Social media Love; ಪ್ರಿಯಕರನ ಭೇಟಿಗೆ ಪಾಕ್‌ಗೆ ತೆರಳಿದ ಚೀನಾದ ಯುವತಿ!

ಇಸ್ಲಾಮಾಬಾದ್ : ಪಾಕಿಸ್ತಾನದಿಂದ ಭಾರತಕ್ಕೆ ಬಂದು ಸಚಿನ್‌ ನನ್ನ ಮದುವೆಯಾದ ಸೀಮಾ ಹೈದರ್‌ , ಅಂಜು ಎಂಬಾಕೆ ಭಾರತದಿಂದ ಪಾಕಿಸ್ತಾನಕ್ಕೆ ತೆರಳಿ ನಸ್ರುಲ್ಲಾನೊಂದಿಗೆ ಜತೆಯಾಗಿರುವ ಘಟನೆಗಳು ಭಾರಿ ಸುದ್ದಿಯಲ್ಲಿರುವ ವೇಳೆಯಲ್ಲೇ ಚೀನಾದ ಯುವತಿಯೊಬ್ಬಳು ಪ್ರಿಯಕರನ್ನು ಭೇಟಿಯಾಗಲು ಪಾಕಿಸ್ತಾನಕ್ಕೆ ತೆರಳಿರುವ ಬಗ್ಗೆ ವರದಿಯಾಗಿದೆ.

ಸಾಮಾಜಿಕ ಮಾಧ್ಯಮದಲ್ಲಿ ಸ್ನೇಹ ಬೆಳೆಸಿ ಪ್ರೀತಿಸುತ್ತಿದ್ದ 21 ವರ್ಷದ ಚೀನಾದ ಯುವತಿ ಪಾಕಿಸ್ತಾನದ 18 ವರ್ಷದ ಯುವಕನನ್ನು ಭೇಟಿಯಾಗಲು ಖೈಬರ್ ಪಖ್ತುಂಖ್ವಾ ಪ್ರಾಂತ್ಯಕ್ಕೆ ಆಗಮಿಸಿದ್ದಾಳೆ ಎಂದು ಪೊಲೀಸರು ಗುರುವಾರ ತಿಳಿಸಿದ್ದಾರೆ.

ಗಾವೊ ಫೆಂಗ್ ಎಂದು ಗುರುತಿಸಿರುವ ಮಹಿಳೆ ಮೂರು ತಿಂಗಳ ಭೇಟಿ ವೀಸಾದಲ್ಲಿ ಚೀನಾದಿಂದ ಗಿಲ್ಗಿಟ್ ಮೂಲಕ ರಸ್ತೆ ಮಾರ್ಗವಾಗಿ ಬುಧವಾರ ಇಸ್ಲಾಮಾಬಾದ್‌ಗೆ ಬಂದಿದ್ದಾಳೆ. ಯುವತಿಯನ್ನು ಅಫ್ಘಾನಿಸ್ತಾನದ ಗಡಿಯಲ್ಲಿರುವ ಬಜೌರ್ ಬುಡಕಟ್ಟು ಜಿಲ್ಲೆಯ ನಿವಾಸಿ ಜಾವೇದ್ ಕರೆದೊಯ್ದಿದ್ದಾನೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.

ಸಮರ್‌ಬಾಗ್ ಪ್ರದೇಶದಲ್ಲಿ ಯುವತಿಗೆ ಸಂಪೂರ್ಣ ಭದ್ರತೆ ಒದಗಿಸಲಾಗಿದೆ ಎಂದು ಲೋವರ್ ದಿರ್ ಜಿಲ್ಲೆಯ ಜಿಲ್ಲಾ ಪೊಲೀಸ್ ಅಧಿಕಾರಿ ಜಿಯಾವುದ್ದೀನ್ ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಆದಾಗ್ಯೂ, ಮೊಹರಂ ಮತ್ತು ಭದ್ರತಾ ಕಾಳಜಿಯಿಂದಾಗಿ ಆಕೆಗೆ ಮುಕ್ತ ಸಂಚಾರವನ್ನು ಒದಗಿಸಲಾಗುತ್ತಿಲ್ಲ ಎಂದು ತಿಳಿಸಿದ್ದಾರೆ.

ಆಕೆಯ ಪ್ರಯಾಣ ದಾಖಲೆಗಳು ಸರಿಯಾಗಿವೆ, ಜಾವೇದ್‌ನೊಂದಿಗೆ ಇನ್ನೂ‘ನಿಕಾಹ್’ ಮಾಡಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.