ಅಪಾಯ ಕೈಬೀಸಿ ಕರೆಯುತ್ತಿರುವ ನೀಲೇಶ್ವರ-ಕೋಟಪ್ಪುರ ಕಾಲುಸಂಕ

ಕಾಸರಗೋಡು: ಯಾವುದೇ ಕ್ಷಣದಲ್ಲಿ ಜೀವಾಹುತಿಗಾಗಿ ಬಾಯ್ದೆರೆದು ನಿಂತಿರುವ ನೀಲೇಶ್ವರ ಕೋಟಪ್ಪುರ- ಮಾಟ್ಟುಮ್ಮಲ್‌- ಕಡಿಞಿ ಮೂಲೆ ಕಾಲುಸಂಕಕ್ಕೆ ಕೊನೆಗೂ ಶಾಪಮೋಕ್ಷ ದೊರಕುವ ಸಮಯ ಹತ್ತಿರ ಬಂದಂತಾಗಿದೆ.

ಹಲವು ದಶಕಗಳಿಂದ ದುರಸ್ತಿ ಕಾಣದೆ ಶಿಥಿಲಗೊಂಡು ಯಾವುದೇ ಕ್ಷಣದಲ್ಲೂ ಕುಸಿದು ಬೀಳಲು ಕ್ಷಣಗಣನೆ ಮಾಡುತ್ತಿರುವ ಈ ಕಾಲುಸಂಕದಲ್ಲಿ ಆಚೆ ದಡವನ್ನು ಸೇರಬೇಕಾದರೆ ಪ್ರಯಾಣಿಕರು ಜೀವವನ್ನು ಕೈಯಲ್ಲಿ ಹಿಡಿದು ಸಾಗಬೇಕಾಗಿ ಬರುತ್ತಿತ್ತು. ಜೋರಾಗಿ ಗಾಳಿ ಬೀಸಿದರೂ ಬೀಳಲು ಸಿದ್ಧವಾಗಿರುವ ಈ ಸೇತುವೆಯ ಬದಲಿಗೆ ದೃಢವಾದ ಸೇತುವೆಯನ್ನೇ ನಿರ್ಮಿಸಲು ಊರವರ ಅಭಿವೃದ್ಧಿ ಸಮಿತಿಯನ್ನು ಇತ್ತೀಚೆಗೆ ರಚಿಸಲಾಯಿತು.
ಹಲವು ದಶಕಗಳಿಂದ ಕೋಟ್ಟಪ್ಪುರ- ಕಡಿಞಿಮೂಲೆ ಪ್ರದೇಶದ ನಿವಾಸಿಗಳಿಗೆ ಹಾಗೂ ಪುರತ್ತೆಕೈ,ತೈಕಡಪ್ಪುರ, ಅಯಿತ್ತಲ, ಬೋಟ್‌ಜೆಟ್ಟಿ, ಕೊಟ್ಟಾರ ಮೊದಲಾದ ಪ್ರದೇಶಗಳಿಗೆ ಹೊರ ಜಗತ್ತಿನ ಸಂಪರ್ಕಕ್ಕಾಗಿ ಈ ಕಾಲು ಸಂಕವನ್ನೇ ಆಶ್ರಯಿಸಬೇಕಾಗಿ ಬರುತ್ತಿತ್ತು. ಮೊದಲಾಗಿದ್ದರೆ ದೋಣಿ ಗಳನ್ನು ಆಶ್ರಯಿಸಬೇಕಾಗಿ ಬರುತ್ತಿತ್ತು. 

ಇದಕ್ಕಾಗಿ ನಿರ್ಮಿಸಲಾದ ನಡೆದು ಹೋಗಲು ಮಾತ್ರ ಅವಕಾಶವಿರುವ ಈ ಕಾಲುಸಂಕ ಶಿಥಿಲಗೊಂಡರೂ ಅಧಿಕಾರಿಗಳು ಇದನ್ನು ದುರಸ್ತಿ ಗೊಳಿಸುವ ಗೊಡವೆಗೆ ಹೋಗಲೇ ಇಲ್ಲ. ಇದರಿಂದಾಗಿ ಈ ಕಾಲುಸಂಕ ಹಲವು ವರ್ಷಗಳಿಂದ ಮೃತ್ಯು ಭಯವನ್ನು ಒಡ್ಡುತ್ತಾ ಬರುತ್ತಿತ್ತು.

ಇತ್ತೀಚೆಗೆ ನಿರ್ಮಿಸಿದ ಅಚ್ಚಾಂ ತುರ್ತಿ- ಕೋಟಪ್ಪುರ ಸೇತುವೆಯು ವಾಹನ ಸಂಚಾರಕ್ಕೆ ಮುಕ್ತಗೊಳಿಸುತ್ತಲೇ ಇದೇ ರೀತಿಯಲ್ಲಿದ್ದ ಅಚ್ಚಾಂತುರ್ತಿಯ ಮಂದಿಗೆ ಮಡಕ್ಕರ, ಚೆರುವತ್ತೂರು ಮೂಲಕ ಪಯ್ಯನ್ನೂರಿಗೆ ಸುಲಭದಲ್ಲಿ ತಲುಪಬಹುದಾಗಿದೆ. 

ಅದೇ ರೀತಿಯಲ್ಲಿ ಕೋಟಪ್ಪುರಂ- ಮಾಟ್ಟುಮ್ಮಲ್‌ – ಕಡಿಞಿಮೂಲೆಗೆ ಕಾಲುಸಂಕದ ಬದಲಿಗೆ ದೊಡ್ಡ ಸೇತುವೆ ಯನ್ನೇ ನಿರ್ಮಿಸಲು ನೀಲೇಶ್ವರ ನಗರ ಸಭೆಯು ಕ್ರಿಯಾ ಸಮಿತಿಯನ್ನು ಇತ್ತೀಚೆಗೆ ರಚಿಸಿದೆ.
 
ತೃಕ್ಕರಿಪುರ ಶಾಸಕ ಎಂ. ರಾಜಗೋ ಪಾಲ್‌, ನಗರಸಭಾಧ್ಯಕ್ಷ ಪ್ರೊ| ಕೆ.ಪಿ. ಜಯರಾಜನ್‌ ಮೊದ ಲಾದ ಗಣ್ಯರ ಸಮಕ್ಷಮದಲ್ಲಿ ಸೇತುವೆ ನಿರ್ಮಾಣಕ್ಕೆ ಕ್ರಿಯಾ ಸಮಿತಿಯನ್ನು ರಚಿಸಲಾಗಿದೆ. ಪಿ.ಪಿ. ಮುಹಮ್ಮದ್‌ ರಾಫಿ (ಅಧ್ಯಕ್ಷರು), ಮಾಟ್ಟುಮ್ಮಲ್‌ ಕೃಷ್ಣನ್‌ (ಪ್ರಧಾನ ಕಾರ್ಯದರ್ಶಿ), ಇಬ್ರಾಹಿಂ ಪರಂಬತ್ತ್ (ಕೋಶಾಧಿಕಾರಿ) ಅವರನ್ನೊಳಗೊಂಡ ಕ್ರಿಯಾ ಸಮಿತಿಯು ಇದೀಗ ಸೇತುವೆ ನಿರ್ಮಾಣಕ್ಕಿರುವ ಪ್ರಕ್ರಿಯೆಯಲ್ಲಿ ತೊಡಗಿಕೊಂಡಿದೆ.