ದಿನಕ್ಕೊಂದು ಹೊಸರುಚಿ

ಬಹುಶಃ, ಅಡುಗೆಯಲ್ಲಿ ಮಾಡಬಹುದಾದಷ್ಟು ಪ್ರಯೋಗಗಳ ನ್ನು, ವಿಜ್ಞಾನದ ಲ್ಯಾಬಲ್ಲೂ ಮಾಡಲಿಕ್ಕೆ ಸಾಧ್ಯವಿಲ್ಲವೇನೋ. ಒಂದು ಪದಾರ್ಥ ಸೇರಿಸಿದರೂ ಹೊಸ ರುಚಿ, ಹಾಕದೇ ಇದ್ದರೂ ಮತ್ತೂಂದು ರುಚಿ. ಈಗಂತೂ, ಕೋವಿಡ್-19 ಕಾರಣದಿಂದಾಗಿ ಅಡುಗೆ ಮನೆಗೆ ಅಗತ್ಯವಿರುವ ಅನೇಕ ಪದಾರ್ಥಗಳು ಸಿಗುತ್ತಿಲ್ಲ. ಅವುಗಳನ್ನು ಬಳಸದೇ ಹಿತಮಿತವಾಗಿ ಅಡುಗೆ ಮಾಡುವುದು ಹೊಸ ಸವಾಲು. ಪಾಕದಲ್ಲಿ ಸ್ವಭಾವತಃ ಪ್ರಯೋಗಶೀಲಳಾದ ನನಗೆ, ಈ ಕೋವಿಡ್-19 ಕೃಪೆಯಿಂದಾಗಿ ಹೊಸ ಬಗೆಯ ಅಡುಗೆಗಳನ್ನು ಮಾಡುವ ಉತ್ಸಾಹ ಹೆಚ್ಚಿದೆ. ಈ ಹಿಂದೆ ಕೇವಲ ಹೊಟೇಲ್‌ಗಳಲ್ಲಿ ಮಾತ್ರ ಸವಿಯುತ್ತಿದ್ದ
ತಿನಿಸುಗಳನ್ನು, ಈಗ ಮನೆಯಲ್ಲೇ ಮಾಡಲು ಸಮಯ ಸಿಕ್ಕಿದೆ. ಈ ಕಾರಣದಿಂದ ಲಾಕ್‌ಡೌನ್‌ ಸಹ ಸಹ್ಯವೆನ್ನಿಸುತ್ತಿದೆ. ಮಗಳ ಬೇಡಿಕೆಯ ಪಟ್ಟಿ ಉದ್ದ ಇರುವುದರಿಂದ ಮತ್ತು ಮಾಡಿದ್ದನ್ನು ಪಟ್ಟಾಗಿ ತಿಂದು “ಶಬ್ಟಾಶ್‌’ ಅನ್ನುತ್ತಿರುವುದರಿಂದ, ಸಾಕಷ್ಟು ಹೊಸ ಖಾದ್ಯ ತಯಾರಿಸುವುದನ್ನು ಕಲಿತಿದ್ದೇನೆ.

ಶಾಲೆಗೆ ಕಳಿಸುವ ಗಡಿಬಿಡಿ, ಹೋಂವರ್ಕ್‌ ಮಾಡಿಸುವ ತಲೆನೋವು ಎರಡೂ ಇಲ್ಲದೇ, ಯಜಮಾನರೂ ಮನೆಯಲ್ಲೇ ಇರುವುದರಿಂದ, ಟೈಂಗೆ ಸರಿಯಾಗಿ ಯಾವುದನ್ನೂ ಮಾಡಬೇಕಾಗಿಲ್ಲ. ಹಾಗಾಗಿ, ಹಿಂದೆ ನೋಡಬೇಕೆಂದು ಲಿಸ್ಟ್ ಮಾಡಿಕೊಂಡಿದ್ದ ಬೇರೆ ಬೇರೆ ಭಾಷೆಗಳ ಸಿನಿಮಾ, ವೆಬ್‌ ಸೀರಿಸ್‌ ನೋಡಲು ಸಮಯ ಸಿಕ್ಕಿದೆ. ಮಗಳಿಗೆ ಡ್ರಾಯಿಂಗ್‌ ಹೇಳಿಕೊಡುವ, ಎರಡು ದಿನಕ್ಕೆ ಒಂದಾದರೂ ಕಥೆಯನ್ನು ತಪ್ಪದೇ ಓದಿಸುವ ಮಹತ್ಕಾರ್ಯದ ಜೊತೆಗೆ, ತೋಚಿದ್ದು ಗೀಚುವ ನನ್ನ ಹವ್ಯಾಸವೂ ಸೇರಿ, ಸಮಯ ಕಳೆಯುತ್ತಿರುವುದೇ ತಿಳಿಯುತ್ತಿಲ್ಲ.

 ಕವಿತಾ ಭಟ್‌