ಆಧಾರ್‌ ಇಲ್ಲದ ಕಾರಣಕ್ಕೆ ಚಿಕಿತ್ಸೆ ನಿರಾಕರಣೆ ? ಮಹಿಳೆಯ ಸಾವು

ಹೊಸದಿಲ್ಲಿ : ಆಧಾರ್‌ ಕಾರ್ಡ್‌ ಇಲ್ಲವೆಂಬ ಕಾರಣಕ್ಕೆ ಚಿಕಿತ್ಸೆ ನಿರಾಕರಿಸಲ್ಪಟ್ಟರೆನ್ನಲಾದ  ಕಾರ್ಗಿಲ್‌ ಯೋಧನ  ಪತ್ನಿ  ಖಾಸಗಿ ಆಸ್ಪತ್ರೆಯಲ್ಲಿ ಮೃತಪಟ್ಟಿರುವ ಅಮಾನುಷ ಘಟನೆ ಹರಿಯಾಣದ ಸೋನಿಪತ್‌ ನಲ್ಲಿ ನಡೆದಿದೆ.

“ತೀವ್ರ ಅನಾರೋಗ್ಯ ಪೀಡಿತರಾಗಿದ್ದ  ನನ್ನ ತಾಯಿಗೆ ಚಿಕಿತ್ಸೆ ದೊರಕಿಸಲು ನಾನು ಆಕೆಯನ್ನು ಖಾಸಗಿ ಆಸ್ಪತ್ರೆಗೆ ಒಯ್ದಿದ್ದೆ; ಅಲ್ಲಿ ನಮ್ಮ ಒರಿಜಿನಲ್‌ ಆಧಾರ್‌ ಕಾರ್ಡ್‌ ಕೇಳಿದರು. ನನ್ನ ಬಳಿ ಒರಿಜಿನಲ್‌ ಕಾರ್ಡ್‌ ಇರಲಿಲ್ಲ; ಆದರೆ ಅದರ ಇಮೇಜ್‌ ನನ್ನ  ಸ್ಮಾರ್ಟ್‌ ಫೋನಿನಲ್ಲಿ ಇತ್ತು; ಅದನ್ನು ತೋರಿಸಿದೆ; ಅದನ್ನು ಅವರು ಮಾನ್ಯ ಮಾಡಲಿಲ್ಲ; ಇನ್ನೊಂದು ಅರ್ಧ ತಾಸಿನೊಳಗೆ ನಾನು ಒರಿಜಿನಲ್‌ ಆಧಾರ್‌ ಕಾರ್ಡ್‌ ತಂದು ಕೊಡ್ತೇನೆ, ನೀವು ಚಿಕಿತ್ಸೆ ಆರಂಭಿಸಿ ಎಂದು ನಾನು ಗೋಗರೆದೆ; ಆದರೆ ಅವರು ಅದಕ್ಕೆ ನಿರಾಕರಿಸಿದ. ಸರಿಯಾದ ಹೊತ್ತಿನಲ್ಲಿ ಸೂಕ್ತ ಚಿಕಿತ್ಸೆ ಸಿಗದೆ ನನ್ನ ತಾಯಿ ತೀರಿಕೊಂಡರು’ ಎಂದು ಮೃತ ಮಹಿಳೆಯ ಹಾಗೂ ಕಾರ್ಗಿಲ್‌ ಯೋಧನ ಮಗ ಮಾಧ್ಯಮಕ್ಕೆ ತಿಳಿಸಿದ್ದಾರೆ.

ಆದರೆ ಆಸ್ಪತ್ರೆ ಅಧಿಕಾರಿಗಳು ಈ ಆರೋಪವನ್ನು ಅಲ್ಲಗಳೆದಿದ್ದಾರೆ. ಆಧಾರ್‌ ಕಾರ್ಡ್‌ ಬೇಕಿರುವುದು ದಾಖಲೀಕರಣ ಪ್ರಕ್ರಿಯೆಗೆ ವಿನಾ ಚಿಕಿತ್ಸೆಗಲ್ಲ ಎಂದವರು ಹೇಳಿದ್ದಾರೆ. 

“ನಾವೆಂದೂ ಚಿಕಿತ್ಸೆಯನ್ನು ನಿರಾಕರಿಸಿಲ್ಲ; ದಯವಿಟ್ಟು ನಿಮಗಿದು ತಿಳಿದಿರಲಿ – ರೋಗಿಯನ್ನು ಅವರು ಆಸ್ಪತ್ರೆಗೆ ತರಲೇ ಇಲ್ಲ. ನಾವೆಂದೂ ಆಧಾರ್‌ ಕಾರ್ಡ್‌ ಇಲ್ಲವೆಂಬ ಕಾರಣಕ್ಕೆ  ನಾವು ಈ ತನಕ ಯಾರಿಗೂ ಚಿಕಿತ್ಸೆ ನಿರಾಕರಿಸಿಲ್ಲ” ಎಂದು ಆಸ್ಪತ್ರೆಯಲ್ಲಿನ ವೈದ್ಯರು ಹೇಳಿದ್ದಾರೆ.