ಒಬ್ಬ ಹೀರೋ ನಾಲ್ಕು ಲವ್‌ಸ್ಟೋರಿ

ನಟ ಜಗ್ಗೇಶ್‌ ಪುತ್ರ ಗುರುರಾಜ್‌ ಚಿತ್ರರಂಗಕ್ಕೆ ಬಂದಿರೋದು ನಿಮಗೆ ಗೊತ್ತೇ ಇದೆ. ಈಗ ಅವರ ನಟನೆಯ ಸಿನಿಮಾವೊಂದು ಬಿಡುಗಡೆಗೆ ಅಣಿಯಾಗಿದೆ. ಅದು ‘ವಿಷ್ಣು ಸರ್ಕಲ್’. ತುಂಬಾ ದಿನಗಳಿಂದ ಈ ಚಿತ್ರದ ಹೆಸರು ಕೇಳಿಬರುತ್ತಿದ್ದರೂ, ಚಿತ್ರ ಯಾವಾಗ ಬಿಡುಗಡೆಯಾಗುತ್ತದೆಂಬುದನ್ನು ಚಿತ್ರತಂಡ ಹೇಳಿರಲಿಲ್ಲ. ಈಗ ಚಿತ್ರತಂಡ ಬಿಡುಗಡೆಯ ಸನಿಹಕ್ಕೆ ಬಂದಿದ್ದು, ಚಿತ್ರ ಇಂದು ತೆರೆಕಾಣುತ್ತಿದೆ. ಈ ಹಿಂದೆ ‘ಹಾಫ್ ಮೆಂಟಲ್’ ಚಿತ್ರ ನಿರ್ದೇಶಿಸಿದ್ದ ಲಕ್ಷ್ಮೀ ದಿನೇಶ್‌ ಈ ಚಿತ್ರದ ನಿರ್ದೇಶಕರು. ಈ ಹಿಂದಿನ ಚಿತ್ರಕ್ಕೆ ಹೋಲಿಸಿದರೆ ‘ವಿಷ್ಣು ಸರ್ಕಲ್’ ಹೊಸ ಬಗೆಯ ಕಥೆಯೊಂದಿಗೆ ಸಾಗುತ್ತದೆಯಂತೆ. ಚಿತ್ರದಲ್ಲಿ ನಾಲ್ಕು ಲವ್‌ಸ್ಟೋರಿ ಇದ್ದು, ಮೂರು ಲವ್‌ಸ್ಟೋರಿ ಹೀರೋ ಸುತ್ತವೇ ಸುತ್ತಲಿದೆ ಎಂದು ವಿವರ ನೀಡಿದರು ನಿರ್ದೇಶಕರು. ಈ ಚಿತ್ರವನ್ನು ವಿಷ್ಣುವರ್ಧನ್‌ ಅವರ ಅಭಿಮಾನಿಯಾಗಿರುವ ಆರ್‌.ಭಾಸ್ಕರ್‌ ನಿರ್ಮಿಸಿದ್ದಾರೆ. ನಿರ್ದೇಶಕರು ಮಾಡಿಕೊಂಡಿದ್ದ ಕಥೆಗೆ ವಿಷ್ಣು ಅವರ ಕುರಿತಾದ ಒಂದಷ್ಟು ಅಂಶಗಳನ್ನು ಸೇರಿಸಿ ಈ ಸಿನಿಮಾ ಮಾಡಲಾಯಿತಂತೆ.

ಗುರುರಾಜ್‌ಗೆ ನಾಯಕಿಯರಾಗಿ, ಸಂಹಿತಾ ವಿನ್ಯಾ, ಡಾ. ಜಾಹ್ನವಿ ಜ್ಯೋತಿ, ದಿವ್ಯಾ ಗೌಡ ಜೋಡಿಯಾಗಿದ್ದಾರೆ. ಉಳಿದಂತೆ ಹಿರಿಯ ನಟ ದತ್ತಣ್ಣ, ಪಟ್ರೆ ನಾಗರಾಜ್‌, ಶಿವಮಂಜು ಮತ್ತಿತರರು ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ‘ವಿಷ್ಣು ಸರ್ಕಲ್’ ಚಿತ್ರದ ಹಾಡುಗಳಿಗೆ ಶ್ರೇಯಾ ವತ್ಸ ಹಾಗೂ ಪ್ರದೀಪ್‌ ವರ್ಮ ಸಂಗೀತ ಸಂಯೋಜಿಸಿದ್ದಾರೆ. ಚಿತ್ರದಲ್ಲಿ ನಟಿಸಿದವರೆಲ್ಲರೂ ಸಿನಿಮಾದಲ್ಲಿನ ಅನುಭವ ಹಂಚಿಕೊಂಡರು. ಸೆ.18 ವಿಷ್ಣುವರ್ಧನ್‌ ಅವರ ಹುಟ್ಟುಹಬ್ಬ. ಅದಕ್ಕಿಂತ ಮುಂಚೆಯೇ ವಿಷ್ಣು ಅವರ ಅಭಿಮಾನದ ಕುರಿತಾದ ಸಿನಿಮಾ ಬಿಡುಗಡೆಯಾಗುತ್ತಿರುವುದರಿಂದ ಚಿತ್ರತಂಡ ಖುಷಿಯಾಗಿದೆ.