ಕಂತಿನಲ್ಲಿ ಕೊಂಡ ಕಾರ್‌ ಬೆಲೆ ಹೆಚ್ಚುವಂತೆ ಟೋಲ್‌ ಸಹ ವೆಚ್ಚಕ್ಕಿಂತ ಹೆಚ್ಚಿರುತ್ತದೆ:ಗಡ್ಕರಿ

ನವದೆಹಲಿ: 1900 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣ ಮಾಡಲಾದ ರಸ್ತೆಯಲ್ಲಿ 8000 ಕೋಟಿ ರೂ. ಟೋಲ್‌ ಸಂಗ್ರಹಿಸಿರುವ ವಿಷಯಕ್ಕೆ ಪ್ರತಿಕ್ರಿಯಿಸಿದ ಕೇಂದ್ರ ಸಚಿವ ನಿತಿನ್‌ ಗಡ್ಕರಿ, ಕಂತಿನಲ್ಲಿ ಕೊಂಡ ಕಾರಿನ ಬೆಲೆ ಹೆಚ್ಚುವಂತೆ ಟೋಲ್‌ ದರವೂ ಹೆಚ್ಚಿರುತ್ತದೆ ಎಂದು ಹೇಳಿದ್ದಾರೆ.

ಮಂಗಳವಾರ ಮಾಧ್ಯಮವೊಂದರ ಜತೆ ಮಾತನಾಡಿದ ಅವರು, ದೆಹಲಿ ಜೈಪುರ ಹೈವೇಯನ್ನು ನಿರ್ಮಾಣ ಮಾಡಲು ಸರ್ಕಾರ ಸಾಕಷ್ಟು ವೆಚ್ಚ ಹಾಗೂ ಸಮಸ್ಯೆ ಅನುಭವಿಸಿದೆ. 2009ರಲ್ಲಿ ಯುಪಿಐ ಸರ್ಕಾರ ಈ ರಸ್ತೆಯನ್ನು ಘೋಷಣೆ ಮಾಡಿತು. ಇದರಲ್ಲಿ 9 ಬ್ಯಾಂಕ್‌ಗಳು ಭಾಗಿಯಾಗಿದ್ದವು. ಗುತ್ತಿಗೆದಾರರು ಓಡಿಹೋದರು. ದೆಹಲಿ ಹೈಕೋರ್ಟ್‌ ಸ್ಟೇ ನೀಡಿತು. ಜನ ಒತ್ತುವರಿ ಮಾಡಿಕೊಂಡರು ಎಂದು ಹೇಳಿದರು. ಅಲ್ಲದೇ ಕಾರಿಗೆ ಪೂರ್ಣ ಹಣ ನೀಡಿ ಖರೀದಿ ಮಾಡಿದರೆ ಅದರ ಬೆಲೆ 2.5 ಲಕ್ಷ ರೂ. ಇರಬಹುದು. ಆದರೆ ಅದನ್ನು 10 ವರ್ಷದ ಇಎಂಐಗೆ ಖರೀದಿಸಿದರೆ ಬೆಲೆ 5 ಲಕ್ಷ ರೂ. ದಾಟುತ್ತದೆ. ರಸ್ತೆ ನಿರ್ಮಾಣದಲ್ಲೂ ಇದೇ ಅನ್ವಯವಾಗುತ್ತದೆ ಎಂದರು.