Northamptonshire: ಕೌಂಟಿ ಕ್ರಿಕೆಟ್‌ನಲ್ಲಿ ಕರುಣ್‌ ನಾಯರ್‌ ದ್ವಿಶತಕ

ನಾರ್ಥಾಂಪ್ಟನ್‌: ಟೆಸ್ಟ್‌ ಕ್ರಿಕೆಟ್‌ನಲ್ಲಿ ತ್ರಿಶತಕ ಬಾರಿಸಿಯೂ ಮೂಲೆಗುಂಪಾದ ಕರ್ನಾಟಕದ ಮಧ್ಯಮ ಕ್ರಮಾಂಕದ ಬ್ಯಾಟರ್‌ ಕರುಣ್‌ ನಾಯರ್‌, ಇಂಗ್ಲಿಷ್‌ ಕೌಂಟಿ ಕ್ರಿಕೆಟ್‌ನಲ್ಲಿ ದ್ವಿಶತಕ ಬಾರಿಸಿ ಸುದ್ದಿಯಾಗಿದ್ದಾರೆ.

ಕೌಂಟಿ ಚಾಂಪಿಯನ್‌ಶಿಪ್‌ ಡಿವಿಷನ್‌-2 ಚಾಂಪಿಯನ್‌ಶಿಪ್‌ನಲ್ಲಿ ನಾರ್ಥಾಂಪ್ಟನ್‌ಶೈರ್‌ ಕೌಂಟಿಯನ್ನು ಪ್ರತಿನಿಧಿಸುತ್ತಿರುವ ನಾಯರ್‌, ಗ್ಲಾಮರ್ಗನ್‌ ವಿರುದ್ಧ ಅಜೇಯ 202 ರನ್‌ ಹೊಡೆದು ಫಾರ್ಮ್ ಪ್ರದರ್ಶಿಸಿದ್ದಾರೆ.

ಕರುಣ್‌ ನಾಯರ್‌ 4ನೇ ಕ್ರಮಾಂಕದಲ್ಲಿ ಆಡಲಿಳಿದಿದ್ದರು. 253 ಎಸೆತಗಳನ್ನು ಎದುರಿಸಿದ ಅವರು 21 ಬೌಂಡರಿ, 2 ಸಿಕ್ಸರ್‌ ಬಾರಿಸಿದರು. ಸೈದ್‌ ಜೆಯಿಬ್‌ ಜತೆಗೂಡಿ 6ನೇ ವಿಕೆಟಿಗೆ 212 ರನ್‌ ಜತೆಯಾಟದಲ್ಲಿ ಭಾಗಿಯಾದರು. ಜೆಯಿಬ್‌ 100 ರನ್‌ ಹೊಡೆದರು. ಇವರ ಸಾಹಸದಿಂದ ನಾರ್ಥಾಂಪ್ಟನ್‌ಶೈರ್‌ 6ಕ್ಕೆ 605 ರನ್‌ ಬಾರಿಸಿ ಡಿಕ್ಲೇರ್‌ ಮಾಡಿತು. ಇದರಿಂದ ತಂಡಕ್ಕೆ 334 ರನ್‌ ಮುನ್ನಡೆ ಲಭಿಸಿತು.