ಹೊಸದಿಲ್ಲಿ: ಗ್ರೇಟರ್ ನೋಯ್ಡಾದ ಅತಿದೊಡ್ಡ ಸ್ಕ್ರ್ಯಾಪ್ ಮಾಫಿಯಾದ ಕುಖ್ಯಾತ ದರೋಡೆಕೋರ, ಸ್ಟೀಲ್ ಸ್ಮಗ್ಲರ್ ರವಿ ಕಾನಾ ಮತ್ತು ಆತನ ಪ್ರೇಯಸಿ ಕಾಜಲ್ ಝಾ ಅವರನ್ನು ಥಾಯ್ಲೆಂಡ್‌ನಲ್ಲಿ ಬಂಧಿಸಲಾಗಿದೆ.
ಬಹಳ ದಿನಗಳಿಂದ ತಲೆಮರೆಸಿಕೊಂಡಿದ್ದ ರವಿಕಾನಾ ಮತ್ತು ಕಾಜಲ್ ಝಾ ರನ್ನು ಭಾರತಕ್ಕೆ ಕರೆತರಲು ನೋಯ್ಡಾ ಪೊಲೀಸರು ಔಪಚಾರಿಕ ಕೆಲಸಗಳನ್ನು ನಡೆಸುತ್ತಿದ್ದಾರೆ ಎಂದು ಮಾಹಿತಿ ಲಭ್ಯವಾಗಿದೆ.
ತಲೆಮರೆಸಿಕೊಂಡಿರುವ ಇಬ್ಬರ ವಿರುದ್ಧ ನೋಯ್ಡಾ ಪೊಲೀಸರು ಲುಕ್‌ಔಟ್ ಮತ್ತು ರೆಡ್ ಕಾರ್ನರ್ ನೋಟಿಸ್ ಜಾರಿ ಮಾಡಿದ್ದರು. ಥಾಯ್ಲೆಂಡ್‌ಗೆ ಪರಾರಿಯಾಗಿದ್ದಾರೆ ಎಂಬ ಖಚಿತ ಮಾಹಿತಿ ಪೊಲೀಸರಿಗೆ ಸಿಕ್ಕಿತ್ತು. ದರೋಡೆಕೋರ ರವಿ ಕಾನಾ ವಿರುದ್ಧ ದರೋಡೆಕೋರ ಕಾಯ್ದೆಯಡಿ ಸಾಮೂಹಿಕ ಅತ್ಯಾಚಾರ ಪ್ರಕರಣ ದಾಖಲಾಗಿದೆ.
2024 ಜನವರಿ 1 ರಂದು ರವಿ ಕಾನಾ ವಿರುದ್ಧ ಮಹಿಳೆಯೊಬ್ಬರು ಅತ್ಯಾಚಾರ ಪ್ರಕರಣವನ್ನು ದಾಖಲಿಸಿದ ನಂತರ ಪೊಲೀಸರು ಆತನಿಗಾಗಿ ಹುಡುಕಾಟ ನಡೆಸುತ್ತಿದ್ದರು. ಆತನ ಅಡಗುತಾಣಗಳ ಮೇಲೆ ಪೊಲೀಸರು ದಾಳಿ ನಡೆಸಿ ಶೋಧ ನಡೆಸಿದ್ದರು. ಪೊಲೀಸರು ಪ್ರೇಯಸಿ ಕಾಜಲ್ ಝಾ ವಿರುದ್ಧವೂ ಪ್ರಕರಣ ದಾಖಲಿಸಿದ್ದರು. ಈಗಾಗಲೇ ಬಂಧನಕ್ಕೊಳಗಾಗಿದ್ದ ರವಿ ಕಾನ ಪತ್ನಿ ಸೇರಿದಂತೆ 14 ಮಂದಿ ವಿರುದ್ಧವೂ ಪ್ರಕರಣ ದಾಖಲಾಗಿತ್ತು.
ಪೊಲೀಸರು ರವಿ ಕಾನಾನನ್ನು ಅಕ್ರಮ ಚಟುವಟಿಕೆಗಳ ಕಿಂಗ್‌ಪಿನ್ ಎಂದು ಗೊತ್ತುಪಡಿಸಿದ್ದರು, ಪ್ರೇಯಸಿ ಕೂಡ ಅವನ ಅಪರಾಧ ಕೃತ್ಯಗಳಲ್ಲಿ ಸಮಾನ ಪಾಲುದಾರಳು ಎಂದು ಪರಿಗಣಿಸಲಾಗಿದೆ ಎಂದು ನ್ಯಾಯಾಲಯಕ್ಕೆ ಸಲ್ಲಿಸಿದ 500 ಪುಟಗಳ ಆರೋಪಪಟ್ಟಿಯಲ್ಲಿ ತಿಳಿಸಲಾಗಿದೆ.
11 ನೇ ಪ್ರಕರಣ
ಮಹಿಳೆಯೊಬ್ಬರು ಹನ್ನೊಂದನೇ ಪ್ರಕರಣ ದಾಖಲಿಸುವ ಮುನ್ನ ರವಿ ಕಾನಾ ವಿರುದ್ಧ 10 ಪ್ರಕರಣಗಳು ದಾಖಲಾಗಿದ್ದವು. ಇದು ನೋಯ್ಡಾದ ಸೆಕ್ಟರ್ 39 ಪೊಲೀಸ್ ಠಾಣೆಯಲ್ಲಿ ದರೋಡೆಕೋರನ ವಿರುದ್ಧ 2023 ಡಿಸೆಂಬರ್ 30 ರಂದು ದಾಖಲಾದ ಅತ್ಯಾಚಾರ ಪ್ರಕರಣವಾಗಿದೆ.
