NASA; ಖಾಸಗಿ ರಾಕೆಟ್‌ನಲ್ಲಿ ಮೊದಲ ಬಾರಿಗೆ ಚಂದ್ರಯಾನ!

ಕೇಪ್‌ ಕೆನವೆರಲ್‌: ಅಮೆರಿಕದ ಆಸ್ಟ್ರೋ ಬಾಟಿಕ್‌ ಟೆಕ್ನಾಲಜಿ ಸಂಸ್ಥೆ ಸೋಮವಾರ ಮುಂಜಾನೆಯೇ ವಲ್ಕನ್‌ ರಾಕೆಟ್‌ ಮೂಲಕ ಪೆರೆಗ್ರಿನ್‌ ಲ್ಯಾಂಡರ್‌ ಅನ್ನು ಚಂದ್ರನತ್ತ ಯಶಸ್ವಿಯಾಗಿ ಉಡಾವಣೆ ಮಾಡಿದೆ.

ಖಾಸಗಿ ಸಂಸ್ಥೆಯೊಂದು ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ ಪರವಾಗಿ ಉಡಾವಣೆ ಮಾಡಿದ ಮೊದಲ ಲ್ಯಾಂಡರ್‌ ಇದು. ಫ್ಲೋರಿಡಾದ ಕೇಪ್‌ ಕೆನವರೆಲ್‌ ಬಾಹ್ಯಾಕಾಶ ಉಡಾವಣ ಕೇಂದ್ರದಿಂದ ಉಡಾಯಿಸಲ್ಪಟ್ಟ ಪೆರೆಗ್ರಿನ್‌ ಲ್ಯಾಂಡರ್‌, ಫೆ.23ಕ್ಕೆ ಚಂದ್ರನಲ್ಲಿ ಇಳಿಯಬೇಕಿದೆ. ಆ ಪ್ರಕ್ರಿ ಯೆಯಲ್ಲಿ ಯಶಸ್ವಿಯಾದರೆ ಮಾತ್ರ ಈ ಯಾನ ಪೂರ್ಣ ಯಶಸ್ವಿ ಎಂದು ಘೋಷಿಸಲ್ಪಡುತ್ತದೆ. ಇದು 51 ವರ್ಷಗಳ ಅನಂತರ ಅಮೆರಿಕದಿಂದ, ಚಂದ್ರನಲ್ಲಿಗೆ ಹಾರಿಬಿಡಲ್ಪಟ್ಟ ಮೊದಲ ಲ್ಯಾಂಡರ್‌ ಕೂಡ ಹೌದು.

ಯುಎಲ್‌ಎ ಕಂಪೆನಿಯ ಆಧುನಿಕ ರಾಕೆಟ್‌ ವಲ್ಕನ್‌ ಮೂಲಕ ಪೆರೆಗ್ರಿನ್‌ ಚಂದ್ರನತ್ತ ಧಾವಿಸಿದೆ. ರಾಕೆಟ್‌ನ 4ನೇ ಹಂತದಿಂದ ಕಳಚಿಕೊಂಡು ಲ್ಯಾಂಡರ್‌ ಮುನ್ನುಗ್ಗುವುದರೊಂದಿಗೆ; ಉಡಾವಣೆ ಯಶಸ್ವಿ ಎಂದು ಆಸ್ಟ್ರೋಬಾಟಿಕ್‌ ಟೆಕ್ನಾಲಜಿ ಮುಖ್ಯಸ್ಥ ಸಿಇಒ ಜಾನ್‌ ಥಾರ್ನ್ಟನ್‌ ಪ್ರಕಟಿಸಿದರು. ನಾನು ವಿಪರೀತ ಉದ್ವೇಗಕ್ಕೊಳಗಾಗಿದ್ದೇನೆ. ನಾವು ಚಂದ್ರನತ್ತ ಧಾವಿಸಿದ್ದೇವೆ ಎಂದು ಸಂತೋಷದಿಂದ ಉದ್ಘರಿಸಿದರು.