Advertisement
ಇನ್ನೊಂದೆಡೆ, ಸೋಮವಾರ ಸಂಜೆ ಸಭೆ ನಡೆಸಿದ ವಿಪಕ್ಷಗಳು ಎನ್‌ಡಿಎ ಅಭ್ಯರ್ಥಿಯ ವಿರುದ್ಧ ತಮ್ಮ ಅಭ್ಯರ್ಥಿಯನ್ನು ಕಣಕ್ಕಿಳಿಸಲು ನಿರ್ಧರಿಸಿವೆ. ಅಭ್ಯರ್ಥಿಯ ಹೆಸರನ್ನು ಮಂಗಳವಾರ ಘೋಷಿಸಲು ನಿರ್ಧರಿಸಲಾಗಿದೆ. ಡಿಎಂಕೆಯ ತಿರುಚಿ ಶಿವ, ಎನ್‌ಸಿಪಿಯ ವಂದನಾ ಚವಾಣ್‌ ಹಾಗೂ ನಾಮನಿರ್ದೇಶಿತ ಸದಸ್ಯ ಕೆ ಟಿಎಸ್‌ ತುಳಸಿ ಹೆಸರು ಪ್ರಸ್ತಾಪ ಆಯಿತು ಎಂದು ಮೂಲಗಳು ತಿಳಿಸಿವೆ. ಈ ಹಿಂದೆ ಟಿಎಂಸಿಯ ಸುಖೇಂದು ಶೇಖರ್‌ ರಾಯ್‌ ಅವರ ಹೆಸರು ಚಾಲ್ತಿಯಲ್ಲಿತ್ತು. ಆದರೆ ಈಗ ವಿಪಕ್ಷ ಪಾಳಯದಿಂದ ಹೊಸ ಹೆಸರುಗಳು ಮುನ್ನಲೆಗೆ ಬಂದಿವೆ. ಸಭೆಯಲ್ಲಿ ಕಾಂಗ್ರೆಸ್‌, ಟಿಎಂಸಿ, ಡಿಎಂಕೆ, ಎಡಪಕ್ಷಗಳು, ಎನ್‌ಸಿಪಿ, ಆರ್‌ಜೆಡಿ, ಟಿಡಿಪಿ ನಾಯಕರು ಭಾಗವಹಿಸಿದ್ದರು.
245 ಸದಸ್ಯ ಬಲದ ರಾಜ್ಯಸಭೆಯಲ್ಲಿ ಉಪಸಭಾಪತಿಯ ಗೆಲುವಿಗೆ 123 ಸಂಖ್ಯಾಬಲ ಬೇಕು. ಬಿಜೆಪಿ 73 ಸದಸ್ಯಬಲ ಹೊಂದಿದ್ದರೆ, ಮಿತ್ರಪಕ್ಷಗಳ ಬಲ 16 ಇದೆ. ಸರ್ಕಾರದಿಂದ ನಾಮನಿರ್ದೇಶನಗೊಂಡವರು 4 ಮಂದಿ ಇದ್ದಾರೆ. ಇನ್ನೊಂದೆಡೆ ಕಾಂಗ್ರೆಸ್‌ 50 ಸ್ಥಾನ ಹೊಂದಿದೆ. ಟಿಎಂಸಿ ಹಾಗೂ ಎಸ್‌ಪಿ ತಲಾ 13, ಎಡಪಕ್ಷಗಳು 7, ಟಿಡಿಪಿ 6, ಆರ್‌ಜೆಡಿ 5, ಡಿಎಂಕೆ ಹಾಗೂ ಎನ್‌ಸಿಪಿ ತಲಾ 4 ಸ್ಥಾನಗಳನ್ನು ಹೊಂದಿವೆ. ಇಲ್ಲಿ ನಿರ್ಣಾಯಕ ಪಾತ್ರವಹಿಸುವವರು ಎಐಎಡಿಎಂಕೆಯ 13, ಬಿಜೆಡಿಯ 9, ಟಿಆರ್‌ಎಸ್‌ನ 6, ಶಿವಸೇನೆಯ 3, ವೈಎಸ್‌ಆರ್‌ನ 2 ಸದಸ್ಯರು. ಈ ಐದು ಪಕ್ಷಗಳು ಯಾರತ್ತ ಒಲವು ತೋರಿಸುತ್ತವೋ ಅವರ ಗೆಲುವು ಖಚಿತ. ನಿತೀಶ್‌ ಹಾಗೂ ವಿಪಕ್ಷದಿಂದ ಅಭ್ಯರ್ಥಿಯನ್ನು ಕಣಕ್ಕಿಳಿಸುವ ಪ್ರಾದೇಶಿಕ ಪಕ್ಷದ ಮಧ್ಯೆ ಸ್ವಂತ ವರ್ಚಸ್ಸಿನ ಮೂಲಕ ತಮ್ಮ ಅಭ್ಯರ್ಥಿಗಳ ಗೆಲುವಿಗೆ ಯಾವ್ಯಾವ ಪಕ್ಷಗಳ ಒಲವು ಗಳಿಸಿಕೊಳ್ಳುತ್ತಾರೆ ಎಂಬುದೇ ಕುತೂಹಲ. ಈ ಪಕ್ಷಗಳ ನಿಲುವು 2019ರ ಲೋಕಸಭಾ ಚುನಾವಣೆಯ ರಾಜಕೀಯ ಧ್ರುವೀಕರಣದ ದಿಕ್ಸೂಚಿಯಾಗಲಿದೆ ಎಂಬುದು ರಾಜಕೀಯ ಪಂಡಿತರ ಲೆಕ್ಕಾಚಾರ.