Norway ಚೆಸ್‌ ಕೂಟ: ಪ್ರಜ್ಞಾನಂದಗೆ ಗೆಲುವು

ಸ್ಟಾವಂಗರ್‌ (ನಾರ್ವೆ): ಭಾರತದ ಗ್ರ್ಯಾನ್‌ಮಾಸ್ಟರ್‌ ಆರ್‌. ಪ್ರಜ್ಞಾನಂದ ಅವರು ನಾರ್ವೆ ಚೆಸ್‌ ಚಾಂಪಿಯನ್‌ಶಿಪ್‌ನ ಮೊದಲ ಸುತ್ತಿನ ಆರ್ಮಗೆಂಡನ್‌ ಗೇಮ್‌ನಲ್ಲಿ ಫ್ರಾನ್ಸ್‌ನ ಫಿರೋಜ ಅಲಿರೆಝ ಅವರನ್ನು ಸೋಲಿಸಿದರು.

ಸಮಯ ನಿಯಂತ್ರಿತ ಅವಧಿಯಲ್ಲಿ ಇವರಿಬ್ಬರ ನಡುವಿನ ಪಂದ್ಯವು ಡ್ರಾದಲ್ಲಿ ಅಂತ್ಯಗೊಂಡಿತ್ತು. ಆಬಳಿಕ ನಡೆದ ಆರ್ಮಗೆಂಡನ್‌ ಗೇಮ್‌ನಲ್ಲಿ ಅಮೋಘವಾಗಿ ಆಡಿದ ಪ್ರಜ್ಞಾನಂದ ಅವರು ಅಲಿರೆಝ ಅವರನ್ನು ಕೆಡಹಲು ಯಶಸ್ವಿಯಾದರು.

ವಿಶ್ವದ ನಂಬರ್‌ ವನ್‌ ಖ್ಯಾತಿಯ ಮ್ಯಾಗ್ನಸ್‌ ಕಾರ್ಲ್ಸನ್‌ ಹಾಲಿ ವಿಶ್ವ ಚಾಂಪಿಯನ್‌ ಡಿಂಗ್‌ ಲಿರೆನ್‌ ಅವರನ್ನು ಸೋಲಿಸಿದರೆ ಹಿಕಾರು ನಕಮುರ ಅವರು ಅಮೆರಿಕದ ಫಾಬಿಯಾನೊ ಕರುವಾನ ಅವರನ್ನು ಪರಾಭವಗೊಳಿಸಿದರು.

ಮೊದಲ ಸುತ್ತಿನ ಬಳಿಕ ಪ್ರಜ್ಞಾನಂದ, ಕಾರ್ಲ್ಸನ್‌ ಮತ್ತು ನಕಮುರ ಅವರು 1.5 ಅಂಕಗಳೊಂದಿಗೆ ಮುನ್ನಡೆಯಲ್ಲಿದ್ದರೆ ಅಲಿರೆಝ, ಲಿರೆನ್‌ ಮತ್ತು ಕುರುವಾನ ಅರ್ಧ ಅಂಕ ಹಿನ್ನೆಡೆಯಲ್ಲಿದ್ದಾರೆ.