ನೇತಾ, ನೀತಿ, ನಿಯತ್: ಏನಿದು ಬಿಜೆಪಿಯಲ್ಲಿ ನಡೆಯುತ್ತಿರುವ ಹಕೀಕತ್?

ಬೆಂಗಳೂರು : ಪಂಚರಾಜ್ಯಗಳ ಫಲಿತಾಂಶದ ಬೆನ್ನಲ್ಲೇ ರಾಜ್ಯ ಬಿಜೆಪಿಯಲ್ಲಿ ” ಮಗುಮ್ಮಾ”ದ ಬೆಳವಣಿಗೆ ನಡೆಯುತ್ತಿದ್ದು, ” ನೇತಾ, ನೀತಿ, ನಿಯತ್” ಚರ್ಚೆ ಆರಂಭವಾಗಿರುವುದು ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ.

ಪಕ್ಷದ ಕಚೇರಿಯಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಹಿರಿಯ ನಾಯಕರೊಬ್ಬರು ಈ ಘೋಷವಾಕ್ಯದ ಪ್ರಸ್ತಾಪ ಮಾಡಿದ್ದಾರೆ. ಮುಂದಿನ ಚುನಾವಣೆ ಗೆಲ್ಲುವ ದೃಷ್ಟಿಯಿಂದ ಈ ಘೋಷವಾಕ್ಯ ಪಾಲನೆ ಅನಿವಾರ್ಯವಾಗಿದೆ ಎಂದು ಪ್ರತಿಪಾದಿಸಿದ್ದಾರೆ. ಇದು ನಾಯಕತ್ವ ಬದಲಾವಣೆಯ ನಿಗೂಢ ಬೀಜವನ್ನು ಬಿತ್ತಿದೆಯೇ ? ಎಂಬ ಚರ್ಚೆ ಆರಂಭವಾಗಿದೆ.

ಚುನಾವಣೆ ಗೆಲ್ಲುವುದಕ್ಕೆ “ನೇತಾ ” ಬೇಕು. ಅದು ಪ್ರಧಾನಿ ನರೇಂದ್ರ ಮೋದಿ ಎಂದು ರಾಷ್ಟ್ರಮಟ್ಟದಲ್ಲಿ ಒಪ್ಪಿಕೊಳ್ಳೋಣ. ಆದರೆ ರಾಜ್ಯದಲ್ಲಿ ಆ ನಾಯಕತ್ವ ಸ್ಥಾನವನ್ನು ಭರ್ತಿ ಮಾಡುವುದು ಯಾರು? ಎಂಬ ಪ್ರಶ್ನೆ ಈಗ ಉದ್ಭವವಾಗಿದೆ.

ಇನ್ನು ” ನೀತಿ” ಎಂದರೆ ಬಿಜೆಪಿಯ ತತ್ವ-ಸಿದ್ಧಾಂತ. ಮುಂದಿನ ಚುನಾವಣೆ ದೃಷ್ಟಿಯಿಂದ‌‌ ಬಿಜೆಪಿ ಮತ ಕೇಂದ್ರೀಕರಣಕ್ಕೆ ಈ ನೀತಿಯನ್ನು ಹೇಗೆ ಪಾಲಿಸಬೇಕೆಂಬ ಬಗ್ಗರ ಇನ್ನು ಚರ್ಚೆ ಆರಂಭಗೊಳ್ಳಲಿದೆ. ಅದೇ ರೀತಿ ” ನಿಯತ್ ” ವಿಚಾರ ಪಕ್ಷಾಂತರ ಮಾಡುವವರನ್ನು ದೃಷ್ಟಿಯಲ್ಲಿಟ್ಟುಕೊಂಡು ಪ್ರಸ್ತಾಪಿಸಲಾಗಿದೆ. ಸಚಿವರೂ ಸೇರಿದಂತೆ ಹಲವರ ಪಕ್ಷ ನಿಷ್ಠೆ ಬಗ್ಗೆ  ಬಿಜೆಪಿಯ ಆಂತರಿಕ ವಲಯದಲ್ಲಿ ಅನುಮಾನ ವ್ಯಕ್ತವಾಗಿದ್ದು, ” ನೇತಾ, ನೀತಿ, ನಿಯತ್” ಆಧಾರದ ಮೇಲೆ ಪಕ್ಷ ಹಾಗೂ ಸರಕಾರದಲ್ಲಿ ಒಂದಿಷ್ಟು ಸ್ವಚ್ಛತಾ ಕಾರ್ಯ‌ ನಡೆಯಲಿದೆ ಎಂದು ಬಿಜೆಪಿ ಮೂಲಗಳಿಂದ ತಿಳಿದು ಬಂದಿದೆ.