವು ಹಾದಿ ತಪ್ಪುವ ಲಕ್ಷಣಗಳಿವೆ. ನೇಪಾಲದ ಸಶಸ್ತ್ರ ಪೊಲೀಸ್‌(ಎಪಿಎಫ್) ಪಡೆಯು ಬಿಹಾರದ ಸೀತಾಮರ್ಹಿ ಜಿಲ್ಲೆಗೆ ಹೊಂದಿಕೊಂಡಿರುವ ಗಡಿ ಭಾಗದಲ್ಲಿ ಗುಂಡು ಹಾರಿಸಿದ್ದರಿಂದ ಒಬ್ಬ ಭಾರತೀಯ ಅಸುನೀಗಿದ್ದಾನೆ, ಇಬ್ಬರು ಗಾಯಗೊಂಡಿದ್ದಾರೆ.

ಮೃತ ಭಾರತೀಯನನ್ನು ವಿಕಾಸ್‌ ಯಾದವ್‌ (22) ಎಂದು ಗುರುತಿಸಲಾಗಿದೆ. ಘರ್ಷಣೆ ಸಂಬಂಧ ಲಾಗನ್‌ ಯಾದವ್‌ (45) ಎಂಬಾತನನ್ನು ನೇಪಾಲದ ಸಶಸ್ತ್ರ ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ಘಟನೆಗೆ ಕಾರಣವೇನು?
ಲಾಗನ್‌ ಯಾದವ್‌ನ ನೇಪಾಲಿ ಸೊಸೆ ಗಡಿಯಲ್ಲಿ ಭಾರತೀಯರ ಜತೆಗೆ ಮಾತುಕತೆ ನಡೆಸುತ್ತಿದ್ದರು. ಅದಕ್ಕೆ ಎಪಿಎಫ್ ಸಿಬಂದಿ ತಕರಾರು ತೆಗೆದಿದ್ದು, ಮಾತಿಗೆ ಮಾತು ಬೆಳೆದು ಘರ್ಷಣೆ ಹಂತ ತಲುಪಿತು. ಭಾರತದ ಕಡೆಯಿಂದ 75-80 ಮಂದಿ ಸೇರಿದ್ದು, ಗುಂಪು ಚದುರಿ ಸಲು ಗುಂಡು ಹಾರಿಸ ಬೇಕಾಯಿತು ಎಂದು ಎಪಿಎಫ್ ಹೇಳಿದೆ.