ಹೊಸಬರ ಒನ್‌ ಅಂಡ್‌ ಹಾಫ್; ಕಾಮಿಡಿಯಲ್ಲಿ ಹೊಸ ಪ್ರಯೋಗ

ಕನ್ನಡದಲ್ಲಿ ಈಗ ಹೊಸಬರ ಚಿತ್ರಗಳ ಮೇಲೆ ನಿರೀಕ್ಷೆ ತುಸು ಹೆಚ್ಚೇ ಇದೆ. ಅದರಲ್ಲೂ ಹೊಸಬರ ಚಿತ್ರಗಳ ಶೀರ್ಷಿಕೆಗಳು ಕೂಡ ಸಾಕಷ್ಟು ಗಮನಸೆಳೆಯುತ್ತಿರುವುದು ಹೊಸದೇನಲ್ಲ. ಈಗ ಆ ಸಾಲಿಗೆ “ಒನ್‌ ಅಂಡ್‌ ಹಾಫ್’ ಎಂಬ ಚಿತ್ರವೂ ಸೇರಿದೆ. ಹೌದು, ಇದು ಹೊಸಬರೇ ಸೇರಿ ಮಾಡಲು ಹೊರಟಿರುವ ಚಿತ್ರ. ಶೀರ್ಷಿಕೆ ಕೇಳಿದವರಿಗೆ, ವಿಶೇಷ ಎನಿಸದೇ ಇರದು.

“ಒನ್‌ ಅಂಡ್‌ ಹಾಫ್’ ಕಂಪ್ಲೀಟ್‌ ಹೊಸ ಪ್ರಯೋಗದ ಚಿತ್ರ. ಈ ಚಿತ್ರಕ್ಕೆ ಶ್ರೇಯಸ್‌ ಹೀರೋ. ಇನ್ನು, ಚಿತ್ರವನ್ನು ಭಾರ್ಗವ್‌ ಯೋಗಂಬರ್‌ ನಿರ್ದೇಶನ ಮಾಡುತ್ತಿದ್ದಾರೆ. ಇದು ಇವರ ಎರಡನೇ ನಿರ್ದೇಶನದ ಚಿತ್ರ. ಈ ಹಿಂದೆ ಸಸ್ಪೆನ್ಸ್‌ ಥ್ರಿಲ್ಲರ್‌ ಅಂಶವಿರುವ “ಡೇವಿಡ್‌’ ಎಂಬ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಆ ಚಿತ್ರ ಇನ್ನೇನು ಬಿಡುಗಡೆಯಾಗಬೇಕಿದೆ.

“ಒನ್‌ ಅಂಡ್‌ ಹಾಫ್’ ಚಿತ್ರದ ನಾಯಕ ಶ್ರೇಯಸ್‌ ಕೂಡ “ಡೇವಿಡ್‌’ ಚಿತ್ರದ ಹೀರೋ ಆಗಿದ್ದವರು. “ಡೇವಿಡ್‌’ ಚಿತ್ರೀಕರಣ ಸಂದರ್ಭದಲ್ಲೇ ಈ ಚಿತ್ರದ ಕಥೆ ಕೇಳಿದ ಶ್ರೇಯಸ್‌, ಚಿತ್ರ ಒಪ್ಪಿದ್ದಾರೆ. “ಡೇವಿಡ್‌’ ತಂಡವೇ “ಒನ್‌ ಅಂಡ್‌ ಹಾಫ್’ ಚಿತ್ರಕ್ಕೂ ಕೆಲಸ ಮಾಡುತ್ತಿರುವುದು ವಿಶೇಷ.
ಅಂದಹಾಗೆ, “ಒನ್‌ ಅಂಡ್‌ ಹಾಫ್’ ಒಂದು ಅಡಲ್ಟ್ ಕಾಮಿಡಿ ಕಥೆ ಹೊಂದಿರುವ ಚಿತ್ರ. ಇಲ್ಲಿ ಇಡೀ ಸಿನಿಮಾ ಹಾಸ್ಯದಲ್ಲೇ ಸಾಗಲಿದೆ. ಹಾಗಂತ, ಎಲ್ಲೂ ಅಸಹ್ಯ ಹುಟ್ಟಿಸುವ ಸಂಭಾಷಣೆಯಾಗಲಿ, ದೃಶ್ಯವಾಗಲಿ ಕಾಣಸಿಗುವುದಿಲ್ಲ. ಈ ಚಿತ್ರದ ಬಗ್ಗೆ ಹೇಳಿಕೊಳ್ಳುವ ನಾಯಕ ಶ್ರೇಯಸ್‌, ಇಲ್ಲಿ ಹೊಸತನಕ್ಕೆ ಹೆಚ್ಚು ಜಾಗವಿದೆ.

ಈ ರೀತಿಯ ಪ್ರಯತ್ನ, ಹಿಂದೆ ಆಗಿಲ್ಲ. ಕನ್ನಡ ಮಾತ್ರವಲ್ಲ, ಬೇರೆ ಭಾಷೆಯಲ್ಲೂ ಇಂತಹ ಸಬೆjಕ್ಟ್ ಇಲ್ಲ. ಹಾಗಾಗಿ, ಕನ್ನಡದ ಜೊತೆಗೆ ಈ ಚಿತ್ರವನ್ನು ಬೇರೆ ಭಾಷೆಯಲ್ಲೂ ತಯಾರು ಮಾಡು ಕುರಿತು ಚರ್ಚಿಸಲಾಗುತ್ತಿದೆ. ಇನ್ನೊಂದು ವಿಷಯವೆಂದರೆ, ದೊಡ್ಡ ಬ್ಯಾನರ್‌ನಲ್ಲಿ ಈ ಚಿತ್ರ ತಯಾರಾಗುತ್ತಿದ್ದು, ಇನ್ನೆರೆಡು ದಿನಗಳಲ್ಲಿ ಚಿತ್ರದ ಬಗ್ಗೆ ಸಂಪೂರ್ಣ ಮಾಹಿತಿ ಹೊರಬರಲಿದೆ’ ಎಂದಷ್ಟೇ ಹೇಳುತ್ತಾರೆ ನಾಯಕ ಶ್ರೇಯಸ್‌. ಈ ಚಿತ್ರದಲ್ಲಿ ಒಟ್ಟು ಮೂವರು ನಾಯಕಿಯರು ಇರಲಿದ್ದಾರೆ.

ಚಿತ್ರಕ್ಕೆ ಹಾಲಿವುಡ್‌ನ‌ ಸ್ಟೀವ್‌ ರೇಸ್‌ ಕ್ಯಾಮೆರಾ ಹಿಡಿಯುತ್ತಿದ್ದಾರೆ. ಮೂಲತಃ ಆಸ್ಟ್ರೇಲಿಯಾದವರಾ ಸ್ಟೀವ್‌ ರೇಸ್‌, “ಡೇವಿಡ್‌’ ಚಿತ್ರಕ್ಕೂ ಛಾಯಾಗ್ರಹಣ ಮಾಡಿದ್ದಾರೆ. ಈ ಚಿತ್ರದಲ್ಲಿ ನಾಲ್ಕು ಹಾಡುಗಳಿರಲಿದ್ದು, ಸಂಗೀತ ನಿರ್ದೇಶಕರಿನ್ನೂ ಅಂತಿಮವಾಗಿಲ್ಲ. “ಡೇವಿಡ್‌’ ಮೇ ತಿಂಗಳಲ್ಲಿ ಬಿಡುಗಡೆಯಾಗಲಿದ್ದು, ಅದೇ ತಿಂಗಳಲ್ಲಿ “ಒನ್‌ ಅಂಡ್‌ ಹಾಫ್’ ಚಿತ್ರಕ್ಕೂ ಚಾಲನೆ ಸಿಗಲಿದೆ ಎಂಬುದು ಚಿತ್ರತಂಡದ ಮಾತು.