ಮುಂದಿನ ತಿಂಗಳು ‘ಮಾಜಿ ಮುಖ್ಯಮಂತ್ರಿ’!

ತುಳು ಚಲನಚಿತ್ರ ನಿರ್ಮಾಪಕರ ಸಂಘದ ಅಧ್ಯಕ್ಷ ರಾಜೇಶ್‌ ಬ್ರಹ್ಮಾವರ ನಿರ್ಮಾಣದ ‘ಕಟಪಾಡಿ ಕಟ್ಟಪ್ಪೆ’ ಸಿನೆಮಾ ಸದ್ಯ ಸೆನ್ಸಾರ್‌ಗೆ ಹೋಗಿದೆ. ಹೆಚ್ಚಾ ಕಡಿಮೆ ಡಿಸೆಂಬರ್‌ನಲ್ಲಿ ಈ ಸಿನೆಮಾ ರಿಲೀಸ್‌ ಆಗುವ ಸಾಧ್ಯತೆಯಿದೆ. ಜೆ.ಪಿ.ತೂಮಿನಾಡ್‌ ನಿರ್ದೇಶನದ ಈ ಸಿನೆಮಾದಲ್ಲಿ ಕೋಸ್ಟಲ್‌ವುಡ್‌ನ‌ ಖ್ಯಾತನಾಮರು ಅಭಿನಯಿಸಿದ್ದಾರೆ. ವಿಶೇಷವೆಂದರೆ ಈ ಸಿನೆಮಾ ರಿಲೀಸ್‌ ಆಗುವ ಮುನ್ನವೇ ರಾಜೇಶ್‌ ಮತ್ತೊಂದು  ಸಿನೆಮಾ ಮಾಡುವ ತುಡಿತದಲ್ಲಿದ್ದಾರೆ. ಟೈಟಲ್‌ ಕೂಡ ಈಗಾಗಲೇ ಅನೌನ್ಸ್‌ ಮಾಡಿದ್ದಾರೆ. ‘ಮಾಜಿ ಮುಖ್ಯಮಂತ್ರಿ’ ಎಂಬ ಹೆಸರಿನಲ್ಲಿ ಸಿನೆಮಾ ರೆಡಿಯಾಗಲಿದೆ. 

ಅಂದಹಾಗೆ, ಮಾಜಿ ಮುಖ್ಯಮಂತ್ರಿ ಯಾರ ಕಥೆ ಎಂಬುದಕ್ಕೆ ಅವರು ಈಗ ಉತ್ತರ ನೀಡುತ್ತಿಲ್ಲ. ಆವಳಿಯ ಮಾಜಿ ಮುಖ್ಯಮಂತ್ರಿಯಾ? ಎಂದು ಪ್ರಶ್ನಿಸಿದರೂ ಅವರು ಉತ್ತರ ನೀಡುತ್ತಿಲ್ಲ. ಮಾಜಿ ಮುಖ್ಯಮಂತ್ರಿಯೊಬ್ಬರ ಇಂಟರೆಸ್ಟಿಂಗ್‌ ಕಥೆಯನ್ನು ಈ ಸಿನೆಮಾದಲ್ಲಿ ತೋರಿಸಲಾಗುವುದು ಎಂದಷ್ಟೇ ಅವರು ಉತ್ತರ ನೀಡಿದ್ದಾರೆ. ಚಿತ್ರನಟ ಯಶ್‌ ಜತೆಗೆ ಕೆಲಸ ಮಾಡಿದ ತ್ರಿಶೂಲ್‌ ಶೆಟ್ಟಿ ಈ ಸಿನೆಮಾಕ್ಕೆ ಆ್ಯಕ್ಷನ್‌ ಕಟ್‌ ಹೇಳಲಿದ್ದಾರೆ. ಮಂಗಳೂರು, ಕಾಸರಗೋಡು, ಕಣ್ಣೂರು ಭಾಗದಲ್ಲಿ ಶೂಟಿಂಗ್‌ ನಡೆಯಲಿದೆ. ಮಾಜಿ ಮುಖ್ಯಮಂತ್ರಿ ಪಾತ್ರ ಯಾರು ಮಾಡಲಿದ್ದಾರೆ? ಎಂದು ಕೇಳಿದಾಗಲೂ ‘ಇಲ್ಲೇ ಇರುವುದು ಸಸ್ಪೆನ್ಸ್‌’ ಎಂದು ನಕ್ಕರು ರಾಜೇಶ್‌. ಅಂದಹಾಗೆ, ತುಳುವಿನಲ್ಲಿ ಹಾಗೂ ಕನ್ನಡದಲ್ಲಿಯೂ ಈ ಸಿನೆಮಾ ಮೂಡಿಬರಲಿದ್ದು, ಸ್ಕ್ರಿಪ್ಟ್  ಹಾಗೂ ಹಾಡು ಎಲ್ಲ ಪೂರ್ಣಗೊಂಡಿದೆ. ಹೆಚ್ಚಾ ಕಡಿಮೆ 60 ಕಲಾವಿದರಿಂದ ಸಿನೆಮಾ ರೂಪುಗೊಳ್ಳಲಿದೆ ಎಂಬುದು ಈಗಿನ ಮಾಹಿತಿ.