Stock Market: ಷೇರುಪೇಟೆ ಸಂವೇದಿ ಸೂಚ್ಯಂಕ 638 ಅಂಕ ಕುಸಿತ; ನಿಫ್ಟಿಯೂ ಇಳಿಕೆ

ಮುಂಬೈ: ಜಾಗತಿಕ ವಿದ್ಯಮಾನಗಳು ಬಾಂಬೆ ಷೇರುಪೇಟೆ ಸೇರಿದಂತೆ ಪ್ರಪಂಚದಾದ್ಯಂತ ಪರಿಣಾಮ ಬೀರಿದ್ದು, ಸೋಮವಾರ (ಅ.07) ಸಂವೇದಿ ಸೂಚ್ಯಂಕ 500ಕ್ಕೂ ಅಧಿಕ ಅಂಕಗಳ ಕುಸಿತದೊಂದಿಗೆ ದಿನಾಂತ್ಯದ ವಹಿವಾಟು ಕೊನೆಗೊಂಡಿದೆ.

ಷೇರುಪೇಟೆಯ ಸಂವೇದಿ ಸೂಚ್ಯಂಕ 638.45 ಅಂಕ ಇಳಿಕೆಯಾಗಿದ್ದು, 81,050 ಅಂಕಗಳಲ್ಲಿ ದಿನಾಂತ್ಯದ ವಹಿವಾಟು ಮುಕ್ತಾಯಗೊಂಡಿದೆ. ಅದೇ ರೀತಿ ಎನ್‌ ಎಸ್‌ ಇ ನಿಫ್ಟಿ 218.80 ಅಂಕಗಳಷ್ಟು ಕುಸಿತದೊಂದಿಗೆ 24,795.08 ಅಂಕಗಳಲ್ಲಿ ವಹಿವಾಟು ಅಂತ್ಯಗೊಂಡಿದೆ.

ಸಂವೇದಿ ಸೂಚ್ಯಂಕ, ನಿಫ್ಟಿ ಕುಸಿತದ ನಡುವೆಯೂ ಐಟಿಸಿ, ಭಾರ್ತಿ ಏರ್‌ ಟೆಲ್‌, ಟ್ರೆಂಟ್‌, ಮಹೀಂದ್ರಾ& ಮಹೀಂದ್ರಾ ಮತ್ತು ಇನ್ಫೋಸಿಸ್‌ ಷೇರುಗಳು ಲಾಭಗಳಿಸಿವೆ. ಮತ್ತೊಂದೆಡೆ ಎನ್‌ ಟಿಪಿಸಿ, ಅದಾನಿ ಪೋರ್ಟ್ಸ್‌, ಅದಾನಿ ಎಂಟರ್‌ ಪ್ರೈಸಸ್‌, ಎಸ್‌ ಬಿಐ, ಕೋಲ್‌ ಇಂಡಿಯಾ ಷೇರುಗಳು ಕುಸಿತ ಕಂಡಿದೆ.

ಐಟಿ ಸೆಕ್ಟರ್‌ ಹೊರತುಪಡಿಸಿ ಪಿಎಸ್‌ ಯು ಬ್ಯಾಂಕ್‌, ಆರೋಗ್ಯ, ಕ್ಯಾಪಿಟಲ್‌ ಗೂಡ್ಸ್‌, ಮೆಟಲ್‌, ರಿಯಲ್ಟಿ ಸೆಕ್ಟರ್‌ ಷೇರುಗಳು ನಷ್ಟ ಕಂಡಿದೆ. ಸೋಮವಾರ ಆರಂಭಿಕ ವಹಿವಾಟಿನಿಂದಲೇ ಷೇರುಪೇಟೆ ಸಂವೇದಿ ಸೂಚ್ಯಂಕ ಭಾರಿ ಪ್ರಮಾಣದಲ್ಲಿ ಕುಸಿತ ಕಾಣುವ ಮೂಲಕ ಹೂಡಿಕೆದಾರರಿಗೆ ಕೋಟ್ಯಂತರ ರೂಪಾಯಿ ನಷ್ಟವಾಗಿದೆ.