ಸಿನಿಪ್ರಿಯರಿಗೆ ಸಂತಸದ ಸುದ್ದಿ ! ಸೆ.16ರಂದು ಸಿನಿಮಾ ಟಿಕೆಟ್‌ ದರ 75 ರೂ. ಮಾತ್ರ

ನವದೆಹಲಿ: ಸಿನಿಪ್ರಿಯರಿಗೆ ಸಂತಸದ ಸುದ್ದಿ !. ಸೆ.16ರ ಶುಕ್ರವಾರದಂದು ರಾಷ್ಟ್ರೀಯ ಸಿನಿಮಾ ದಿನದ ಅಂಗವಾಗಿ ದೇಶದ ಬಹುತೇಕ ಸಿನಿಮಾ ಮಂದಿರಗಳಲ್ಲಿ ಅಂದು ಟಿಕೆಟ್‌ ದರ ಕೇವಲ 75 ರೂ. ಇರಲಿದೆ.

ಒಂದು ದಿನದ ಈ ವಿಶೇಷ ದರವು ಪ್ರಮುಖ ಸಿನಿಮಾ ಮಂದಿರಗಳು, ಪಿವಿಆರ್‌, ಇನ್ನಾಕ್ಸ್‌, ಸಿನಿಪೊಲಿಸ್‌ ಸೇರಿದಂತೆ ಬಹುತೇಕ ಥಿಯೇಟರ್‌ಗಳಿಗೆ ಅನ್ವಯವಾಗಲಿದೆ.

“ಸಿನಿ ಉದ್ಯಮ ಚೆನ್ನಾಗಿ ನಡೆಯಲು ಸಿನಿಮಾ ವೀಕ್ಷಕರೇ ಮುಖ್ಯ ಕಾರಣ. ಹಾಗಾಗಿ ಅವರಿಗೆ ಧನ್ಯವಾದ ತಿಳಿಸಲು ರಾಷ್ಟ್ರೀಯ ಸಿನಿಮಾ ದಿನವಾದ ಸೆ.16ರಂದು ಸಿನಿಮಾ ಟಿಕೆಟ್‌ ದರದಲ್ಲಿ ವಿಶೇಷ ರಿಯಾಯಿತಿ ನೀಡಲು ತೀರ್ಮಾನಿಸಲಾಗಿದೆ. ಈ ದಿನದಂದು ಎಲ್ಲಾ ಭಾಷೆಯ ಸಿನಿಮಾಗಳ ಟಿಕೆಟ್‌ ದರ ಏಕರೂಪವಾಗಿ 75 ರೂ. ಇರಲಿದೆ.

ಆದರೆ, ಬುಕ್‌ ಮೈ ಶೋ ಸೇರಿದಂತೆ ಇತರೆ ಆನ್‌ಲೈನ್‌ ಪ್ಲಾಟ್‌ಫಾರಂ ಮೂಲಕ ಟಿಕೆಟ್‌ ಕಾಯ್ದಿರಿಸಿದರೆ ಹೆಚ್ಚುವರಿಯಾಗಿ ಜಿಎಸ್‌ಟಿ ಹಾಗೂ ಇಂಟರ್ನೆಟ್‌ ಶುಲ್ಕ ತೆರಬೇಕಾಗಿ ಬರಬಹುದು. ಥಿಯೇಟರ್‌ಗೆ ಹೋಗಿ ಟಿಕೆಟ್‌ ಖರೀದಿಸುವುದಿದ್ದರೆ 75 ರೂ. ಮಾತ್ರ ಪಾವತಿಸಿದರೆ ಸಾಕು,” ಎಂದು ದಿ ಮಲ್ಟಿಫ್ಲೆಕ್ಸ್‌ ಅಸೋಸಿಯೇಶನ್‌ ಆಫ್ ಇಂಡಿಯಾ(ಎಂಎಐ)ದ ಪ್ರಕಟಣೆ ತಿಳಿಸಿದೆ.